زبانحال امام حسین (ع) بر بالین برادر
..
..
امیر سفیدی اقدم(عاذل)
..
..
قلبیم اوخلارا اولوبدی سن کیمی نشانه قارداش
نیلورم جهانی سن سیز، افّ اولا جهانه قارداش
..
..
بو اوتوز بش ایل ده بیر آن دونمدین منیم سوزومدن
دویدون اوز اوزوندن اما دویمادین اخا اوزومدن
گوزیوه دگن بو پیکان فرقی یوخ دگوب گوزومدن
منی سنده ایلیوبلر بو اوخا نشانه قارداش
..
..
یولووی گلنده تاپدیم یولدا کی بو قان یولوندان
چوخ چتین اگیلدیم اوپدوم هم صاقندان هم صولوندان
اوجا اللرین واریدی دویمادیم سنون قولوندان
اللرین دوتوب الیمدن قالدی جاودانه قارداش
..
..
باشیمی اوجاتموسان سن ، منه چوخ بها ویروبسن
باشیوی گوروم اوجالسین اوزیوی فدا ویروبسن
نه صفالی منزلون وار علقمه صفا ویروبسن
نهرین اوستی جنتیم دی بنزوری جنانه قارداش
..
..
دیمورم اوغولسوزام من، منه سرسپاه اولوبسان
دیمورم کیچلدی جسمون نیزه پوش اولوب دولوبسان
گولِ باغِ حیدریدون دیورم نه تیز سولوبسان
حیف اولا گوله داغیلدی حیف او باغبانه قارداش
..
..
چوخ ادبلی قارداشیدون پوزمادین بیرآن وقارین
سویون اولمادی اوتاندین خوشلادین سویون کنارین
گلمیشم ایدم زیارت هامیدان قاباق مزارین
زائرم بو خوردا قبره ایمدی یانه یانه قارداش
..
..
آتمیوب سنی سوسوزلار عوض ایله سنده آتما
گوز یولا تیکوبله یکسر گوز یاشیمی قانه قاتما
وار کیمیم هرایه گلسون بیله خاک و خونه باتما
بو بش اوچ یارانی ایتمه اوزیوه بهانه قارداش
..
..
اوپرم بو صاق گوزوندن دلده کی محبتیمدن
بوینوی قوجاخلارام من دونمرم بو عادتیمدن
سنه زحمتیم چوخ اولدی ئولورم خجالتیمدن
کاش دچار اولام یانندا صرصرِ خزانه قارداش
..
..
سایوه بو قانلی چولده عزتیله دالدالاندیم
شاد اولوب همیشه گولدوم چوللری گزوب دولاندیم
ایمدی ایش برعکس اولوبدی من سنی گورنده یاندیم
قامتیم بوکولدی غمدن باخ بو ناتوانه قارداش
..
..
داده سسلدین ایشتدیم عارضیم سولوب سارالدی
گوردوم اللرین یول اوسته اللریم بلیم ده قالدی
بیرده قامتیم دوزلمز قارداشین یامان قوجالدی
ایله دوشموشم غمونده گلمز هیچ گمانه قارداش
..
..
خوشه تک درو اولوبسان کوفه اهلینه بیچیلدون
قارداشین ئولیدی قارداش بیچیلوب یره تیکیلدون
سن که اوجا قامتیدون نیه بس بیله کیچیلدون؟
قدیوه سنون یاراشماز ابدی بو خانه قارداش
..
..
مرکبه چتین مینیدیم باجیم ایلدی حمایت
نه دیزیم گلوردی گوردوم نه واریدی بیل ده طاقت
ایله بیر باجی دوگولسون منه چوخ ویرور اذیت
حیف دور دونه کمان تک قامتی کمانه قارداش
..
..
السیزه چتین دی اولسا باش یاراسی وای یارالی
ایستورم اوپم بو جسمون وار هاراسی وای یارالی
بو نه گوزدی هیچ بولونمور آق قاراسی وای یارالی
هیچ گوز اولمیوب گوزون تک اوخا آشیانه قارداش
..
..
بو بلالی چولده قارداش سن که دادخواهیمدون
منه سر سپاهیدون هم، همی تکیه گاهیمدون
من پناه عالم اولسام سن منیم پناهیمدون
کسمه سایوی باشیمدان بیله گلمه جانه قارداش
..
..
آیریلیق یامان چتین دی زینبیم سنی آتانماز
چوخ وفالی قارداشیدون اوزگیه سنی قاتانماز
بیله دینجلوب یاتوبسان قیزلاریم داخی یاتانماز
یوخوسوزلاریم گله لر سن سیز الامانه قارداش
..
..
گول قالوبدی خار الینده آیری دوشدی بو چمندن
گول دی بو گلاب اولوبدی؟ آیریلانمورام محندن
گورموری گوزوم گوزوندن زهریلی اوخی چکندن
گورسه گوزلریم سورونم سمت دلستانه قارداش
..
..
“عاذلی” سالوب خیاله گون گیچوب قوپا قیامت
یوخدی بیر کسه گمانی بیزه باغلیوب محبت
قویمارام خجالت اولسون، منده ایلرم شفاعت
هر ایکیمیزه بیر اوتدا عود تک یانانه قارداش
..
..
#عباسیه #اقدم_اهری #عباسیه_شهادت #ترکی #زبدةالاشعار
نظر دهید