اربعین
..
..
محیر اردبیلی
..
..
زینب مقام عشقیده بیر امتحان وئروب
شامی مسخر ائتدی شهامت نشان وئروب
..
ویرانه شامی سالدی او وقته تلاطمه
وئردی لوای فتحینی دلبند فاطمه
..
تیر بلایه زینب هدف ائتدی جسمینی
سیندیردی شهر شامده شمرون طلسمینی
..
اثبات ائدوب حسینینون اللرده ئولمگین
آلدی یارالی قارداشینون قانلو کوینگین
..
یاندیردی دلده شمع عزا سینه داغلادی
اول پیرهنده اوخ یئرینی اؤپدی آغلادی
..
پایان وئروبدی عهدینه نقصانی قالمادی
رسوای ائدوبدی زاده ی سفیانی قالمادی
..
ویرانه شامی ترک ائلیوب غملو حالیله
میندی کجاوه اوستونه پوزقون جلالیله
..
غم کاروانی باشلادی یول غم دیارینه
زوّار اولوب بیر عدّه حسینون مزارینه
..
زینب آچوبدی دفتر وصلی واراقلیور
اما رقیّه زلفینی تورپاق داراخلیور
..
تورپاقلار آلتدا طالب دیدار یاردور
ویرانسراده اکبرینه انتظار دور
..
سس سیز گئدور او قافلۀ غم یواش یواش
دللرده شور وصل ولی گوزلرینده باش
..
قاسم عروسی سالمیش اله گوشواره سین
اصغر آناسی اصغرینون گاهواره سین
..
دشت غمه خلاصه یتوب غملو قافله
هرکس تاپوب اوز ایستدیگین باشلیوب گله
..
لبریز اولوبدی کاسۀ اندوه داشلانوب
هجران سؤزی او بزم محبّتده باشلانوب
..
بزم وصالیده آچیلوب هجر صحبتی
دلدادگان عشق سایور درد فرقتی
..
زینب تاپوبدی قارداشینون قبر اطهرین
پائین پاده دفن اولونوب بیلدی اکبرین
..
آگاه اولوبدی سرّینه ششگوشه قبرده
بیلدی آلوبدی اصغرین آغوشه قبرده
..
یاتمیش یارالی سینه نون اوستونده نازیله
همدم اولوبدی قبرده شاه حجازیله
..
اوچ شعبه لی خدنگ ائله قورخودوب گوزین
دل آچسادا دیله گتیمز بیرده سو سؤزین
..
پائین پاده اکبرون عطرین آلور حسین
آلمیش قوجاقه اصغره لایلای چالور حسین
..
ائتمیش یارالی سینه نی گهواره ترپدور
یوخدی آناسی اصغره دل آچماق اورگدور
..
رونقلی ایله گوز یاشیلان بزم ماتمی
درج ایلسون صحیفیه خامه عقیده می
..
دوتدی یوزینی زینبه عرض ایلیوب رباب
ای برج درد و محنته تابنده آفتاب
..
ابر بهار تک گوزیمون ابری وار خانیم
باخ گور حسینوون نه گوزل قبری وار خانیم
..
زوّارینه بو قبر عجب عالی توشه دور
اکبرله بیر یاتوبدی اودور آلتی گوشه دور
..
مندن فقط بو مطلب آلور صبری هاردادور
فرمایش ایله اصغریمون قبری هاردادور
..
دریای محنتی گلوب اوندا تلاطمه
دوتدی یوزین ربابه دئدی بنت فاطمه
..
معلوم اولان سو فکرینی باشدان آتوب بالون
مظلوم آتاسینون سینه سینده یاتوب بالون
..
سندن گلایه اصغر لب تشنه ایلمز
قورخما رباب قورخما دوباره سو ایستمز
..
دلده شرار محنت و اندوهه یانما چوخ
دنیا سوئینا رغبتی یوخدور اوتانما چوخ
..
توکدی عذاره زینب همان وقته گوز یاشین
دوتقون سسیله سسلدی لب تشنه قارداشین
..
قارداش فراغتیله بو قبر ایچره یاتموسان
سن زینبی نه علّته یاددان چیخاتموسان
..
بزم یزیده باشی آچوق من گئدن زمان
علّت نه اولدی گلمدون ای شاه انس و جان
..
اول بیحیانون حالیمه هئچ قلبی یانمادی
باخدی یارالی باشیوه گولدی اوتانمادی
..
طعن و شماتتیله یانان قلبی داغلادی
ناخوش امامی ئولدوره پرونده باغلادی
..
قلبیم یانور نه نوعی ائدوم شرح مطلبی
نامحرمان ایچینده دانیشدیردی زینبی
..
دل یاره سی دگنده اؤرکدن آلیشمیشام
اؤز باشیمه خیال ائلمه من دانیشمیشام
..
گوزدن عذاره آخدیقی یاشون دانیشدیروب
قارداش منی او بزمیده باشون دانیشدیروب
..
آلدى قرار و طاقتیمی چوب خیزران
الله بیلور او بزمیده ئولدوم همان زمان
..
سن آلموسان کناریوه اکبرله اصغرون
منده اؤزومله گتدوم عزالی حرملرون
..
بیلدوم سوسوزلقون سنیچون سو گتورمیشم
بیر دسته قبریوه ملر آهو گتورمیشم
..
باخسون اگر جمالینه لیلا تانینمیور
قدی کماندی زینبون اصلا تانینمیور
..
ویرانسراده فرش عزا سالمیشام حسین
معجر وئروب بو کوینگوی آلمیشام حسین
..
هر محنته دؤزوب علم کفری ییخمیشام
قوللاری باغلى فتح ائلیوب شامی چیخمیشام
..
بیرده مسخّر ایلسه هر شهری بیر نفر
بو رسمدور او شهره نماینده گوندور
..
هرچه خیال ائتدوم حسین بیر کس اولمادی
نائب قویوب او شهره گلم من تاپولمادی
..
مهرون لباسینی بئله فکر ائتمه سویمیشام
خوردا بالامی شامه نماینده قویمیشام
..
عهدیم باشا یتورمیشم ای شاه مشرقین
تنها بو آرزو اورگیمده قالور حسین
..
بیر گل اولوب نولیدی سولیدوم بو قبرده
حشره کیمین سنیلن اولیدوم بو قبرده
..
بو سؤزلرون «محیّر» اگر دل نشیندور
کشتی عزّتون نیه بس گِل نشینیدور
..
عقبایه حاصل ایله عمل، کاروان عمر
بئش گون بو فانی دهرده منزل نشینیدور
..
..
#اربعین #محیر_اردبیلی #ترکی #زبدةالاشعار
نظر دهید