لایلای چمن عزتیمون بلبلی لایلای #اصغریه_سیفی_اردبیلی

زبانحال حضرت رباب (س) در فراق شهید ششماهه
..
..
سیفی اردبیلی
..
..
لایلای چمن عزّتیمون بلبلی لایلای
لایلای سینمون تز سارالان نوگلی لایلای
لایلای بالا لایلای
..
..
چکدی سنی بازاره گوزل دلبر الینده
زر قدرین عیار ایتمدیلر زرگر الینده
غنچه کیمی اولدون آتوون پرپر الینده
گلدون اوخا رسوا ایلدون قاتلی لایلای
لایلای بالا لایلای
..
..
دنیا بیزیلن ترسه مدار اوسته دایاندی
مندن گوزلیم جبریله روحون آرالاندی
ششماهه لیگونده بلگون قانه بویاندی
جان خرمنیمون اولدی تلف سنبلی لایلای
لایلای بالا لایلای
..
..
گلدی خبرون خیمه ده بیچاره ربابه
بیلدیم فلک آمالیمی دوندردی سرابه
چرپندی اورک طایر جان دوشدی شتابه
یاندیردی منیم وای دیمگیم بیر ائلی لایلای
لایلای بالا لایلای
..
..
سندن صورا یوخدور سوزوم اصغر نلر اولدی
چوللرده ننون سینه سی بوش دربدر اولدی
بعضی دیدیلر صودامر اوغلون نظر اولدی
یوخسا تزایدی تپراق اولا منزلی لایلای
لایلای بالا لایلای
..
..
سنسیز یانارام شام و سحر غم بوجاقیندا
گوز یاشی توکوب اگلشرم گون قاباقیندا
بیر اوینامادون نازیله مادر قوجاقیندا
ئولدی سینه مون سن کیمی قاره تلی لایلای
لایلای بالا لایلای
..
..
سو ویردیلر ایچدیم سفر اوسته من زاره
سن درناق آتان دوشلره صود گلدی دوباره
اولمادی اَمَن اود بورودی دوشدی فشاره
صود امّه گوئون قالدی منه نسگلی لایلای
لایلای بالا لایلای
..
..
مظلوم آتووا امر شهادت که قوتاردی
صیاد مصیبت دل ناشادیمی یاردی
گهواره ویده غارته دشمنلر آپاردی
داشدان داشا چالدی منی محنت سئلی لایلای
لایلای بالا لایلای
..
..
پربسته قوشام دامیده محنت چکرم من
ئوز آهیمه یاندوقجا مشقّت چکرم من
بو زندگیدن ئولمگه حسرت چکرم من
غمدور یاشاماقدان آنوون حاصلی لایلای
لایلای بالا لایلای
..
..
..
#اصغریه #سیفی_اردبیلی #اصغریه_شهادت #حضرت_رباب #ترکی #زبدةالاشعار