در وصف پیغمبر و کیفیت غدیر خم
و گریز به احوال جناب علی اصغر (ع)
.
.
مرحوم صحاف تبریزی
.
.
سبب بو عالم ایجاده کیمدی هانسی وجود
تاپوب مراتب عُلیانی حُسنله موجود
.
همان وجودیدی مطلق محمد عربی
تمام خلقت عالملرون اولوب سببی
.
وجودی مبدأ ایجاددن مقدّس دور
کمال قدسده محبوب ذات اقدسدور
.
اودور که اشرف مخلوق ایدوب خدای مجید
ایدوبدی نازل او شاهنشهَه کتاب حمید
.
وجوده علت غائی مخاطب لولاک
گر اولماسیدی او اولمازدی خلقت افلاک
.
او نور پاک که گوگلرده اسمی احمددور
کنیّه یرده ابوالقاسم محمّددور
.
همان او نوریدی بر لمحۀ تجلّاده
کلیمی ایلدی مدهوش طور سیناده
.
او گوهر شرف و علم و حلم میر عرب
وجود اجودی ایجاد کایناته سبب
.
آپاردی مکّیه تشریف سید بطحا
کثیر جمعیله اول شهریار بی همتا
.
یتوردی حجّی تمامه پیمبر رحمت
قویوب مدینیه یوز مکّه دن ایدوب رجعت
.
غدیر خمّه یتنده حبیب ربّ جلیل
او بین راهده ایتدی نزول جبرائیل
.
گتوردی آیۀ بلّغ او یرده روح الامین
پیمبره یتوروب ذوالجلال پیغامین
.
بو نوع امر ایلیوبدور خدای لم یزلی
گرک بو گون اولا ظاهر جلال و شأن على
.
ولایت اسدالله قیلماسان ظاهر
رسالتون الى تبلیغدن اولور قاصر
.
ایشیتدی چون بو پیامی جناب پیغمبر
نزوله امر ایلیوب دوشدی قافله یکسر
.
گیدنلری ولی قیتردیلر گلن دایانوب
علاوه قافله دن هر یره گیدن دایانوب
.
جهاز ناقه لریله قورولدی بیر منبر
چخوب او منبره فرمانده قضا و قدر
.
ازلده باشلادی بیر خطبه چوخ فصاحتله
آچوب ثنای خداونده دل بلاغتله
.
ز بس که جلوه ایدوب نور احمد مختار
اولوبلا سامع و ساکت مهاجر و انصار
.
او قدر خلقین ایچینده دوتوب على کمرین
گوتوردی اللرینون أوستنه رسول مبین
.
او قدر قوزادی اول نوری سرور مدنی
على جمالینی گون تک گوروب هامی علنی
.
اوجالدی قبّۀ افلاکه نور یزدانی
جمال پاکی ایشقلاندوروب او صحرانی
.
اوجا سسیله خطاب ایتدی احمد مختار
هامی بلون ایشیدون ای مهاجر و انصار
.
سُرور و قوّت دل گوهر ثمینیمدور
على وصیّ بلافصل و جانشینیمدور
.
بودور علی اسدالله سَروَر غالب
آناسی فاطمه دور والدی ابوطالب
.
بونون ولایتی هر طاعته مقدم دور
علوم ماسبق و مایکونه أعلم دور
.
بونون محبّتی دور حبّ کردگار جلیل
اولوبدی نعمت دین بو وجودیله تکمیل
.
منه خلیفه بودور انس و جنّه مولی دور
تصرّف ایتمگه هر بیر اموره اولی دور
.
بونون ولایتینی هر کس ایلیه انکار
خدا یانندا اولور روسیاه روز شمار
.
اوجالدی جشنیله تبریک عرش اعلایه
ازل عمر دیدی بخٍّ لک او مولایه
.
بو بیر علیدی ال اوسته آلوب شه کونین
ولی آلوب الینه بیرعلیده اوغلی حسین
.
.
#گریز شهادت حضرت علی اصغر (ع)
#اصغریه_شهادت
.
.
او گونکه کرب بلا دشتی قانیله دولدی
سموم ظلمیله گلزار مصطفی سولدى
.
بویاندى قانینه انصار شاه تشنه جگر
قالوب کومکسیز او صحراده سبط پیغمبر
.
آلوبدی اللرینون اوسته سود أمر بالاسین
گتوردی رزمگهه سبط حضرت یاسین
.
خطاب قیلدی که ای کوفیان بدفرجام
سوسوزدان اودلانوراوچ گوندی تشنه لبدی بالام
.
بو سود امر بالامی بیر گورون نه حاله قالوب
خزان یلی یتیشن گول کیمی سولوب سارالوب
.
اگر منی بولوسوز جرم صاحبی یکسر
بو سود امر بالانون نه گناهی وار لشگر
.
همین فرات که جاریدی بو کوه و صحرایه
ایدوبدو مهر خدای جلیل زهرایه
.
بودا پیمبروزون نسلدور قالوب عطشان
اوقدر قالمور الیم أوسته تشنه ویرسون جان
.
دوشوب بو غنچه گلوم آچمامش طراوتدن
دوداقلارین اموری کثرت حرارتدن
.
معاینه گورورم یوخدی باوروز سوزیمه
بیله خیال ایدیسوز ایسترم سوئی اوزیمه
.
عطش بو طفلی سالوب دیلدن ایلیوب بیتاب
گلون آلون آپارون ایلیون اوزوز سیراب
.
دیمم بابامدی رسول خدای عالمیان
آنامدی حضرت زهرا عزیز هر دو جهان
.
نه مرتضادور آتام حیدر اول امیر عرب
نه مجتبادی حسن قارداشیم او کان ادب
.
نه من حسینم عزیز رسول منتخبم
بو چولده فرض ایلیون منده بیر نصر عربم
.
ثمر بغیشلمیوب حجّت شه عالم
حسینه ویرمدی هر کس جواب لا و نعم
.
مگر که حرمله ویردی بروزه اوز ظلمین
قویوب دیزین یره شرم ایتمدی او بد آئین
.
آلوب شل اولموش الینه او دمده تیر و کمان
بو فکریله سو یرینه او طفله ویرسون قان
.
او سنگ دل دل زهرانی لخته قان ایلدی
او سود أمر بالانون حلقینی نشان ایلدی
.
کمانی راست چکوب تیر زوریلن دولدی
رها اولاندا کماندان دیوم نلر اولدی
.
هوا یوزینده پر آچدی خدنگ سسلندی
صداسین اصغر ایشیتدی ازل هوسلندی
.
دوشوب بو شوقه هوسدن که ترک ناز ایتسون
خدنگ حرمله نی روحی پیشواز ایتسون
.
ایدردی پیک بلانی خیال پیک وصال
مجال ویرمدی محبوبین ایتسون استقبال
.
حسین فاطمه نون سرو قدّینی اگدی
او ضربیلن یتشوب تشنه حلقینه دگدی
.
دایاندی گچمدی اوخ تشنه حنجرین بچدی
همین که بچدی بوغازین دایانمیوب گچدی
.
بچوب بوغازینی باشدان باشا او معصومون
پارالادى قولینی هم امام مظلومون
.
چکوب اوخی بوغازیندان او نوگل ترینون
تمام اوجونا دولدوردی قانین اصغرینون
.
سپوت او قانی گوگه عرض ایدوب امیر عرب
بو ظلمه بو ستمه شاهد اول اوزون یا رب
.
نه جرم ایتمیشدی اصغریم بو قومه خدا
الیمده اوخلادیلار تشنه لب گروه جفا
.
یتوب خطاب الهی که ای ملائکه لر
بو قانى اخذ ائلیون، ایلیون گوگی احمر
.
حسینون اصغرینون قانیدور بو ناحق قان
که یر یوزینده توکوبلر جفائیله عدوان
.
گرک فلکده بو قانین علامتی قالسون
ظهور ایدنده او قانی امام عصر آلسون
.
اولوب بو باره ده «صحافه» غیبدن امداد
ویروبدی دم اونا روح القدس اولوب استاد
.
ئولونجه چکمیه جاق ال بو باب رحمتدن
برات مغفرت ایستر شه ولایتدن
.
.
#حیدریه #صحاف_تبریزی #غدیریه #ترکی #زبدةالاشعار
نظر دهید