زبدةالاشعار

یاحسین! جان اوسته یم جانان یادیمدان چیخمیوب #زینبیه_سیدبشیرحسینی

خاطرات قهرمان کربلا
زبان حال حضرت زینب کبری سلام الله علیها
.
✍️زبدة الاشعار✍️
.
🆔: @nohe_torki
.
#سیدبشیرحسینی
.
یاحسین! جان اوسته یم جانان یادیمدان چیخمیوب
اُول زمان کی تشنه وئردون جان یادیمدان چیخمیوب
.
زینبم چوخ خاطره م وار الّی دؤرد ایلده منیم
شاهدیمدور حضرت سبحان، یادیمدان چیخمیوب
.
روز میلادیمده سن گلدون آچیلدی گوزلریم
اولدی اوندا لبلرون خندان یادیمدان چیخمیوب
.
حیف اولا جدّیم پیمبر رحلت ائتدی دهریدن
صاحب دین و ره و قرآن یادیمدان چیخمیوب
.
بئش یاشیمدا باشیمه سالدی فلک قاره لچک
سینه سی یاره انام بیر آن یادیمدان چیخمیوب
.
صبح روز نوزده ماه مبارکده، ائوه
یاره لی گلدی شه مردان یادیمدان چیخمیوب
.
یام یاشیل گوللر گورنده باغدا یانّام آغلارام
مجتبی اُول بی کس دوران یادیمدان چیخمیوب
.
دردیمی اظهار قیلسام داشدا آغلار حالیمه
تاپمادیم هئچ دردیمه درمان یادیمدان چیخمیوب
.
من شریک نهضتم روز ازلدن یاحسین!
ذرّیده باغلادیقیم پیمان یادیمدان چیخمیوب
.
آند اولا نوح نبی نون نوحه و اعجازینه
کربلا دشتینده کی طوفان یادیمدان چیخمیوب
.
هر نه ده چیخسا یادیمدان چیخماز عاشورا گونی
یئتمیش ایکی تشنه لب قربان یادیمدان چیخمیوب
.
اکبری ائتدی قیلجلار اِرباً اِربا وای وای
مقتلینده قانینه غلطان یادیمدان چیخمیوب
.
قاسمی قسمت به قسمت ائتدی آتلار دیرناقی
اللرینه یاخمیشیدی قان یادیمدان چیخمیوب
.
قارداشون عباس ئولنده هم سن ئولدون همده من
ساغ گوزیندن ئوپن بیر پیکان یادیمدان چیخمیوب
.
قولاّری سو اوسته دوشدی دوره سین آلدی عدو
قالدی مرکب اوسته سرگردان یادیمدان چیخمیوب
.
هر قوشین باشی کسیلسه اصغری یاد ایلرم
آلتی آیلیق اوخلانان عطشان یادیمدان چیخمیوب
.
ایندیه واردور مجسّمدور گوزومده قتلگاه
شمر الینده خنجر برّان یادیمدان چیخمیوب
.
من گوروردوم اون ایکی ضربتله اُول ملعونِ دون
باشیوی ذبح ایلدی دالدان یادیمدان چیخمیوب
.
اون نفر ملعون چاپوبلار نعشون اوسته آت سنون
ائتدیلر توپراقیله یکسان یادیمدان چیخمیوب
.
هر نه، عاشورا سووشدی باتدی گون اولدی گئجه
قاره گئیدی عالم امکان، یادیمدان چیخمیوب
.
پرچمی شام غریبان آخشامی آلدیم اله
صبح اولونجا بیر مه تابان یادیمدان چیخمیوب
.
قیزلارا اولدوم نگهبان قارداشیم عباس تک
اینده اُول لیله ی بحران یادیمدان چیخمیوب
.
زلزله دوشدی کسنده اللریوی ساربان
ایلدن آرتیق اولدی اُول بیر آن، یادیمدان چیخمیوب
.
بیر یاری یانمیش چادیردا قیزلاری یغدیم باشا
گوی لره اوج ایلیین افغان یادیمدان چیخمیوب
.
بعضی نون گوشواره سین آلمیشدیلار اجباریلن
گون باتاندا صحنه ی تالان یادیمدان چیخمیوب
.
بعضی نون قمچی ویریلمیشدی باشیندان وای وای
اهلبیت بی سر و سامان یادیمدان چیخمیوب
.
بعضی نون یغمایه گئتمیشدی باشیندان معجری
اللرین معجر ائدن نسوان یادیمدان چیخمیوب
.
بعضی نون اولدی ایاقی یاره یاندی دامنی
عصر وقتینده یانان دامان یادیمدان چیخمیوب
.
الغرض گون چیخدی اولدی اون بیریمجی گون شروع
هم رسَن هم ناقه ی عریان یادیمدان چیخمیوب
.
اهل عیالون قول قولا باغلاندی عالَم آغلادی
آغلارام من، دیده ی گریان یادیمدان چیخمیوب
.
قتلگاهوندن کئچنده دوشدی قیزلار ناقه دن
باشلاریندا طرّه ی افشان یادیمدان چیخمیوب
.
نعشون اوسته اوچ یاشیندا بیر قیزی چوخ ویردیلار
گوم گوی اولدی اُول گلِ ریحان یادیمدان چیخمیوب
.
اولمادی ممکن قویام قبره یارالی جسمیوی
اُول کفن سیز یاره لی اَبدان یادیمدان چیخمیوب
.
کوفیه یولاّندی غملی کاروانیم یاحسین!
«یاحسین» ذکری اولوب عنوان یادیمدان چیخمیوب
.
پیشواز ائتدی منی باشون خرابه کوفه ده
سن کیمی بیر مهربان سلطان یادیمدان چیخمیوب
.
نیزه باشینده یارالی باشون اعجاز ایلدی
سن تلاوت ایلیین قرآن یادیمدان چیخمیوب
.
اوز کنیزیم گَتدی خرمانی تصدّق ایلیه
پایتخت حیدر و احسان یادیمدان چیخمیوب
.
مسلمین اوغلانلارین زندانیده گوردوق او گون
ظلمیله محبوس اولان طفلان یادیمدان چیخمیوب
.
کوفه دن چیخدیق خلاصه شامه ساری شمریله
کاروان لنگه دوشوب جریان یادیمدان چیخمیوب
.
باشیوی حمل ایلیین نیزه دایاندی ناگهان
طی اولان یولاّره سالدون سان یادیمدان چیخمیوب
.
سید سجاده بیلدیردون قالوب یولدا قیزون
یاغدی باشه غصّه لی باران یادیمدان چیخمیوب
.
زجر ملعون زجر وئردی تازیانیلن اونا
بیر سینیق نی تک اولوب نالان یادیمدان چیخمیوب
.
شامیده دیل یاره سی دیلدن سالوبدور باجیوی
ال چالوردی بیزلره دونان یادیمدان چیخمیوب
.
هم بیزی هم باشیوی اوچ شخص گوردی ، غصّه دن
هر اوچی بیردن وئروبلر جان یادیمدان چیخمیوب
.
مجلس شوم یزیدین ماجراسی غملی دی
خیزرانی الده اُول نادان یادیمدان چیخمیوب
.
خطبه میله تختینی تابوت، یاحسین!
حقّیوی چون ایلدیم اعلان یادیمدان چیخمیوب
.
بیر جسارت ائتدی قان آخدی دوداقوندن سنون
اُول زمانون، جان سنه قربان یادیمدان چیخمیوب
.
باشیوین ویرانیه گلماقی ئولدوردی بیزی
خاطرات منزل ویران یادیمدان چیخمیوب
.
آلدی آغوشه رقیه ئوپدی قانلی لبلرون
نحوه ی وصل و دم هجران یادیمدان چیخمیوب
.
باشینه ووردی، باشین آشدی دولاندی باشیوه
سولدی بیردن اُول رضوان یادیمدان چیخمیوب
.
قبره قویدوم منزل ویرانه ده یاری گئجه
صبح اولونجا قالموشام حیران یادیمدان چیخمیوب
.
اربعینونده نصیب اولدی گلَم سجّادیله
آلتی گوشه قبریوه مهمان، یادیمدان چیخمیوب
.
قبریوی ئوپدوم دولاندیم باشیوه پروانه تک
جابر اوّل زائرون، ای جان! یادیمدان چیخمیوب
.
اوچ گئجه گوندوز مزاروندن کناره گئتمه دیم
ایلدیم چوخ ناله و افغان یادیمدان چیخمیوب
.
اربعینوندن صورا گِئتدیم مدینه شهرینه
عترته سن سیز اولان زندان یادیمدان چیخمیوب
.
یاده سالاّم سیره ی امّ البنینی آغلارام
اُول اوغولسوز دُرجِ دُرّ افشان یادیمدان چیخمیوب
.
لعنت و نفرین اولا دائم یزیده، اُول دنی
والی شهره وئرن فرمان یادیمدان چیخمیوب
.
جدّیمین شهرین منه چوخ گوردی، تبعید ایلدی
سرزمین و مأمن خوبان یادیمدان چیخمیوب
.
چوخ سوزون اوستدن سُوُشدوم یانماسین چوخ اهل دل
یاندی اُول گونلرده چوخ انسان یادیمدان چیخمیوب
.
خاطرات کربلا هر گون خیالیمدن کئچور
محنت بی حدّ و بی پایان یادیمدان چیخمیوب
.
«راویه» آدلی قریه مسکنیم آخر اولوب
قالدی دیلده غملریم پنهان یادیمدان چیخمیوب
.
واردی نه قونشو گله دیداریمه نه اقربا
یوخدی یار و یاوریم، یاران یادیمدان چیخمیوب
.
بو چیچکلی گولّی باغدا یوخ صفا سن سیز حسین!
غملی دی چون خانه ی ایمان یادیمدان چیخمیوب
.
من دانیشدیقجا بو حالاتی ملک لر آغلادی
تیتره یوبدی عرشِ الرّحمان، یادیمدان چیخمیوب
.
دردلی دردیندن دیینده دینجلر هردن دیلی
دار دنیا اولدی دردستان، یادیمدان چیخمیوب
.
گورمدیم الاّ جمیلا کربلاده ای جمیل!
عشقیمه صبریم اولوب برهان یادیمدان چیخمیوب
.
کاش اولیدون بوردا من راحت ئولیدیم یاحسین!
اولمادی هئچ مشکلیم آسان یادیمدان چیخمیوب
.
یاحسین «سید بشیر»م عمّه مین قولیجه من
یازمیشام جان اوسته یم جانان یادیمدان چیخمیوب
.
.
مَا رَأیتُ اِلاّ جَمیلاً
بنال ای نی! نوا زیباست زیبا
نوا در نینوا زیباست زیبا
به زیبایی قسم در چشم زینب
تمام کربلا زیباست زیبا
.
.
.
#زینبیه_شهادت
#یاحسین_جان_اوسته_یم_جانان_یادیمدان_چیخمیوب
#ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  قیامت دیر مگر یارب بو غمده ماسوا آغلار #فاطمیه_محمدهوشمند

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی