زبانحال حضرت رباب (س) در شهادت حضرت علی اصغر (ع)
..
..
مرحوم صافی تبریزی
..
..
سنسیز علی روز و شب ذكریم اولوب وای اوغول
من سنه لای لای دیوم یا دیوم ایوای اوغول
..
..
اوچ گیجه گوندوزعلی هر نه دیدیم یاتمادون
باشدا كی سو فكرینی باشدان اوغول آتمادون
ویرمدیلر سو سنه مقصدوه چاتمادون
من سنه لای لای دیوم یا دیوم ایوای اوغول
..
..
دل یوخیدی حالیوی ایله سن یاخشی فاش
یاندون اوغول آغلادون سینه می ایتدون خراش
منده ئولیدیم سنی گورمه میش اوّلده كاش
من سنه لای لای دیوم یا دیوم ایوای اوغول
..
..
دوتموسان الفت علی گوردیله پستانیله
آچدیلا صوددن سنی زهریلی پیكانیله
قویدیلا یاخشی منی ناله و افغانیله
من سنه لای لای دیوم یا دیوم ایوای اوغول
..
..
گیتمز علی سینه دن دیرناقیوین یرلری
حشره گلنده آنان تك بو یری گوستری
فاطمه نی یاندیر آغلاتدی پیغمبری
من سنه لای لای دیوم یا دیوم ایوای اوغول
..
..
بسکه سکینه یانور سن کیمی قارداشینه
خوردا اوشاقلار باخور آغلوری گوز یاشینه
هی دولانولار اوغول بوش بشگون باشینه
من سنه لای لای دیوم یا دیوم ایوای اوغول
..
..
گه سنی بوش دوشلره سالدیم اوغول آغلادیم
گوردیم علی اوزمیسن اللروی باغلادیم
اكبر آناسی كیمی منده جگر داغلادیم
من سنه لای لای دیوم یا دیوم ایوای اوغول
..
..
خیمه لری سو دیوب هر نه دولاندیم علی
اولمادی بیر كیمسه دن چاره دایاندیم علی
گاه اوز احوالیمه گه سنه یاندیم علی
من سنه لای لای دیوم یا دیوم ایوای اوغول
..
..
حالیمی آنلار گورن دیدة گریانمی
سینمه بیر اود دوشوب یاندوریری جانمی
گر چه دیوب اوخشارام سن قوزی قربانمی
من سنه لای لای دیوم یا دیوم ایوای اوغول
..
..
گاه بو بوش سینه دن عطرون آلوب آغلارام
گاه ایاق دوتماقون یاده سالوب آغلارام
اللری قویونمدا من گر چه قالوب آغلارام
من سنه لای لای دیوم یا دیوم ایوای اوغول
..
..
هر آنا اوز اوغلنی اوخشیوب آغلار یانار
هر باجی قارداشنه گر چه سیزلدار یانار
لیک رباب ایمدیدن هر نه قدر وار یانار
من سنه لای لای دیوم یا دیوم ایوای اوغول
..
..
قالدی اوغول اودلانان قلبده نسگللریم
هانسی الیله منیم حلّ اولی مشکل لریم
داشه دیسم بولمیشم یاندیری بو دللریم
من سنه لای لای دیوم یا دیوم ایوای اوغول
..
..
نه یوزیله یثربه ای علی بیرده گیدوم
گورسم اگر صود امر بیر بالا بسمن نیدوم
هانسی زمانون سنون یاده سالوب ذکر ایدوم
من سنه لای لای دیوم یا دیوم ایوای اوغول
..
..
من نجه سن سیز باخوم بیرده گله گلشنه
آغلامیوم گلمیوم صبح و مسا شیونه
یاخشی ملر قالمیشام وای منه ایوای منه
من سنه لای لای دیوم یا دیوم ایوای اوغول
..
..
نیلر او ساعت آنان گر دوشه بیر گون اله
سو ایچه سیراب اولا دوشلرینه صود گله
یوخ داخی منده علی صبر و دل و حوصله
من سنه لای لای دیوم یا دیوم ایوای اوغول
..
..
«صافی» اگر ایسته سن فاطمه دلشاد اولا
اصغر آناسی گرک ذکر اولونا یاد اولا
بسدی ئولونجه بو سوز موجب فریاد اولا
من سنه لای لای دیوم یا دیوم ایوای اوغول
..
..
#اصغریه #صافی_تبریزی #اصغریه_شهادت #ترکی #زبدةالاشعار
نظر دهید