احوالات جوان نصرانی در روز عاشورا
در مصرع حضرت امام حسین (ع)
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
.
سن دوشوبسن نیه ای شاهد زیبا یارالی
باش یارا لب یارالی قامت رعنا یارالی
.
قانوه تشنه ندن بیله مسلمان لار اولوب
قتلوه حکم ویرن صاحب ایمان لار اولوب
منی مأمور ایلین حافظ قرآن لار اولوب
حکمی امضاء ایلیوب مجلس شورا یارالی
.
.
من مسیحی بالاسى حافظ قرآندی بولار
من مسیحا روشم صاحب ایماندی بولار
بیلمورم بس نجه بی عار مسلماندی بولار
ایتدیلر قتلوه ترسانی مهیّا یارالی
.
.
دیدیلر بو یارالی چون که اولوب عاقّ امام
قتلینی واجب ایدوب مفتی دین یوخدی کلام
سن گیت ئولدور بو غریبی ایله بو امری تمام
من ایناندیم اودی گلدیم ایدم اجرا یارالی
.
.
لیک حلقوندن انا الحق سسی گورّم اوجالار
موسوی نور جمالون دل صحرایه سالار
گورسه موسی اوزی بو عالمی حیرتده قالار
بو چولی ایلموسن وادی سینا یارالی
.
.
کشور عشق و وفا یوسفی سن ای شه عشق
مصرعوندور یارالی پیکریله بیر چه عشق
ایتموسن قتلگهون ایله تماشاگه عشق
که ایدورسن گورَنی محو تماشا یارالی
.
.
کیمسن آخر سنی بوقوم بو احواله سالوب
آشنا یوخ سنه دور و بَرون اغیار آلوب
طایفه ن هاردادی بس خویش و ائلون هاردا قالوب
قالموسان دشمن ایچینده بیله تنها یارالی
.
.
سنله انوار الهیّه هویدا گورورم
اوز گوزل نورویله محو تجلّا گورورم
مهد خونین ده بیر طلعت عیسی گورورم
بو آییقلیقدی و یا عالم رؤیا یارالی
.
.
دم جان بخشیله یوخسا یارالی عیسی سن
اَرِنی دلده او سیناده دوشن موسی سن
طشت زرین کنارینده دوران یحیی سن
سنله تجدید اولونور قصّۀ یحیی یارالی
.
.
گزدیرورسن بیله کیم نازیله حق بین گوزیوی
دیوسن رمزیله محبوبوه گیزلین سوزیوی
هانسی معشوقدی سن عاشق ایدوبسن اوزیوی
محو عشق اولموسان ای عاشق شیدا یارالی
.
.
دلربا سن نه گوزل دلبر خوشخو سن سن
عشق باغینده اولان بیر گل خوشرو سن سن
عطر جنّات ایدوسن پخش ایله خوشبو سن سن
که دولوب عطریویله دامن صحرا یارالی
.
.
سن مگر شور سالان طورده موسا دگوسن
سن مگر فوق قَداسَتده مسیحا دگوسن
سن مگر بودم جان بخشیله عیسی دگوسن
کیمسن آخر دی گوروم تاج مسیحا یارالی
.
.
اؤزیوی سوختۀ آتش آه ایلموسن
بیر نگاهیله منی محو نگاه ایلموسن
گل دیله بیر گوروم آیا نه گناه ایلموسن
که ویروب مفتی دین قتلوه فتوا یارالی
.
.
سن کیمه عاقّ اولوبسان ندی اؤز آدی اونون
اوز امام اولماقینا واردی نه اسنادی اونون
منتسب دورکیمه کیمدور اب و اجدادی اونون
حکم اعداموی ایلوب سنون امضاء یارالی
.
.
سوز یتَنده بورا زهرا بالاسی چکدی بیرآه
دوندی ترسایه حسینی گوزیله ایتدی نگاه
بویوروب عاق امامت دگولم حقدی گواه
منی ناحقّ یخوبلار بیله اعضا یارالی
.
.
عیسوی زاده منم سبط رسول الثقلین
هم على اوغلی همی فاطمیه قرة عین
اوز آدیمدور وطنیندن قوغولان تشنه حسین
سوکنارینده دوشن جسمی سراپا یارالی
.
.
او امامی که دیورسن اودی محبوب بابام
جدّ پاکیمدی رسول مدنی خیر انام
اؤزی پیغمبر خاتم قزی زهرادی آنام
حق سوز اوستونده یخوبلار منی اعدا یارالی
.
.
منی مهمان چاغروبلار بو گروه جانی
تَكلیوبلَر بو بیاباندا بو سر گردانی
ئولدوروللر سو کنارینده سوسوز مهمانی
لب دریاده دوشوب صاحب دریا یارالی
.
.
گلمیشم بو چوله دلداره طرف روی دلیم
باشدا یتمش ایکی تن اهل وفا آرخام ائلیم
گتدى الدن او ائلیم یاندی دلیم سندی بلیم
قالمیشام ایمدی بیله بی ائل و آرخا یارالی
.
.
ایله سولدوردولا بو چولده منیم گل لریمی
قویدولار نالۀ جانسوزیله بلبل لریمی
آرزو ایلرم آخر نفسیم ائل لریمی
ایده لر قانیمه غلطان منی پیدا یارالی
.
.
گر چه نه سس وئرنیم واردی نه بیر دادرسیم
بی کسم یوخدی منیم غیر خدا آیری کسیم
یاره دگدیقجا قسم یاریمه آرتار هوسیم
شوق دلداریله آلّم دله یارا یارالی
.
.
فخردور عاشق ایچون عاشق جانان اولماق
دلده محبوب آدی اوز قانینه غلطان اولماق
شور عشقیله دوشوب عشقینه قربان اولماق
گتوره ظاهره معنای فدینا یارالی
.
.
شوقیله سیر مقامات وفا ایلمیشم
اؤزومی مَحوِ رَهِ صدق و صفا ایلمیشم
هر نییم واریدی جانانه فدا ایلمیشم
سالمیشام عشقیمیله صورته معنا یارالی
.
.
موسوی شور واریم گرچه او موسی دگلم
باشیمین قصه سی یحیادی او یحیی دگلم
واردی عیسی نفسیم لیک او عیسی دگلم
ایدرم مرده اولان دللری احیا یارالی
.
.
سنه الطاف الهی یتشوب معناده
سن دیورسن منه عیسی نه دیوب رؤیاده
یا او رؤیاوی دیوم من سنه بو اثناده
نجه گور سرّدن آگهدی بو دانا یارالی
.
.
دیدی حاشا که حسین قتلینه سبقت ایده سن
پیش طاهاده مسیحانی خجالت ایده سن
امر عیسایه گرک ایمدی اطاعت ایده سن
ویر قولاق گورنه دیور حق سوزه گویا یارالی
.
.
بوشلا انجیل یولون دوت طرف قرآنی
اول موحّد تانی تک ذات حق یکتانی
واحد اللهی چاغیر راضی ایله عیسانی
اولما راضی که اورکدن اولا عیسی یارالی
.
.
آختارورودن نچه مدّتدی که سن دلداری
ایمدی تاپدون سنه لطف ایلدی ذات باری
ترک تَثلیت ایلیوب فوراً آچ آت زُنّاری
سنی توحیده چکور بندۀ یکتا یارالی
.
.
عاطفی باخماقی قان ایچره گوزل گفتاری
گو که یاتمیشدی او نصرانی تاپوپ بیداری
آچدی فی الفور او ساعتده آتوب زنّاری
دیدی گفتاریوه قرباندی بو ترسا یارالی
.
.
صحنۀ عشقده چاتدی اله تحصیل حصول
اورگدوب كلمۀ تهلیلی اونا سبط رسول
دیدی تهلیل او ترسا ایدوب اسلامی قبول
سویلدی رحمته ایتدون منی دارا یارالی
.
.
نه گوزل وجهیله بو گُمرَھی ارشاد ایلدون
دل ویرانه می بیر لطفیله آباد ایلدون
نفس امّاره الیندن منی آزاد ایلدون
سنده واردور نه گوزل شیوۂ شیوا یارالی
.
.
سنه من کثرت اغیار آرا تک یار اولّام
یوخدی بیر کیمسه هوادار هوادار اولّام
سن فداکاره بو صحراده فداکار اولّام
بو فداکارلیقیمدور کچیک اهدا یارالی
.
.
باخدی بیر قانه باتان سروره دولدوردی گوزین
شه ایاقینه ادبله دوشنوب قویدی یوزین
اذن آلوب ایتدی جهاد ایتماقا آماده اؤزین
دیدی سندن ایدرم دفع بلایا یارالی
.
.
ساقی عشق اونا ویرمیشدی ایله پیمانه
که اولوب مست گیدوب رزمگهه مستانه
قانینه باتدی دولاندی گهر غلطانه
قانه غلطیده یخیلدی او دل آرا یارالی
.
.
آری آری اونا کیم ویردی حسین جام وفا
مست اولار نشئۀ دینیله تاپار قلبی صفا
اُف دیمز وورسالا هر قدر اونا زخم جفا
یاره لردن او ایدر کسب مداوا یارالی
.
.
چکدی ترسانی صفا اهل صفانین صفینه
ایتدی ملحقّ اونی اهل وفانین صفینه
امتیاز آلدى قاریشدی شهدانین صفینه
قانینی قانلارینا قاندی او ترسا یارالی
.
.
#آمدن_حضرت_زینب_به_بالین_برادر
.
گورنه خوشبخت او گوزل تازه مسلمان اولدی
دوتدی قرآن یولی قربانی قرآن اولدی
او طرفده او دوشوب قانینه غلطان اولدی
بو طرفده یخیلیوب سرور بطحا یارالی
.
.
او غریبین باشی اوسته بیر او ترسا گلدی
او گلوب گتدی صورا زینب کبرا گلدی
دیه بولمم که نجه دختر زهرا گلدی
گوردی خندان گله بنزر گل زهرا یارالی
.
.
دیدی سن تک یارالی گوهر غلطان اولماز
گلستاندا بدنون تک گل خندان اولماز
من کیمی نغمه سی خوش بلبل خوشخوان اولماز
اوخشارام داغ داش اولار منله هم آوا یارالی
.
.
ای اولان کشور جود و کرمین سلطانی
بیر نگاهیله موفق ایلین ترسانی
تائبه لطفیله سالسان نظر احسانی
اولار البته عزیز ایکی دنیا یارالی
.
.
.
.
#جوان_نصرانی #تائب_تبریزی
#حسینیه_حسینیه_شهادت #اصحاب_الحسین #قتلگاه
#سن_دوشوبسن_نیه_ای_شاهد_زیبا_یارالی
#ترکی
.
✍️ #زبدةالاشعار ✍️
.
🆔: @nohe_torki
نظر دهید