توبۀ واقعی
احوالات بهلول کفن دزد
.
✍️ #زبدةالاشعار ✍️
.
🆔: @nohe_torki
.
مرحوم حافظی تبریزی
.
سوزی الله آدیله باشلوارم اعلان ایدوب قرآن
الا لاتقنطوا من رحمت الله ایّها الانسان
.
بیر آز یاخشی قولاق ویر مطلبی توضیح ایدیم روشن
امیدیم وار یاراتسون مستمعده قدرت ایمان
.
خیالیم وار ائدم بیر آیه نون تفسیرینی تشریح
او آیه آل عمران سوره سندندور اولور عنوان
.
صدوق، قدسّ سرّه ایدوب آمالی ده مرقوم
نشان وئردیم یرین گیت باخ اوزون گر ایسته سن برهان
.
یازوب پیغمبر رحمت زمانی شهر یثربده
اولوب بو واقعه واقع که من عرض ایلورم الان
.
گلوب بهلول آدنلی بیر نفر بربخت برگشته
رسول الله قاپوسوندا دایاندی دیدہ سی گریان
.
ایله آغلور ولی بیگانه نون حالین پوزور حالی
جوان اوغلى ئولن مادردی اولموش گوئیا گریان
.
معاذ ابن جبلده قویدی تاثیر اشگی بهلولین
توکولدى گوز یاشی گوزدن بسان قطرۀ باران
.
شرفیاب حضور حضرت طاها معاذ اولدی
او حالیله که گوزیاشی اولوردی درّ تک غلطان
.
معاذی گوردی اشگ آلودہ پیغمبر خبر آلدى
نه باعث دور آخوب اشگون بونوعی ایسلانوب دامان
.
نیه حالون پریشاندور ایده الله سنه رحمت
ندور دردون گتور اظهاره مندن ایلمه کتمان
.
گلوگیر اولدوقی عالمده سویلوب یا نبی الله
منی بیر آغلیان آغلاتدی عالم لر سنه قربان
.
دم درده دوروب بهلول آدنلی بر جوان آغلور
کانه چشمۀ چشمی ایدیر دریا کیمی توفان
.
اونون آشفته احوالی منی آشفته حال ایتدی
بیوک بیر دردی وار گویا گلوب، سیزدن آلا درمان
.
دیمور هر نه سوروشدوم آچمادی هرگز سوزون اوستون
منى تا رقّته گتدی ایدبدور قلبیمی شان شان
.
بویوردی ایسته گلسون سرگذشتندن اولوم حالی
گلوبدور بیر امیدیله امیدی اولماسین حرمان
.
حضور حضرت پیغمبره بهلول اولوب احضار
ولی شرمنده ینگلیله ایدوبدور عارضین پنهان
.
دیله چوخ رأفتیله رحمةً لعالمین دوتدی
ندن آغلور او نوعیله ایده تا علّتین اذعان
.
حیا مانع اولوب بهلول أوزی کشف ایلسون جرمون
رسول الله اوزی سایدی اولاردان که اولار عصیان
.
اوغورلوخدان یالاندان قتلدن یا مشرک اولماخدان
سوروشدی بیر به بیر یاد آور اولدى قویمادی نقصان
.
زنا غیبت حقوق واجبه ایتام مالندن
تذکّر ویردی استفسار ایدوب بالعدل و الاحسان
.
دید وقجه آغلادی جرموم دیدی اوندان بیوک راخدی
یوزوم گلمور دیم ایوای منه من خانمان ویران
.
دیدی یر گوگ بیوکدی یا سنون جرمون ایا بهلول
جواب عرض ایلدی مولا منیم یوخ جرمومه میزان
.
قومون مقداری چوخدی یا سنون جرمون سوال ایتدی
دیدی بیر ایله اولسیدی اولاردی قابل غفران
.
گناهیم چوخ بیوکدی وصفه گلمز من قرا گونلی
اوزوم اوز ایتدیقیم جرم و گناهه اولموشام حیران
.
رسول الله تعجب ایلدی آخر تعجّله
عوض ایتدی سؤالین طرزینی تکبیر حق گویان
.
دیدی الله بویوکدی یا سنون جرمون خیالوندا
دیدی نه یا رسول الله بیوکدور خالق منّان
.
بویوردی ایمدی بس کشف ایت گوروم دردون ندور بهلول
خداوند تعالی حلّ ایدر مشگل لری آسان
.
سالوب باشین اشاقه منتها خجلتله عرض ایتدی
اؤزیمی ایتمشم من مستحق آتش نیران
.
منِ بدبخت یدّی ایلدی نبّاش و کفن دزدم
خراب ایکاش اولیدی باشیمه اوّلده قبرستان
.
گونوزلر که جنازه دفن اولاردی من گجه وقتی
آچوب قبری سویوب رختین قویاردیم میّتی عریان
.
کفن سویماق منه اولموشدی ایش امّا او آخرده
هوای نفسمه تابع اولوب چوخ ایتمشم طغیان
.
وفات ایتمشدی بیر قیز خلقی بیر انصاردن بیر گون
اونی دفن ایتدلر گتدیم گجه قبرین آچام اعلان
.
کفن قصدیله آچدیم قبرینی اما او اثناده
من گم گشته راهه یول تاپوپ اغوا ایدوب شیطان
.
همینکه خلعتین سویدوم زنایه مرتکب اولدوم
اولوب معبوده نافرمان آپاردیم نفسدن فرمان
.
خلاص اولدوم جنایتدن ایشتدیم غیبدن بیر سس
منی ایتدی مخاطب سسلدی ای غافل و نادان
.
نیه ایتدون منیم دامانیمی آلوده ای فاسق
مشام جانوه نامحرم اولسون نکهت رضوان
.
کانّه یوخلامشدیم من اویاندیم خواب غفلتدن
پشیمانم پشیمانم بحقّ خالق سبحان
.
پیغمبر تا ائیشدی بو سوزی رنگی تاپوپ تغییر
تحیّر عالمنده اولدی گویا مات و سرگردان
.
یوزون دوندردی قهریله دیدی منّن چکیل یان دور
سنون ایتسین أوتون ظالم منی ده قورخورام سوزان
.
اولوب بهلول نومید و سرافکنده پریشان دل
قزاردی غصّه دن رنگی مثال لالۀ نعمان
.
قیتدی بیر باشا یوز قویدی صحرا و بیابانه
دیدی قالدى سنه ایش یا کریم و قادر و رحمان
.
ایدوب مغلول الین بوینون قاچان قول گلدی سویلوردی
الهی ای پناه بی پناه عالم امکان
.
وروب چنگ توسّل دامن ذات خداونده
ایدبدور قرخ گجه گوندوز شکسته نی کیمی افغان
.
امین وحی ناگه نازل اولدى جانب حقدن
گتوردی آل عمران سوره سیندن آیه نی شایان
.
بغیر از وحی گتدی بیرده پیغام جداگانه
بو معناء و بو عنواندا که ای پیغمبر ذی شان
.
سن ایتسن طرد بیر عاصی کیمه اولسون پناهنده
کیمه دردین دیسون بیر مبتلای محنت خُسران
.
بیزیم بیر توبه کرده بنده میز آغلور بیاباندا
پشیماندور گناهندان هدایت ایلیوب وجدان
.
اونون گیت گوگلون آل سیل اشگنی ویر مژدّ جنّت
خطاسین عفو قیلدوخ اولماسین افسرده و پژمان
.
مصمّم اولدی پیغمبر تاپا بهلولی صحرادن
ایاقه دوردی فوراً شادمان و خرّم و خندان
.
معاذی ایستدی دوتدی خبر بهلول اولان یردن
رعیت آردیجه مأمور اولوب دوشدی چوله سلطان
.
نه نیرو وار گوراخ دوز توبه ده الله حضورینده
عنابتله ایداخ یاران بؤتؤن آثامدن جبران
.
بیزی ده بارالها توبیه لطفاً موفّق قیل
ایله احسان یوزیله سفرۀ احسانوه مهمان
.
خلاصه گلدی پیغمبر تاپوپ بهلولی صحراده
نه گوردی گورمه سین گوزلر نجه بیچاره و ویلان
.
قیزاریمش آغلاماخدان گوزلری رنگی سیاه اولموش
قرا قولدان اونی ممکن دگول ویرسین بیری رجحان
.
دیز اوسته باشین آلدی یوز گوزیندن تپراقین سیلدى
نوازشله دانشدیردی دیردی گاه و گه جان جان
.
بهشتین مژدہ سین ویردی دیدی خوشحالوه بهلول
گناهوندان خداوند تعالی گچدی اولدون بوذر و سلمان
.
عزیزم سنده دئ یارب منیمدہ گچ گناهمدن
بحق خون مظلوم حسین و عترت عطشان
.
اونون سال یاده بیر حالین که اوز اوغلون گیندیردی
کفن پوش ایلدی اولسون جوانی عازم میدان
.
قیامت عالمی گویا قیام ایتدی حرملرده
آناسی لیلنون آز قالدی غصّه باغرین ایتسین قان
.
«کمالی» اولدی بانی نظمه چکدیم من بو موضوعی
اونون أنفاس قدسوندان بیله تاپدی گوزل پایان
.
اوزونده «حافظی» یالوار یاخار عرض ایله یا ربی
منی نادیده فرض ایله بحق شاه مظلومان
.
.
#پندیات_حافظی_تبریزی
#پیامبراسلام
#سوزی_الله_آدیله_باشلوارم_اعلان_ایدوب_قرآن
#ترکی
.
✍️ #زبدةالاشعار ✍️
.
🆔: @nohe_torki
نظر دهید