اربعین
.
.
مرحوم یحیوی اردبیلی
.
.
شامدن گلدیم حسین عترت پیغمبریلن
گئدورم یثربه آغ زلف و قرا معجریلن
.
.
ثبت ائدوب خاطره ی کوفه و شاماتی باجون
قصه ی ساعت دروازه ی ساعاتی باجون
گردش کوچه و بازار و محلاتی باجون
زینبون عزم وطن ائتمیش آغیر دفتریلن
.
.
کاروانیمده گئدنده چوخیدی خوردا اوشاق
أئولدى یوللاردا تلف چوخلاری محو اولدى تفاق
کنج ویرانه ده بیر نازلو قیزون قالدى قوناق
یولا سالدی منی قلبیم دولی نسگل لریلن
.
.
گلمگون منزل ویرانه یادیمدان چیخماز
یوخودا ائتدی او قیز باب گلایه سنه باز
واریدیم منده همان حالده مشغول نماز
ائشیدیردیم دانیشوردون او خانم دختریلن
.
.
شهر یثربده حسین مکتب محنت آچارام
حرم هاشمیه شرح مصیبت آچارام
قانلو پیراهنوى الده علامت آچارام
یاره وی گوستررم پیرهن احمریلن
.
.
دئسه عباسیم هانی ام بنینه نه دیوم
یا خبر آلسا سنی اهل مدینه نه دیوم
حال اکبردن او صغرای حزینه نه دیوم
دیوم اکبر نئجه دفن اولدی علی اصغریلن
.
.
گددورم جد کباریم حرم اطهرینه
مادریم فاطمه قارداشیم حسن محضرینه
قویمارام تازه عروسون قونا توز زلفلرینه
سولارام یوللاری گوزدن یاغان اشگ تریلن
.
.
گورمیشم گوزلریمیلن او گون ای شاه أُمم
ییخدیلار عرصیه عباسیمی قولاری قلم
یتیشنده وطنه ایسترم اقوامی گورم
باخوم عبداللهه آیا نئجه بو گوزلریلن
.
.
روز قتلونده سنون حشر تمام اولدی بیزه
ایکی مینجی فقره محشر شام اولدی بیزه
جدیمون مسجدی وقتی که مقام اولدی بیزه
اوردا محشر ائدرم من بو ایکی محشریلن
.
.
قبر پاکینده آنام فاطمه نی آغلادارام
دوغرانان کوینگوی مرقدی اوسته آتارام
آچارام قوللاریمی سنگ مزارین دوتارام
خنجر شمر جفاکاری دوتان اللریلن
.
.
وئر اجازه گوتوروم خاک مزاروندن حسین
زلفیم آلوده ائدوم عطر غباروندن حسین
نیلیوم یاد ائلیوم فصل بهاروندن حسین
یثربه وارد اولوم رایحه ی عنبریلن
.
.
وارد اولّام نئجه عباس علمدار ائوینه
سر سلامت وئرم عورتلره انصار ائوینه
نه یوزیلن گئدرم جعفر طیار ائوینه
آغاروب باشدا پراکنده اولان مولریلن
.
.
بانوان آلسا خبر دختر شاه عجمی
شهربانو هانی سلطانون عزیزه حرمی
نئجه من گیزلدورم سینه ده بو عُمده غمی
دییرم خلقه اونون حالینی نه دیللریلن
.
.
یازمیشام نامه ی فتحی او بابام حیدره من
فرصت اولمادی دمشقی او زمان فتح ائده سن
چکمیشم کوچه و بازارده شمشیر سخن
گلمیشم شامی مسخّر ائلین لشکریلن
.
.
ایستدیم فتح علمیم شامیده پاینده قالا
قویمیشام خوردا قیزون اوردا نماینده قالا
ئولمیه دهرده تاریخون حسین زنده قالا
لوح قبرینده او تاریخ اوخونا ایللریلن
.
.
گوز یاشیم صیقل ائدوب حق الینون تیشه سینی
بیخدن کسدی خبیثه شجرون ریشه سینی
خورد خورد ائتدی یزید عشرتینون شیشه سینی
یخدی ضحاکی نئجه پنجه ی آهنگریلن
.
.
.
#اربعین #یحیوی_اردبیلی #ترکی #زبدةالاشعار
نظر دهید