شامیده کاروان غم آه و نوایه گلدیلر #اربعین_مضطر_اردبیلی

اربعین
.
.
مرحوم مضطر اردبیلی
.
.
شامیده کاروان غم آه و نوایه گلدیلر
آه و نواییلن چخوب کرب و بلایه گلدیلر
.
.
طیّ منازل ایتدیلر آغلاشا آغلاشا یولی
زحمتیلن یتوردیلر بالاخره باشا یولی
دوشدی بلالی زینبون مدفن قارداشا یولی
کوی وصاله چاتدیلار خاک شفایه گلدیلر
.
.
قبر شریفینی گوروب باجی ائلیکه قارداشین
آچدی او بینوا باشین توکدی عذاره گوز یاشین
جان کیمی باسدی قارداشین باغرینا قبرینون داشین
نالیه پای بندلر پایه به پایه گلدیلر
.
.
آغلادی اولدی قرمزی کاسۀ قان کیمین گوزی
بیلمیور هانسی دردینی عرض ایده چوخدی چون سوزی
قارداشا خواهر حزین مرثیه خوان اولوب ئوزی
ویردی سسینه سس حرم شور بکایه گلدیلر
.
.
عرض ایلدی حسین گلوب شامه گئدن حرملرون
قول قولا باغلانانلارون بانوی محترملرون
من غمیمی دیوم و یا سن دیوسن او غملرون
عترت اطهرون هامی درد و بلایه گلدیلر
.
.
گلدی حرملرون اگر درد و ملالی خیلی دور
سالمه دور تمامیسی باخ بو رباب او لیلی دور
آل خبر هانسی گور حسین زینبیدن گیلِیلیدور
هیچ جهتدن ایلمه سنده گلایه گلدیلر
.
.
ایستیورم خبر ویرم بو وقع بلیّه دن
یعنی خجالتم او اوچ یاشلی بالون رقیّه دن
قانلی باشون خرابه ده واقف اولوب قضیّه دن
اوندا که بازدید ایچون بیز اسرایه گلدیلر
.
.
گوردی کی آلتی گوشه دور لیلی مزار حضرتی
فوری دوشوندی مطلبی آرتدی ئورکده حسرتی
بیلدی حسینون اکبره واریدی چوخ محبّتی
باشلادی نوحه آیریدان آه و نوایه گلدیلر
.
.
نوبت آغلاماق یتوب لیلی زار و مضطره
باشینی آچدی ال آتوب زلفینه گاه معجره
توکدیله اشک او دوره هم قبر علیّ اکبره
آغلیوب اول جوانه چوخ ندبه صدایه گلدیلر
.
.
تازه عروسه باخدیلار قاسمی یاده سالدیلار
گوردیله چوخدی غصّه سی درد و غمیه قالدیلار
قلبین اله گتورماقا محض آرایه گلدیلر
زلفیله قبر قاسمه سالماقا سایه گلدیلر
.
.
اوخشاما باشلیوب هامی قبرینون اوسته باش به باش
توکدی عروس بی نوا کیپریگینون ساینجا یاش
هر دم عم اوغلی وای دییَر ناله ایدر یواش یواش
ویردیله اونلا سس سسه آهیله وایه گلدیلر
.
.
ناله و آه و دادیلن لرزه سالوبلا عالمه
تاب و توانلاری گیدوب ناله یتیشدی خاتمه
گوردیله بیر باجی باخور جانب نهر علقمه
بیلدیله نیّتین دوروب آیری عزایه گلدیلر
.
.
دستۀ دردمندلر دردیله کشف رازیله
گلماقا یوز قویوبدولار ناله جانگدازیله
نوحه ایدورله عادت لحن غم حجازیله
تا سر قبر اقدس کان وفایه گلدیلر
.
.
باجیلارین بیری او دم باشیدن آچدی معجری
کشف ایلدی بو سرورون یوخدی یانیندا مادری
بوردا گرکدی ساخلیاق حرمت حقّ خواهری
بو سوزولن هامی خانم درد خفایه گلدیلر
.
.
اوچدیلا بلبلان غم برگ گل اوسته قوندیلار
جمله سی قاره پیرهن جمله سی قاره دوندیلار
باشلار آچیلدی زلفلر قبرینون اوسته یوندیلار
ضجّه چکوبله دمبدم داد و هرایه گلدیلر
.
.
وقت اولی «مضطرا» یتر مدّت عمر خاتمه
اوندا طفیلیَم حسین قلبه اهل عالمه
عرض ایلیَم هرایه گل جان یتوشوبدی سینمه
سس دوشه شاهِ کربلا دیدِ گدایه گلدیلر
.
.
#اربعین #مضطر_اردبیلی #ترکی #زبدةالاشعار