تسلیت به حضرت زهرا سلام الله علیها در شهادت امام جعفر صادق علیه السلام
.
✍️ #زبدةالاشعار ✍️
.
🆔: @nohe_torki
محمد باقر قومیان ( غمگین )
.
صادق اوغلون حسرتیله ویردی جان یافاطمه
ظلمله مسموم اولوب لبلرده قان یافاطمه
.
بو گونون مثلنده باتدی دین اسلامون گونی
عالمه ویردی فداکار اولماقین سرمشقنی
جعفری مذهب گرک باشه ویره اوز عشقنی
یاد ایده اوز پیشواسین هر زمان یافاطمه
.
بو نه عالمدور خانم اوغلانلارون مسموم اولوب
هر بیری بیر نوعیله بو دهریده مظلوم اولوب
اون بیر اوغلوننان بیری مهموم اولوب مغموم اولوب
آغلوری مین یوز اوتوز بش ایلدی قان یافاطمه
.
اولدی چوخ مظلوم ایکی اوغلون حسینله حسن
مجتبی حقّینده جوده ایلدی ظلمون الن
من دیمم نه ظلم ایدوب کرب وبلاده اهرمن
روز عاشورا ویروب لب تشنه جان یافاطمه
.
آغلاسان فردوسده زین العبادین حالینه
آغلادی قرخ ایل حسینه بی پناه اطفالینه
اودلانار قلبون امام باقرین احوالینه
ایله سن گوزدن یوزه اشگون روان یافاطمه
.
اوغلیوی مسموم ایدوب ظلمیله منصور دنی
هر زمان آغلارقویوب دور قصر جنتده سنی
آغلادار حجاجی یثربده #بقیع ده مدفنی
زائرین حالین پوزار ورماق همان یافاطمه
.
دورد امامین قبرینه زواری ایله لر سلام
واقعا عالمده چوخ مظلوم اولوب بودورد امام
بیر گوراق حضاریله اوردا عزاداروق تمام
آرزو قالمازدی دلده اول زمان یافاطمه
.
طوسده مدفون اولان موسی الرضایه آغلاسان
وای اوغول وای ناله سیله بو جهانی داغلاسان
هرشب جمعه گلوب اشگون عذاره باغلاسان
کیم اولار موسی الرضا تک مهربان یافاطمه
.
گه گیدوب اوغلون جواده آغلاسان هرروز وشب
آخر ام فضل امامین قتلینه اولدی سبب
ایتمدی شرم وحیا خلاقدن اول بی ادب
سوگتوردی اوز کنیزی اول زمان یافاطمه
.
کاسه نی آلدی کنیزیندن سویی توکدی یره
قویمادی اود تشنه کامه بیر ایچیم تا سو ویره
کاش اولیدی بوجهان فانی دگییدی بیربیره
تشنه لب جان تاپشراندا اول جوان یافاطمه
.
گه امام عسکری حالینه سینه داغلاسان
ناله وفریاد ایدوب اشگون عذاره باغلاسان
مهدی صاحب زمان احوالنه قان آغلاسان
هاردادور اوغلون حسین قانین آلان یافاطمه
.
قلبینین دردی ایدوب عالملره از بس اثر
اللری قوینوندا یا جدّا دیر حیران گزر
گه گیدر کرب و بلایه جدّی قبریندن اپر
عرض ایدر ای عمه می آغلارقویان یافاطمه
.
گه نجف صحراسینه آغلارگوزیله یول سالار
جدّینین عطرین گیدوب قبر شریفیندن آلار
کاظمینه گه گیدر گه سامریاده اولار
یاد ایدر اجدادینی صاحب زمان یافاطمه
.
شامده اما دونر شامه او شاهین گوندوزی
چون باتوب اوردا حسینین بیر ایشیقلی اولدوزی
تا گورر ویرانه ده قبرین او نسگل لی قزی
خسته دور یورقون یاتوب اول باغری قان یافاطمه
.
یاامام جعفر صادق سنه جانلار فدا
ایسته حقدن حاضرینه بیر برات کربلا
اوز آنان زهرایه خاطر بیزلری ایله دعا
دامنوندن چکمز ال (غمگین) اولان یافاطمه
.
#صادقیه_شهادت
#صادق_اوغلون_حسرتیله_ویردی_جان_یا_فاطمه
#غمگین
#ترکی
.
✍️ #زبدةالاشعار ✍️
.
🆔: @nohe_torki
نظر دهید