زبدةالاشعار

صبح ازّل فاش اولاندا عالمه اسرار عشق #عالم_ذر_مصیبی_تبریزی

شرح عالم ذر
#گریز به شهامت شیرزن کربلا و #مجلس_یزید»
.
✍️ زبدة الاشعار ✍️
.
🆔: @nohe_torki
.
محمد علی مصیبی تبریزی
.
.
صبح ازّل فاش اولاندا عالمه اسرار عشق
زینب آدیلن یازیلدی رقعۀ طومار عشق
.
.
قدرت خلاقیله نظمه دوشوبدور نُه سما
قائم عرش و حجابات اولدی نور انبیا
وقت اووقت اولدی جهانه فاش اولا سّر بلا
قلبیلرچرپیندی بیلسون کیمدی پرچمدارعشق
.
.
بیرصفه آناً دوزولدی جرعه نوشان الـَست
منتظر گوزلر اولوبلارنشئه مخموره مست
قورخولی عنقا،کیمین کتفینده اولساپایْ بست
سینه سی لازمدور اولسون ملجأ زنگارعشق
.
.
کربلا صحراسی تعیین اولدی مأوای قیام
قانلی بیر دریا کی هئچ درده تاپیلماز التیام
کشتی ایمانه کیمدور ناخدای خاص و عام؟
ساحل امنه یتورسون کشتی خونبارعشق
.
.
منتظر دور انبیالر اولیالر یکسره
کیم ایر باشون بو والا حکم حیّ داوره
کیمسه حاضردور سالا اهل وعیالین چوللره
کیمدوراولسون جان ومالاً عازم پیکارعشق
.
.
الغرض ثبت اولدی فال عشق آل کوثره
حُکم عشقی ووردیلار نام سلیل حیدره
یادگار مرتضانین آدی دوشدی دیللره
گرم اولوب نام حسینیلن اوگون بازارعشق
.
.
گوردیلر پور علی غم طورینه یار آختارور
نهضتین ابقاسینه یار وفادار آختارور
قانلی صحراده قیام عشقه غمخوار آختارور
سس گلوبدی؛غم یمه،سرکردۀ احرار عشق
.
.
یا حسین ، انوار رحمت قلبیوه تابنده دی
پرتو رخساریوه خورشیدیلن مَه بنده دی
یار و پشتیبانین اولماق زینبه زیبنده دی
قان چناقینده باجون دور حافظ آثارعشق
.
.
آتش عشق ولانی من مفصّل یازمیشام
سیزباجی قارداشین عشقین صبح ازّل یازمیشام
بیر الهی لَمعه دور قلبیزده مجمل یازمیشام
نقشۀ دین هُداده اولموسوز معمار عشق
.
.
کربلا توپراقینه بیرگون حسینیم قان یاغار
قورخولی یللر اسر هرسمتیدن طوفان یاغار
داش یاغارخنجریاغارعشق اهلینه پیکان یاغار
بذل ائدرجانانه جانین یتمیش ایکّی یارعشق
.
.
تشنه لبلر جان وئرللر بر سر آب فرات
جاه و عزتدن گئچرلر جمله اَبنان و بنات
چاپدیرالّار سینه وین اوستونده اهل کوفه آت
زینبون قویماز ولی خاموش اولونسون نارعشق
.
.
کربلانین قانلی میدانینده غارت وار حسین
اهل بیت عصمته اوردا حقارت وار حسین
غم کشیده زینبه آخر اسارت وار حسین
صبرائدوب گردوزمه سیزویران اولارگلزارعشق
.
.
یا حسین عنوان ثارُاللَه سنه زیبنده دی
نور رحمت کربلادن عالمه تابنده دی
شیعه نین چشم امیدی زینبیلن سنده دی
بیر اشارت ایله سیز من ایلرم اظهار عشق
.
.
وئرمیشم صحرای غمده زینبی یاور سنه
جلوۀ زینبله وئردیم جلوۀ دیگر سنه
کربلا قاف اولسا،سن عنقا، باجون شهپر سنه
سن کی گئتدون زینب ایلرشامیده تکرارعشق
.
.
#گریز #مجلس_یزید
.
ای قلم یاز شامیده دلبند زهرا نیله دی؟
ثبت ائله اذهانیده عشقین مقالی بیله دی
نطق شیواسی ، یزیدی خوار و رسوا ایله دی
منطق زینبله گلگون فام اولوب رخسارعشق
.
.
شامیده بیر بزم شومی ایلیوب برپا یزید
مجلسه زینت وئروبدورشوکتی اولسون مزید
تختیده اجلاس ائدوب هردم دیور شعر قصید
منتظردور وارد اولسون بزمینه ابرار عشق
.
.
قیمتی اجناسیلن کاخ یزید الوان اولوب
حوریان خوش تراشه محفل جولان اولوب
خارجی سرکرده و اشرافیلر مهمان اولوب
واله ام کیم لـَرله ایستور رام اولا افسارعشق
.
.
شُرب مِی دن مجلس اهلی اکثراً مخموریدی
بیر طرفده بعضی سی غرق قمار و سوریدی
نیتی اما یزیدین آیری بیر منظوریدی
ایستیور اعلام اولونسون عالمه اخبارعشق
.
.
واردی اگنینده یزیدین آسمانی فام عبا
باشدا بیر عمّامه ، یا شیل رنگی رنگ اقربا
الده چوب خیزران وار ،دیلده شعر ایلور ادا
آز قالور تا هتک اولونسون پردۀ پندارعشق
.
.
ورد ائدور ابن زَبَـعْری دن بو بیتی ، شادمان
قد قتلنا القومَ مِن سا داتِـهم ؛ ورد زبان
وَ عَدلنا قتلَ بَـدرٍ فاعْتدَل ائتمیش بیان
انتقام بدری آلدوق خوار اولوب دربارعشق
.
.
باب دارالامریده هیها چالوبلار محمله
الغرض وارد اولوبلار قانلی باشلار محفله
داخل اولدی اوُل مُجلل قصره پوزقون قافله
هم گلوب بیمار غم هم قافله سالار عشق
.
.
قویدیلار راس شهنشاهی او دم تشت زره
بیر ایپک اورتوک چکوبلر قانیلن غلطان سره
گاه اوملعون ئوزشرابیندن توکور اول مجمره
قیل تصور گور نه احواله قالار زوّار عشق
.
.
تا گوروب زینب او حالی باشلادی آه و نوا
وای حسین وای قارداشیم سسلندی با صوت رسا
ای منا و مکه نین اوغلی عزیز مرتضیٰ
وای اولا یحیی کیمی تشته توکولدی ثارعشق
.
.
ای یزیدعیشین فنا اولسون نه بلوا چالمیسان؟
خاندان عصمتین صبر و قرارین آلمیسان
بی حیا،زهرانین اوغلون گورنه حاله سالمیسان
زینبین آغلارسسیلن آغلاشوب حضّار عشق
.
.
مجلسین احوالی ایلوبدور یزیدی ناگران
خیزرانی قوزادی اول بی حیای بدعنان
ووردی تا دندان شاه کربلادن خیزران
گوردیلرجوشلاندی زینب باشلادی گفتارعشق؛
.
.
ابتدا حمد و ثنا اولسون خدای عالمه
صاحب کون و مکان وعرش و فرش اعظمه
سونرا صلْواتیم اولا جدّیم رسول اکرمه
ایکّی عالمده منیم جدّیمدی پرچمدار عشق
.
.
ای یزیدای حقّی ناحق ایلین شوم و دغا
واردی قرآندا؛کیم ائتسه جانینی حَقه فدا
تا قیامت زنده دور ؛ خالق ائدر روزی عطا
تا ابد سرمست اولار دلدادۀ نکتار عشق
.
.
پست و ارذل سن حقیر و لا اُبالیّ و دنی
ایتدن اسگیک فرض ائدوللر آل پیغمبر سنی
من دانیشمازدیم بوابطالین دانیشدیردی منی
خنجر برّان ذکریم ایلیور اِنذار عشق
.
.
هامّوز آگه سیز کی بیز پیغمبره وابستیوخ
درگه خیرالوَراده جام عشقین مستیوخ
دوزدی کی جورو جفادن باغریقانوخ خستیوخ
قویماروق امّا یورولسون مرکب رهوارعشق
.
.
جدّیمیز حُکمین آلوب درگاه حقدن شکّی یوخ
وار لَدُّنی علمی ، آیات ِ علقدن شکّی یوخ
اشرف اولدی کائنات و ماخلقدن شکّی یوخ
شخص طاها نسبتیلن بیزده اولدوخ یارعشق
.
.
جاهلیت دوره سینده خلقی ارشاد ایله دی
پست و وحشی و عوام اعرابی مِنقاد ایله دی
لات و عُزّیٰ و هُبَل دن نفسی آزاد ایله دی
وئردی درس معنویت سرور احرار عشق
.
.
ایلیوب شَقّ القمر امّا سیز انکار ایله دیز
سِحره نسبت وئردیزحق اعجازینی خوارایله دیز
نابجا القابیلر طاهایه اظهار ایله دیز
ایسته دیزخاموش اولونسون شمع آتشبارعشق
.
.
وحی مُنزَل حق تعالی دن بیزه تنزیل اولوب
مصطفی دینی به نام مرتضی تکمیل اولوب
پایبوس اولموش بیزیم درگاهه جبرائیل اولوب
چون تانینمیش قدسیانه بابیمیز دربار عشق
.
.
ای یزید ای بیحیا هر سِیله وار بیر سدّیمیز
شیعه نین قلبینده کی عشق وصفاسر حدّیمیز
خیزران وورما او لبلردن ئوپوبدور جدّیمیز
قانلی لبلر نیزه باشینده ائدوب اقرار عشق
.
.
تنگ ائدوبسن افتخار کعبیه مأوانی سن
دوشدی سرگردان و حیران چوللره شاه زمن
پیکرین گونلر قباقینده قویوبسان بی کفن
آت چاپوبلار کوفیان تفسیر اولوب تاتارعشق
.
.
سن بولوردین قارداشیم عشق وصفا مأواسیدی
سینه سی سینادی لطف و رحمتین دریاسیدی
حُکمی سن یازدین،اگر،امضا شُریح امضاسیدی!
واجب الامرائتمیسن تا خواراولا معمار عشق
.
.
کوچه و بازاریده گزدیردین آل عصمتی
خوار و تحقیر ایلیوبسن بانیان رحمتی
ظاهرا محو ائتمیسن بیزلرده کی حیثیتی
باطنا اما تجلایه چاتوب انوار عشق
.
.
باغریقان ائتدین اگر چه شاه عشقین حالینی
سالمیسان حالدان حالا چولدن چوله اطفالینی
ظاهرا سن پوزمیسان قارداشیمین اجلالینی
زینبم من قویمارام اما یخیلسین دار عشق
.
.
هنده دورجدَّه ن سنون،سنده اونون سان زاده سی
هنده بیرایتدی سن اولدون بوینونون قلاده سی
سنده اجدادون کیمی خونریزاولوبسان،ساده سی؛
باش کسوب قان توکمیسن پامال اولوب ازهارعشق
.
.
نیزه ده درک ائتمه دیز قارداشیمین یاهولرین
کوفه دن شامه کیمی دٶیدٶزسوسوز آهولرین
ناقه لر اوستن آتوبسیز چوللره مه رولرین
سقط اولوب حتی بو یولدا غنچۀ نوبار عشق
.
.
ای یزید ای زادۀ فتنه ائوین اولسون خراب
ئوز کنیز و ئوز عیالاتین هامی پشت نقاب
لیک زهرا قیزلاری قالمیش اسیر و بی حجاب
گور روا دور بیله یانسون نارظلمه سار عشق
.
.
شیر حقـّم روبرویم روبه ِ بدذاتیلن
لعن ائدر عالم سیزی هم ذکر و هم نیـّاتیلن
شیعه لر اما بیزی یاد ایلیر صلْواتیلن
هم ئوزوم هم قارداشیم هم یاد اولاربیمارعشق
.
.
زینبم من جلوه گاه حقده نور امجدم
قارداشیم عباس تک راه ولاده سرمدم
فاتح خیبر آتامدی نور چشم احمدم
منطقیم قویماز پوزولسون تا ابد پرگار عشق
.
.
من سفیر انقلاب شاه بی سر زینبم
کربلا و کوفه و شامه مسخر زینبم
نطقیده صولتده بیر زهرای دیگر زینبم
جراتین واردی بو جمع ایچره ائله انکار عشق
.
.
سالک راه ولا باشدان مگر عشقین آتار؟
کشتی عزت مگر گرداب طوفانه باتار؟
پرچم ایمان مگر زینب اولان یرده یاتار؟
قارداشیم سلطان غمدی من ئوزوم سردارعشق
.
.
ای جماعت فاش اولوندی من کیمم کیم لردنم
حیدری قان وار رگیمده فاتح خیبردنم
اگمرم هند اوغلونا باش صُلب ِ پیغمبردنم
آیه تطهیره مصداقم بودور معیار عشق
.
.
ختم مطلب منتقم دور قادر الله ، قان آلار
منده گر گئتسم رقیـّم تا ابد بوردا قالار
عاقبت بیر گون سنی تخت ریاستدن سالار
فاش اولار عالملره ماهیت اسرار عشق
.
.
دوتدی یوز آخیرده زینب بارگاه ذوُالمَنه
سویله دی؛یارب وئروبسن عزت و شوکت منه
وئرمه مهلت بوندان آرتیق بو حیاسیز دشمنه
کربلانین انتقامین آل ، گوله گلزار عشق
.
.
ای«مُصَیـب»سانما زینب قلبی غمدن یاره دی
یا کی شام و کوفه ده حیران قالوب آواره دی
نام ِ زینب آند اولا اللهه درده چاره دی
سسله بیر ((یازینبا)) اتمام اولا اشعار عشق
.
.
#عالم_ذر #زینبیه_مدح
#صبح_ازل_فاش_اولاندا_عالمه_اسرار_عشق
#زینبیه_مصیبی_تبریزی #ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  یاتما مزار ایچره اویان حسین جان #اربعین_عدلی_تبریزی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی