شام غریبان امام حسین (ع)
.
.
محمد تقی میرزایی
.
.
ظلم آتشینه تا که حسین خیمه سی یاندی
گون باتدی غروب اولدی چخا آیدا اوتاندی
.
شیرین دلیله آلدی خبر نازلی رقیه
اکبر نیه گلمور بی بی جان وقت اذاندی
.
قویمازدی بابام که دوشه تأخیره نمازین
قلبیم داریخور وقت نمازینده یوباندی
.
قیزلاراو یانان خیمه ده آهسته سیزیلدیر
زینبده نگهبان دوروب اما نگراندی
.
عریان بدنیله یارالی شاه شهیدان
گوداله دوشوب داشلارین آلتیندا نهاندی
.
اوخ پارچالیان قلبی اولوب خانۀ دادار
کیم باخسا او قلبه گورر آللهی عیاندی
.
آئینه کیمین قلب حسینده گورونور هو
تردید ایلمه آینادا واللهی هماندی
.
باش خولی تنورینده قالوب کوللرین اؤسته
اللرده بیلکدن کسیلوب قانی رواندی
.
گلمیش آناسی فاطمه صحرای بلایه
غمدن بوکولوب قامتی با اینکه جواندی
.
اطرافین آلوب آسیه ومریم و لعیا
هر تک تکی ماتم زده و اشگ فشاندی
.
آغلوردیلا گوردیله گلور نازلی رقیه
قان ایچره یاتان شاهه او قیز روح رواندی
.
گلدوقجا باخور دور و بره گوزلری یاشلی
سسلور بابا سس ویر ایاقیم داشه توخاندی
.
ناگه او کسوک حلقیدن آواز اوجالوبدی
گل سینه مون اوسته سنیچون امن و اماندی
.
گلدون نیه بو وقته قزیم قانلی منایه
قالمازدون اویاق،یاری گیجه! بو نه زماندی
.
عرض ایتدی بابا قوی دیوم ایندی نیه گلدوم
دل دردینی ظاهر ایلین نطق و بیاندی
.
عَمَّم او قدر ناله ایدوبدور سسی باتمیش
سن ترک ایلیندن خیَمی گوز یاشی قاندی
.
لشگر توکولوب خیمه لری ایتدیله غارت
هر نه واریدی آل پیمبرده تالاندی
.
آخرده بیزی یغدیلا بیر خیمیه بابا
اوت ویردیلا ناله گویه یردن اوجالاندی
.
سالدیلا بیزی آت دوشینه قوؤدیلا چولده
چوللرده قاچان وقته ایاقلار یارالاندی
.
گوشواره دن اؤتری بیزه چوخ ویردیلا قمچی
زوریله آلان وقته قولاقلار پارالاندی
.
عمَّمده گلر ایندی سنه یاس دوتا بوردا
بیر گونده قوجاتدی اونی غم قدّی کماندی
.
یل اسدوگیجن قورخی دوشور جانیمه نیلوم
فکر ایلیورم شمر گلور یا که سناندی
.
مخیمده بو گون شمر ویروبدی منه سیلی
قورخوبدی گوزیم دل اودی بی تاب و تواندی
.
سال بوینوما قولّارووی آل گوگلومی بابا
دور منله گیدک خیمه یولون گوستر هایاندی
.
کول باشیمه توپراقلار اولوبدی سنه بستر
قان پرده چکوب سینوه دور بو نه مکاندی
.
گلدی او یره زینب مضطرده او ساعت
عرض ایتدی حسین باخ قیزووا حالی یاماندی
.
ئوپدی یوزونی هم گوزونی آلدی قوجاقه
گتدی او یانان خیمیه گوردیله فغاندی
.
«میرزائی» باخا شعروه گر زادۀ زهرا
پاداشوی تردید ایلمه باغ جناندی
.
.
#شام_غریبان #محمدتقی_میرزایی #حسینیه_شهادت #حسینیه #ترکی #زبدةالاشعار
نظر دهید