عشقوزی تحکیم ائدون زهرا گوزوندن دوشمییک #حسینیه_موسی_آقایی

در بیان عشق به حضرت اباعبدالله الحسین (ع)
.
#زبدةالاشعار
.
: @nohe_torki
.
موسی آقایی اردبیلی
.
عشقوزی تحکیم ائدون زهرا گوزوندن دوشمییک
قطره ده اولسوق اولاق دریا گوزوندن دوشمییک
.
آغ دئسه جاهل قرایه فوری تأیید ائتمییک
دهرده فرزانه و دانا گوزوندن دوشمییک
.
سالمیاق خلقت گلستانین صفادن خار تک
ساکنان گلشن اعلا گوزوندن دوشمییک
.
آرتیریب عزت جهاندا بو قرا پرچم بیزه
بیز گرک بیر ایش گوره ک طاها گوزوندن دوشمییک
.
مکنت دنیادن اوتری وئرمییک تن ذلّته
ذلّته تن ویرمیین مولا گوزوندن دوشمییک
.
هیئتی جاندان قاباق حفظ ایلییون الساعه تا
ناظران عالم بالا گوزوندن دوشمییک
.
بیز پریشان حسینوک جان نه لازمدور بیزه
جان ندی، یارِ شب اسرا گوزوندن دوشمییک
.
کربلاده قانه باتمیش پرچمی حفظ ایلروک
تا کی پرچمدار عاشورا گوزوندن دوشمییک
.
سنگر منشور عاشورادی هیئت لر بیزه
قویماروق بوش، زینب علیا گوزوندن دوشمییک
.
طعنه ویرما بی خبرسن عشق دن ای مدعی
بیزگرک اولسوکده کرمنا گوزوندن دوشمییک
.
خلق ائدیبلر امت عشقی پریشان اولماغا
ایسته ریک مجنون اولاق لیلا گوزوندن دوشمییک
.
محنت عشقیله سرشار ایلییون جان ساغرین
آغلییون صدیقه ی کبری گوزوندن دوشمییک
.
«ایهالاساقی ادرکاسأ وناولها» ویرون
ساقی عطشانِ بی پروا گوزوندن دوشمییک
.
دنیوی سلطانلارین دوشسوک گوزندن عیبی یوخ
سعی ائدک شاهنشه عُقبا گوزوندن دوشمییک
.
سنده «موسی» سوز یازاندا شوره گل مستانه یاز
«انورِ» شوریده و شیدا گوزوندن دوشمییک
.
«منزوی» تک حقی گیزلتمه سوزی بی پرده یاز
تا حسینون هر ایکی دنیا گوزوندن دوشمییک
.
.
بیز مریض درد عشقوک ناله دیر درمانیمیز
عمریمیز تا وار حسیندی سرور و سلطانیمیز
.
.
نیلورم جانی فدای جان ِ جانان اولماسا
جانِ عاشقده نه ارزش واردی قربان اولماسا
.
قلبیمین هر بند بندی یاحسین ذکر ائتمسه
پارچا پارچا پارچالانسین گر پریشان اولماسا
.
عشق پاکون سرزمین وحی ائدوبدور سینمی
ساغر می تک جالانسین قلبیمی، قان اولماسا
.
سوز اورکلرده اثر قویماز اورکدن چیخماسا
شعرِ شیرین یازماق اولماز دیده، گریان اولماسا
.
کلمه کلمه نینوا آهنگی افکاریمده وار
نظمه گلمز سیل اشکیم دُرّ غلطان اولماسا
.
گوزیاشیملان دستماز آلدیم اودور سوز یازماقا
گوزده نور اولماز غمونده اشک ریزان اولماسا
.
وورموشام چنگ توسل دامن پُر فیضووه
دلپسند اولماز سوزوم لطفون کماکان اولماسا
.
دفتر اوسته واژه لر رقصان، قلم حیرتده دی
طوطی طبعیم دوشر دیلدن غزلخوان اولماسا
.
عقلدن بیگانه اولدوم ساقیا پیمانه وئر
گورمز آسایش اگر جان ملکی ویران اولماسا
.
روحوم احساس ایلییور امداد ائدن واردیر منه
درک ائدنمز کیمسه بو احوالی، حیران اولماسا
.
کربلا هجرینده دیلدن دوشموشم دیوانه ام
وصل قدرین بیلمز عاشق غرق هجران اولماسا
.
دالدالاندیم منده مین امیدیلن درگاهووه
سایووی سال باشیما عشقیمده نقصان اولماسا
.
.
خیل عشاقه جهان ماتم سرادیر یا حسین
هر گون عاشورادی هر یئر کربلادیر یاحسین
.
.
بیر پریشان عاشقم عشقونده حیران اولموشام
نیمه ی شبدن قلم الده غزلخوان اولموشام
.
بیر کسیم یوخدور منی نامرده محتاج ایلمه
دردمندم مستحق لطف و احسان اولموشام
.
هر کیمم اوستومده آد وار نوکرم درباریوه
نی کیمین نالانِ طفلانِ هراسان اولموشام
.
ای سلیمان آستانوندن شرافت تاپمیشام
مور، تک مشمول الطافِ فراوان اولموشام
.
نکته نکته مکتبوندن رمز و راز اویرنمیشم
یازمیشام جاه و جلالوندن سخندان اولموشام
.
بیر قارا افسر باشیمدا وار کی باش دان باش گلر
بیر گدایم بو قارا تاجیله سلطان اولموشام
.
هر ایکی دنیاده بو قاره جلالیمدور منیم
هاردا سندن آد گلیبدور اوردا نالان اولموشام
.
کربلا خمخانه سیندن باده لر نوش ائتمیشم
حمدالله همنشینِ می پرستان اولموشام
.
مستِ مستم بیلمیرم هیچ دین ندی ایمان ندی
یاحسین سسلنمیشم بیر یول مسلمان اولموشام
.
ای جدا اوسته تلاوت ایلیین کهف آیه سین
عشقووه دیل باغلیاندان، اهل ایمان اولموشام
.
کربلا دوزدور که قسمت اولمیوب بیر یول گورم
قدرت عشقیله مین یول اوردا مهمان اولموشام
.
های سالیب قلبیمده هل من ناصرُ ینصر سسی
بیر کمکسیز پادشاهه دیده گریان اولموشام
.
حرمتیم گر وار خلایق ایچره سندندیر حسین
من سنه سائل اولان گوندن سلیمان اولموشام
.
شمع ماتم گورموشم هر یئرده شهپر چالمیشام
یانمیشام پروانه لر مثلی پریشان اولموشام
.
گر گوناهیم چوخدا اولسا سن کرم دریاسی سن
دوت الیمدن غرق موجِ بحرِ عصیان اولوموشام
.
واردی بیر داغدان آغیر دردیم ولی فاش ائتمرم
عومردور بو دردیلن سر درگریبان اولموشام
.
اوخ سوکن قلبونده تا واردیر ابالفضلین داغی
من نئجه عرض ایلییم محتاج درمان اولموشام
.
حنجر عطشانووه جانیم نثار اولسون حسین
دائمأ عشقونده قلبیم بی قرار اولسون حسین
.
.
#حسینیه_موسی_آقایی
#حسینیه_مدح #ورود_محرم
#عشقوزی_تحکیم_ائدون_زهرا_گوزوندن_دوشمییک
#ترکی
.
#زبدةالاشعار
.
: @nohe_torki