شهادت امام حسین (ع)
.
.
✍️ #زبدةالاشعار ✍️
.
🆔: @nohe_torki
.
مرحوم نادری میانجی
.
دوشوب سس کاینات ایچره امامین امت ئولدوردی
پیمبر اوغلون عالمده مسلمانه دولت ئولدوردی
.
.
رجال کشوری یکسر حجاز و شامده هر آن
حسینون قتلینه نقشه چکوردی قوم بی ایمان
یتیشدی فاجر و فاسق حسینی ایتدیلر مهمان
بلی زهرا عزیزین کوفه ده اول دعوت ئولدوردی
.
.
حسیئون قتلینه اولدی مصمم جمله فاسق لر
منابرده محافلده ایدوب تبلیغ ناطق لر
حسینه «مفسد فی الأرض» آد قویدی منافق لر
او گون پیغمبرین اوغلون همین بو تهمت ئولدوردی
.
.
یازوبلار عاص و سفیان زاده لر نامه ولایاته
مدینه، مکه و کوفه ، یمنله ، مصر و شاماته
خلایق ایلیوب باور ایناندی بو خرافاته
علینون نامدار اوغلون بو گیزلین وحدت ئولدوردی
.
.
زیادین نانجیب اوغلی اولوب فرمانده اسلام
ایده تام اختیاریله همین برماهه سین اتمام
قلوب رسماً زیاد اوغلی حسینون قتله اقدام
مسلمانلار امامین خوار ایدوب بی حرمت ئولدوردی
.
.
آچیلدی باب بیت المال سوز شهر ایچره آدلاندی
قزللار آش ایچنده کوچه و بازاره پایلاندی
بصیرت گوزلری کور اولدی أوندا دین ایاقلاندی
دولی قلخان قزل اولدی عمومه قسمت ئولدوردی
.
.
او گونده پور مرجانه یزیده اولدی خوش خدمت
بویوک عالملری ایتدی حضور نحسینه دعوت
تشریح قاضیه ویردی جواهر سیم و زر رشوت
امام عصری عاشورا گونی اول رشوت ئولدوردی
.
.
شریحون ویردیگی فتوا اولوب هر ملته اعلان
حسین قانین مباح ایتدی کسوک باش نیزه ده ویلان
اولونسون وار یوخی غارت اسیر اولادی سر گردان
حسینی شمر یوخ، بلکه همین بو علت ئولدوردی
.
.
رضایت ویردی بو امره اولان رأس وزارتده
رجال و سرشناس و دیپلمات امر سیاستده
حکومت وعده سی تأثیر ایدوب اهل ریاستده
بو قتله ظاهر و باطن ایدوبلر شرکت ئولدوردی
.
.
او گون دنیای اسلامی بسیج ایتمیشدی سفیانی
بساط جور و استبداد تاریک ایتدی دنیانی
بودور علت آخوب صحرالره ناحق حسین قانی
ویروبلر سیم و زر خلقه حسینی ثروت ئولدوردی
.
.
نصارا گبر و ترسالر بو قتله ایتمدی جرئت
آدی اسلام اولان کسلر بو امره ایلدی سبقت
سوسوز لب تشنه بیر باشه ورولدی اون ایکی ضربت
عوام الناسی فرض ایلیر حسینی ضربت ئولدوردی
.
.
آچوب صحنه سیاستده امیر انس جان اوغلی
ویروب قانلی نمایشلر امیرالمؤمنان اوغلی
سنه جانلار فدا اولسون علینون قهرمان اوغلی
سنون تک عالی انسانی او بی شخصیت ئولدوردی
.
.
ملایکه صف چکوب دورموش او گون عرشین ایاقینده
حسین مظلوم و بی لشگر علی اصغر قوجاقینده
ئوزی عطشان بالا عطشان دوروب لشگر قباقینده
او طفلی قطره سو اوسته او بی حیثیت ئولدوردی
.
.
عیالی شامه یولّاندی گوروب خندان عدو اولدى
یزیدیله خانم زینب او گونده روبرو اولدى
اسیر عورت ستمگر شه بویوک بیر گفتگو اولدی
خانم زینب گلوب نطقه یزیدی صحبت ئولدوردی
.
.
عدالت جبهه سیندن دونمز انسان اهل عدل اولسا
اصالتدن کنار اولماز او کس ذاتینده اصل اولسا
جنایتکار اولار دائم او کی اصلنده جهل اولسا
وصی مصطفی اوغلون همان کیفیّت ئولدوردی
.
.
جگر خواره بالاسیندن امام مسلمین اولماز
بله جبّار اولان شهدن امیرالمومنین اولماز
سنون تک فاسق و فاجر امام المتقین اولماز
حسینی زور و زر ، قوم دنی بد فطرت ئولدوردی
.
.
گوز آچ ای نادری عبرت گوتور دنیای عبرتدن
صف آرالق زمانی آل کومک چشم بصیرتدن
دفاع ایت حقّدن دائم اوزاقلاشما حقیقت دن
حسینی جیفۀ دنیا ملوّن ملت ئولدوردی
.
.
.
.
.
#حسینیه_نادری
#حسینیه_شهادت
#دوشوب_سس_کاینات_ایچره_امامین_امت_ئولدوردی
#ترکی
.
✍️ #زبدةالاشعار ✍️
.
🆔: @nohe_torki
نظر دهید