حالات حضرت زهرا (س)
شهادت و دفن
..
..
سیفی اردبیلی
..
..
عصمته اسوه بیلر اهل خبر زهرانی
چشم دل صدقیله باز اولسا گورر زهرانی
..
حکم لولاکیله علت یارادوب خلقتنه
صانع قادر و خلّاق سُوَر زهرانی
..
بیت معمورۀ توحیده خداوند کریم
سبب عزّت ایدوب پاک سیر زهرانی
..
شجر عمر گرانقدررسول اللهه
حیّ دادار ویروب عالی ثمر زهرانی
..
قطره ام من نجه توصیف ایلیوم دریادن
کیمدی مدح ایلیه شأنیجه مگر زهرانی
..
ایتمه ایراد منه متن تواریخی اوخی
قیل یقین وصف ایده هیهات بشر زهرانی
..
پایۀ عفّتینه بسدی بو بیر قول نبی
گورمدی بیر گئجه بی پرده قمر زهرانی
..
کعبه نون اوغلی علی تاپمازیدی هم کفوین
دست قهار یاراتمیدی اگر زهرانی
..
حضرت ختم نبی بسکه چوخ ایستردی اونی
گورمسیدی اگر ایتمزدی سفر زهرانی
..
گل کیمی باغرینا باسدوقجا ئوپردی گوزینی
جان کیمی ساخلاردی مدّ نظر زهرانی
..
واژه تاپمازدی دیه وصفینه طاها ئوزیده
ننه سسلردی اودور عالیه فر زهرانی
..
حُرمت فاطمه دن اُمّته ایلردی بیان
ذکر ایدردی ئوزینه بند جگر زهرانی
..
میوۀ جاندی دیردی منه بو سؤیملی قز
حق ویروب نخلۀ اعزازیمه بر زهرانی
..
کیم اونی اینجیده حتماً منى ایذایه سالوب
دینه خائندی کیم آغلاتسا گُلر زهرانی
..
یا نبی گل نجه گور عشق ریاستدن أوتور
کوچه ده سیلی وروب یخدی عمر زهرانی
..
..
..
کوچۀ تنگیده زهرا یخلوب با دل زار
باخدی اطرافه ولی تاپمادی بیر مونس و یار
..
..
..
ختم مرسل قیزی عصمت ایوینون مبناسی
دینه خاطر ابداً ایتمدی جان پرواسی
..
دیزی تیترردی اگرچه ایاقا دوردی خانم
گلدی ئوز منزلینه اون بیر امام اُمّاسی
..
ایلدی تکیه او یانمش قاپیا آهسته
داخی یول گتمگه گویا یوخیدی یاراسی
..
اضطرابیله غرض ایتدی خانم دق الباب
آچدی فوراً قاپونی کرب و بلا زهراسی
..
گوردی زهرا وورولان قوش کیمی افتاده گلوب
سینه ده تنگه دوشوبدور نفس گیراسی
..
دیدی صیاد یوران جیرانا بنذورسن آنا
یتیشوب اولما سنه اوچیلارون ایذاسی
..
یاپشوب زینب الین داخل بیت اولدی خانم
قاپی آغزندا اوتوردی او وفا دریاسی
..
بالا هی صاق صولا گئچدی ننه گزلتدی یوزین
آشکار اولمیا تا محنتنون امّاسی
..
زینب اصرار ایلدی فاطمه ده گلدی دیله
دیدی بیل دردیمی ای غملریمون همتاسی
..
من فدک باغینون آلدیم سندین اعدادن
ثانی کسدی یولومی کمدی دیدی امضاسی
..
سَندی مندن عتابیله آلوب پاره له دی
دوغرادی شیشۀ امیدی بلا الماسی
..
حق دیدیم وردی یوزومدن بیر آغر سیلی قیزیم
رعشه دوتدی بو یورولمش ننوون اعضاسی
..
من یخلدیم یره دشمن هدف شومه چاتوب
بسکه ایتمشدی جرى کینه او شرّ النّاسى
..
یوزومی گیزلدورم سندن اودور نازلی بالام
خوشدی سربسته قالا غملریمون طغراسی
..
سنده جهد ایله هله سیلی سوزین فاش ایلمه
بیلسه غیرتدن ئولر شیعه لرون مولاسی
..
..
..
فرض اولا غسلیم او ساعتده که مظلوم آتوا
ایدرم گزلین اولان دردیمی معلوم آتوا
..
..
..
دولانوب عقربۀ ساعت دنیای دنی
قوش کیمی اوؤلادی صیّاد اجل فاطمه نی
..
دوقوز ایلّیک گلینون غسلینه قصد ایتدى على
دیلدن افلاکه بلند اولدی شرار مُحَنی
..
فاطمه میّتینی دوره له دی دورد بالاسی
توکدی اسماء سوئی حیدر یودی یورقون بدنی
..
ناگهان دوشدی امامون گوزی زهرا یوزینه
آغ گُلون یاپراقنی گوردی علی یاسمنی
..
بیلدی طاها چوخ ئوپن گل یاناقا سیلی دگوب
دیدی جان فاطمه جان کیم بو حالا سالدی سنی
..
نجه قان آغلامیوم ایندی بو گزلین یاروا
الى سنسون سنی بو درده سالوب ئولدورنی
..
نه زمان یاره دگوب سینوه من بیلممشم
نه مصیبت کشیمیش زینبمون صود ویره نی
..
کاش ئولیدوم سنی بو حالیله گورمیدی گوزوم
مین ئولومدور منیچون یاره وی گوردوم علنی
..
آند اولا روحوه شرمنده لیگیمدن یانورام
حیف اولا باغلیدى قوللاریمه ایمان رسنی
..
دوگولوبسن منه خاطر بیلورم فاطمه جان
سنی بو دورد بالوون جانی حلال ایله منی
..
آز قالور کاسۀ صبریم داشا باخدوقجا سنه
یاره لی سینووه قوی پرده ایدوم آغ کفنی
..
سنده مظلومۀ دوران سان علیده مظلوم
بیزی آماج ایلیوب قهرینه چرخون فتنی
..
عیبى یوخ قوى سنى من قبره گئجیلن آپاروم
خواب غفلت بوروسون دیدۀ اهل وطنی
..
ئولدوروبلر سنی اللرده اگر دینمه میشم
نگران اولما خانم دینمیه نون وار دیننی
..
گر یاتوب یثربون اهلی ولی شاهددی خدا
یارالی قبره گیدور شیر خدا شیرزنی
..
غُسل و کفنین قوتاروب فاطمه نون شیر خدا
حرکت ویردیله تابوته غرض دوشدی یولا
..
..
..
ننه آیریلدی ایویندن بالالار ایتدی فغان
زلفین آلدی الینه وای دیدی زینب اوجادان
..
..
..
بیربیرین باغرینا باسدی او پریشان بالالار
آیریلق دردی ایدوب گوزلرینون اشکینی قان
..
بیری اولمادی تسلّی ویره دل داغلی لارا
آخ گوروم برهم اولا گردش بیداد زمان
..
باتدی حیدر ایوینون اولدوزی دان اولدوزی تک
باغبان قبره گیدوب گُللری قالدی یاری جان
..
یتوروب مقصده تابوتی علی نیمۀ شب
یورولان فاطمیه قازدی ئوزی قبر نهان
..
ایستدی قبرینه قویسون یارالی طاووسی
ناگهان قبرون ایچیندن ایکی ال اولدی عیان
..
سس گلوب یا علی ویر سینمه پرپر گلومی
دردی ایتمشدی بتولون منی چوخدان نگران
..
ساخلادون یاخچی امانت ایوون آباد علی
من سنه فاطمه نی یاره لی ویرمیشدیم هاچان؟
..
بیلورم سنده قصور اولمیوب ایش ثانیده دور
گل مثالی بالامی ایلدی آماج خزان
..
ئوز ننمدنده چوخ ایستردیم على من بو قیزی
یوزین ئوپدوکجه تاپاردی دوداقیم بوی جنان
..
من ئوپن گل یوزی افسوس گوگرمش گتدون
ویر گلی گُل اکنه ایلمه آرتوق هیجان
..
قوی قرانلوق قفسه بلبلی باغلا قاپوسین
من دیوم لایلاینى سن ئوزون اول فاتحه خوان
..
اوخشا مظلوم على مظلومه ئولن زهرانی
باشلا بلبل یرینه سوگلومه شور و فغان
..
سن اوخی غصّه لرین منده دیوم یات بالا یات
دینجلوبسن غم ایّامیدن ای تازه جوان
..
حیف اولا قبر ایوینه قدّی بوکولمش گلدون
لایلای ای غملر الیندن یورولوب تز قوجالان
..
یاز تسلی بو سوزی «سیفی» پیمبر دیلینه
لعن اولا فاطمه نون منکرینه قاتلینه
..
..
..
#فاطمیه #سیفی_اردبیلی #فاطمیه_شهادت #ترکی #زبدةالاشعار
نظر دهید