اشاره به عظمت و شهادت حضرت زهرا (س)
..
..
حاج غلامرضا عینی فرد زنجانی
..
..
عصارۀ شرف و معنی حیا زهرا
ملکۀ دو سرا عبد کبریا زهرا
..
آتاسی ختم رسل افتخار نسل بشر
یگانه دخت گرانقدر مصطفا زهرا
..
وجودی نوریدی ایجاد خلقته علّت
گوروندی کسوت آدمده منتها زهرا
..
خدیجه دور آناسی عاشق رسول الله
گلوبدو بو آنادان مفخر النسا زهرا
..
گول ایتدی ثروتینی سینۀ رسوله وروب
مقابلینده ایدوب حق اونا عطا زهرا
..
مجسّم ادب و چشمۀ فضیلتدور
خداشناس خانملاره مقتدا زهرا
..
نه تک خانملارا مردان عالمه مفخر
اولوب حبیبۀ خلّاق لایُرا زهرا
..
بویوردی احمد مرسل گورنده زهرانی
محبّتیله فداکِ ابوک یازهرا
..
تبسّم ایلسه نقش تبسّمی جنّت
جهیم شعله چکر گر آجقلانا زهرا
..
اولوبدی قهری اونون قهر قاهره پیوند
خدا رضادی هر ایشده اولا رضا زهرا
..
بو خامه لرده توان یوخ یازا جلالتینی
گرکدی لوحده نقش قلم اولا زهرا
..
قلوب پاک ائمّه اولان زمان محزون
سرشگ چشمیله سسلردیلر آنا زهرا
..
امام باقری راوی گوروبدور اشگیله
دیلینده ذکر ایلیوب حجّة خدا زهرا
..
سوروشدی علّتین حضرت جواب ویردی دیدی
حالیم یاماندی ویره سسلورم شفا زهرا
..
ایدوبدی آل رسولی مطهّر آیۀ تطهیر
اولوبدی نقطۀ ترکیب انّما زهرا
..
رسول عالمیان گچمزیدی بسترینه
آیق قالاردی او وقته کیمی یاتا زهرا
..
یواش گلردی قویاردی یوزون اونون یوزونه
توکردی اشکینی آرام اویانمیا زهرا
..
که یعنی سیلی دگن صورتی اؤپردی رسول
بُلردی سیلی گورر ثانیدن صورا زهرا
..
آنا کیمی اونا لای لای دیردی چوخ گجه لر
اؤپردی آنّینی سسلردی لای لا زهرا
..
بُلوردی قز آناسیز قالسا قول قانادی سنار
همین بلایه گوروب توش اولوب آتا زهرا
..
گھی آلاردی اونی سینیه یاتیرداردی
اصیلّشوبدی بو طرزیله مه لقا زهرا
..
عوض چخوبدی بو دفعه خانم آنالق ایدیب
اولوبدى أمّ ابیها او باوفا زهرا
..
نجه محبّت ایدر اوز بالاسینا آنالار
او نوعی خدمت ایدوبدور آتاسینا زهرا
..
اونا رسول خدا احترام ساخلاردی
قیام ایدردی گلنده او دلربا زهرا
..
او نحویله که آنایه بالا محبّت ایدر
آتاسی احمده هم قزدی هم آنا زهرا
..
اوچومجی معنیسی اما بئله گلور نظره
اولوبدی امّ ابیها داخی ندا زهرا
..
او دم که ختم رُسُل گوگلره ایدوب معراج
جهانه گلمشیدی دخت مصطفا زهرا
..
او حدده گئتدی که روح القُدُس گیدنموردی
او لحظه بلدی نه دور کنز پربها زهرا
..
اول ایشیتدی که لولاک سس گلوبدی رسول
جهانه گلمزیدون گر اولیدی لا زهرا
..
یاراتمشام سنه خاطر تمام افلاکی
سنیده خلق ایلدوم تا که خلق اولا زهرا
..
اودور که أمّ ابیها بتول اولوب محسوب
اولوبدی مادر خلقت او کیمیا زهرا
..
آدینی فاطمه سسلندی حضرت طه
که یعنی شیعه سین اوددان ایدر رها زهرا
..
او گونکه محشر اولار وحشته دوشر انسان
دوروب گورولَّه بهشت و جهیم آرا زهرا
..
یازالّا آنّینا هر کس هایانا گتمه لیدور
باخار جبینلره شافع جزا زهرا
..
گورر محبّی اولوب اودّا یانماقا محکوم
شفاعت ایلر اونی عفو ایدر خدا زهرا
..
مقام فاطمه دنیاده اولمادی روشن
قالوب قیامته گون تک سالا ضیا زهرا
..
بیر آدی هانیه یعنی چوخ ایستر همسرینی
على یولوندا ایدوب جانینی فدا زهرا
..
او گون که گئتدی جهاندان پیمبر رحمت
دولاندی باشینه دنیا ایدوب نوا زهرا
..
ایدوبله شیر خدا مرتضانی خانه نشین
قوجاخلیوبدی گوروب دیزلرین آقا، زهرا
..
آتا ئولومی اگرچه ایدوب اونی دلتنگ
ولیک گوردی او گون آیری ابتلا زهرا
..
فدک مصادره اولدی سارالدیلار حسنین
توکوبدی گوز یاشینی شاه لافتا زهرا
..
وروبلا اود ملکوتی قاپی یانوب حتى
قاپی دالندا گوروب سینه دن یارا زهرا
..
گونون حرارتی اود شعله سی دولاشدی گوله
گولی آتالار اوت ایچره؟ اودا اولا؟ زهرا
..
مقاومت ایلدی قورخمادی یانار اوددان
هراس ایدردی باشندان دوشه عبا زهرا
..
دگنده اود قزیشار یاندیرار یقین آهن
یاروبدی سینه نی مسمار؟ یاندی یا؟ زهرا
..
خانم ممانعت ایلور ایوه توکولمیه لر
بلور على قولونی باغلار اشقیا زهرا
..
لگد دگوب قاپی دیواره چالدی فاطمه نی
سسی اوجالدی دیدی وا محمّدا زهرا
..
علینی سسلمه دی بلدی دستگیر اولاجاق
خطر گوروب ایلدی فضه نی صدا زهرا
..
حزین سسیله دیدی فضه گل بالام ئولدی
دوشوب اوز اوسته یره فخر ماسوا زهرا
..
بو سسده چخدی علی تا گوره ایشیکده نه وار
گوروب خسوفه دوشوب نیّر هدا زهرا
..
چکوبدی نعره دوتوب ثانینون گریبانین
دیدی روادی اولا نقش در ثَرا زهرا؟
..
هوایه قوزادی مرحب کیمی او نامردی
دیدی خیال ایلمه قالدی بی قوا زهرا
..
مدینه نی قانا چالخاردوم ای عُمر افسوس
اَل آچمارام بلوری دردیمی خدا زهرا
..
صلاح دینه پیمبر دیدی ال آچما على
سنا اگرچه در کنز مصطفی زهرا
..
ایشیدجاقین بو سوزی گلدی جرأته روبه
سالوبلا شیری کمنده باخا باخا زهرا
..
چکوبدی مسجده بیعت علیدن آلسونلار
گوروبدی منظره نی اولدی غمفزا زهرا
..
ال آتدی دوتدی علی دامنین چکوب فریاد
که قویمارام گیده مصداق هَلْ أَتى زهرا
..
علینی آلماقا اوچ یوز نفر قالوب عاجز
گوروبله اولمور علیدن او دم جدا زهرا
..
دوروبدی سدّ کیمی تترمور على یردن
بلوبله اولمور علیدن اوزی رها زهرا
..
او کشمکشده وروب قنفذ لعین ضربت
قولی گویردی ایدوب همسرین صدا زهرا
..
آلوبلا دوره سینی اهل بیت پیغمبر
دیولَّه آچ گوزون ای روح ماسوا زهرا
..
توکولدی گوزیاشی رخسارینه گلاب کیمی
آچوبدی گوزلرینی حامی ولا زهرا
..
باخوب اویان بویانا سسلنوب عم اوغلوم هانی؟
علینی آختاروب ایلوردی آه و وا زهرا
..
ئوپوبدى اللرینی فضه عرض ایدوبدی خانم
آپاردی مسجده اشرار گوئیا زهرا
..
دوروب ایاقه قاچوب مسجده ئورک رنجور
که بلکه شیری قفسدن ایده رها زهرا
..
آلوبدی دوره سینی بانوان پاک سرشت
وسطده اگلشوب اول قامتی رسا زهرا
..
دولی گوزیله او محراب و منبره باخدی
ئورکلنوب دیدی ایوای بابا، بابا زهرا
..
شروع ایدوبدی وقاریله صحبت ایلمگه
چکوبله پرده یره اگلشوبدی تا زهرا
..
خانمون حالینه آغلاشدی مرد و زن یکسر
چکنده آه دوشوب لرزیه سما زهرا
..
سلاح نطقیله بوبکری ایلدی محکوم
گوروب دفاع ایده حقدن وار اقتضا زهرا
..
خلافته دیدی بوبکر غاصب اولدون سن
سنون الوندن ایدر شکوه اتقیا زهرا
..
بابام منی سیزه تاپشوردی بیرده قرآنی
دیردی نور دو عینیمدی بارها زهرا
..
جهان عزالیدی سیزلر ریاست آختاریسوز
عزا بساطی ایوینده ایدوب بپا زهرا
..
قاپومی گونده اوپوب احترام ایلمگه
بودور یولی؟ گوره درگاه اودلانا زهرا
..
باشیم قراسینی گوردوز قرا گونه سالاسوز؟
سیزه نه ایلیوب ای فرقۀ دغا زهرا
..
علیدن ال گوتورون یوخسا باشیمی آچارام
بیر آهیلن ایلیر عالمی فنازهرا
..
گوروبدی هلهله و های هو یاتوبدی فقط
ولیک سوزلرینه اولمور اعتنا
..
دیدی علیدی ایدوب جنگلرده سینه سپر
دانشموری بلیسوز حرف نابجا زهرا
..
علیدی مظهر آیات ذات بی همتا
فقط علینی بلور خلقه پیشوا زهرا
..
على وصىّ بلا فصل ختم مرسلدور
دوزنمور ایلیه سوز ظلم برملا زهرا
..
علینی بوشلاماساز جانوزه شرر سالام
ال آتدی معجره با حالت بکا زهرا
..
ایدوبدی مسجدین اوندا ستونلاری لرزه
دیدی خیال ایدیسوز ایلر التجا زهرا
..
سیزه من امر ایدورم ال چکون عم اوغلومدان
گیدر ایوینده تاپار کنج انزوا زهرا
..
علیده گوردی خانمدا او غملی اوضاعی
بلوب که عالمی ایلر بوتون فنا زهرا
..
اشاره ایلدی سلمانه دست بسته امیر
دینن عم اوغلوا خاطر سن آغلاما زهرا
..
اماندی ایلمه نفرین صبره محکوم اول
علینون امرین ایشیتدی او باوفا زهرا
..
گوتوردی اللرینی معجریندن آچمادی باش
امامین امرینه ویردی عجب بها زهرا
..
دوشنده مسجده لرزه هامی ایدوب وحشت
علینی بوشلادی حاکم باش آچمیا زهرا
..
گلوبله منزله اطرافینی آلوب بالالار
گوروبله سالم علینی ایدوب ثنا زهرا
..
دوشوبدی بستره گیت گل کسیلدی منزلدن
چالشدی دردیله هر صبح و هر مسا زهرا
..
گلوبدی بیرگون علی گوردی گون باتان چاقی
یاتوبدی قبلیه ساری او باحیا زهرا
..
اوتوردی آلدی دیز اوسته باشین ملالیله
دانشدیرا اونی سسلندی مرتضی زهرا
..
اماندی آچ گوزیوی گوزلرین فداسی علی
غبار غم آلورى باشیما قضا، زهرا
..
سنی قسم ویرورم حقیمه دانش منلن
ئورگیم اولما رضا شیشه تک سنا زهرا
..
سنی گورنده غم و محنتیم چخار یاددان
علینی قویما بو حالتده تک قالا زهرا
..
انیس و همدمیم اولدون بو ایوده دوقوز ایل
سنیله اولدی ایویم جنّةُ العُلى زهرا
..
جهاندا گورمگه بیر دفعه لیلة القدرى
خدادن ایستر هامی ایلسه دعا زهرا
..
علی بو لیلۀ قدری اله گتورموشدی
ولیک گئتدی الیندن که حیف اولا زهرا
..
سبب ندور گونی گوندن بله ضعیف اولدون
ئورک سوزون دیمدون ایلدون خفا زهرا
..
سیزه ئورک سوزون اظهار ایدنده «عینی فرد»
چکر خجالت اوزی سسلننده یا زهرا
..
..
..
#فاطمیه #عینی_فرد #فاطمیه_شهادت #فاطمیه_مدح #ترکی #زبدةالاشعار
نظر دهید