اربعین
زبانحال حضرت زینب (س) خطاب به سرزمین کربلا
.
.
مرحوم سعدی زمان
.
.
عطریوه قربان اولوم ای دشت ایمن کربلا
ویرمرم عطر بهشته عطریوی من کربلا
.
.
گوشوار عرش حق سنده یاتوبدور بی کفن
عرشدن افضلدی بو ششگوشه مدفن کربلا
.
.
سنده کی عطر حسینه رشگ ایدر چین و خطا
تربتون تشبیه ایدم مُشکه اولور سوزده خطا
روح پرور ، جان فزا، عطر حسینه جان فدا
قتلگاهوندن گلور عطر پیمبر برملا
باغ جنّتدن مُعطّرسن اودور سن کربلا
.
.
قرمزی یاقوته بنزر قانه باتمیش تربتون
عقل صرّافی بُلنمز عقله گلمز قیمتون
لَوحَش الله چون حسینیمدور سنون هم صحبتون
حقّی وار عرش خدانین گر آپارسا حسرتون
عرش فخر ایلر حسین ایتسه مزیّن کربلا
.
.
هئچ بُلورسن توپراقوندا هانسی بیر پیکر یاتوب؟
الله الله جان زهرا روح پیغمبر یاتوب
تشنه دل ، آرام جانِ ساقیِ کوثر یاتوب
گَنج خلقتدن گران قیمتلی بیر گوهر یاتوب
بیله بیر گوهر گوروبدور هانسی مخزن کربلا
.
.
سنده امّت سیندیروب آئینۀ پیغمبری
سوز غلط اولماز دئسم مرآت صنع داوری
قطعه قطعه دوغریوب جسم علیّ اکبری
توکدی توپراقه قیزیل گول تک او خندان پرپری
یغدی اوندان باغبانی بیرجه دامن کربلا
.
.
سنده سیندی بیر کمکسیز پادشاهین لشگری
اولدی اسلامه بو سینماق فتح و نصرت سنگری
تا جهان وار ، لشگر اسلامه کفر اولماز جری
قویمادی تیره بولوتدا مهر شرع انوری
روشن ائتدی عالمی بو مهر روشن کربلا
.
.
سنده بیر پرچم نگون اشرار بی دین ایلدی
صفحۀ تاریخ اهل شامی ننگین ایلدی
پرچمین قانیله پرچمدار رنگین ایلدی
اهتزاز پرچم اسلامی تضمین ایلدی
نفسیدور تضمینینه ضامن معیّن کربلا
.
.
سنده یخدی بیر علمداری یره اهل جفا
پیکری باشدان ایاقه بیر جهان مهر و وفا
گوئیا یرده یخلمیش قول قانادسیز بیر هما
آچدیروب پر پیکرینده بسکه پیکان خطا
ناوک پیکان اولوب اگنینده جوشن کربلا
.
.
وحی مُنزَلدور کلام لم یزل اعجازی وار
نصّ قرآندور که سربازین بیوک اعزازی وار
جان بکف سرباز دینون رتبۀ ممتازی وار
هانسی شاهین آلتی آیلیق سود امر سربازی وار
سود امر سربازی بیر تک سن گوروبسن کربلا
.
.
سنده پوزدی کوفیان بیر شاه تجهیزاتینی
بو پوزولماق ساخلادی اسلام تشکیلاتینی
ایلدی تحکیم قرآن مبین آیاتینی
سنده قان دوتدی حسینون حق نما مرآتینی
بو قانی بیر گون سیلر ، الله ذوالمن کربلا
.
.
قارداشیم سنده ایله هنگامه برپا ایلدی
حقّ و باطل یوللارین گون تک هویدا ایلدی
جان وئروب دینون یولوندا دینی احیا ایلدی
آلِ سفیانی ایکی دنیاده رسوا ایلدی
هندین اولادین دوتار دین اهلی دشمن کربلا
.
.
سنده قربانِ عدالت ائتدی شاه دین اؤزون
عالمه نشر ائتدی مظلومیّتیله حق سوزون
صفحۀ تاریخده دوتدی آدی دنیا یوزون
حشره تک قویدی جهاندا شیعه نین آغلار، گوزون
اولدی بزم ماتمی هر کوی و برزن کربلا
.
.
کربلا گوردون او سربازین رخ جانانه سین
شمع رخسار حسینون ، سوخته پروانه سین
باشی آخمیش تکیه گاه ائتمیش حسینون شانه سین
بلبلین گویا کسیبلر اوچ گون آب و دانه سین
جان وئرور جان اوسته نه جنبش ، نه پرزن کربلا
.
.
اودلانوردی اوز سوسوزلوق آتشیندن آهدن
دودۀ آهی گذر ایلردی مهر و ماهدن
سن کرم سیر ائت گنه بیر امّت گمراهدن
خجلتین اصغر چکردی شاهدن آللهدن
آه اگر تیر سه پر دوشسِیدی پردن کربلا
.
.
چکدی یثربدن سنه بیر گلستان دور زمان
هر گلینده روح و نکهت بیر گلستان بیر جهان
تشنه لیقدان حیف تیز ائتدون او گلزاری خزان
گل سولوب بلبل گئدوب بوش قالدی صحن گلستان
شرم سیز زاغ و زغندن دولدی گلشن کربلا
.
.
سنده شاه کربلا ایفای پیمان ایلدی
اوز مقدّس مقصدین دنیایه اعلان ایلدی
سو یانیندا جان سوسوز اسلامه قربان ایلدی
نیزه باشیندا ایله تفسیر قرآن ایلدی
آیه آیه اولدی آیاتی مُبرهن کربلا
.
.
گوردی قارداشیم ائدور آل امیّه اهتمام
محو ائدوب احکام دینی ایلسونلر اخذ کام
ایلدی ضدّ یزیده سنده بیر خونین قیام
ئولدی امّا قویمادی برنامه قالسون ناتمام
ظلم الیندن نیزه باشین گوردی مأمن کربلا
.
.
نیزه ده تبلیغ دینه باشلادی سلطان دین
شرکت ائتدیم اوندا من سردستۀ اهل یقین
ایلدوق تبلیغ بیر نحویله قرآن مبین
دوست و دشمندن گویه چخدی صدای آفرین
نطق ائدنده کوفه و شاماتده من کربلا
.
.
اولدی همراهیم منیم شهزاده بیر طفل صغیر
پاپیاده ، دست بسته ، شمر شومه دستگیر
گئتدی واقعده حسینیمدن دمشقه بیر سفیر
شاهزاده بیر سفیر اما قولی باغلی اسیر
ایلدی ویرانه لر کُنجینده مسکن کربلا
.
.
گوشۀ ویرانه ده بیر گنج قویدوم یادگار
قبری ، مظلومیّتین دنیایه ایلر آشکار
دود آهی ایمدیده ، ویرانه دن عرشه چخار
کاخ بیداد یزیدی آخر اول مدفن یخار
سیل دن کاریدی اشک چشم و شیون کربلا
.
.
ایلین اولسا اگر ویرانۀ شامه گذر
سیل تک جاری ایدر رخسارینه اشگ بصر
باخسا قبره دل گوزیله ، اهل دل صاحب نظر
قبرده بیر جسم نیلی بیر قرا معجر گورر
شیعه نین حالین پوزار ، اول خردا مدفن کربلا
.
.
قارداشیمدا منده بو قاره لچک لرده تمام
ال اله وئردوق پریشان جمع ائتدوق اهتمام
آرتوراخ قرآنیله قرآنیانه احتشام
یر یوزی آوازۀ قرآنیله دولسون تمام
نور اسلامیّت اولسون پرتو افکن کربلا
.
.
ای «حسینی» آرتورار هر کیمسه قرآن عزّتین
آرتورار خلّاق عالم عزّ و جاه و شوکتین
حکم قرآندور ایدن پاینده ایران ملّتین
هر کس اؤز قدرینجه بو قرآنین آنلار قیمتین
عاقبت قرآن ایدر دنیانی گلشن کربلا
.
.
#اربعین #سعدی_زمان
#آثارالحسینی1 ص 301
#عطریوه_قربان_اولوم_ای_دشت_ایمن_کربلا
#ترکی
#زبدةالاشعار
نظر دهید