ذکر مصائب حضرت امیرالمومنین (ع)
گریز به شهادت حضرت علی اکبر (ع)
گریز به شهادت امام حسین (ع) و قتلگاه
..
..
..
..
مرحوم صحاف تبریزی
..
..
..
..
على شهادتینی ایلینده فکر و خیال
شکسته قلبیم اولور محنتیله مالامال
..
اودور ویرار گوزومون یاشی مثل دریا موج
سپهره شیون و آه فغانیم ایلر اوج
..
تصور ایتسم اولور موجب فغان و نوا
دوتار وجودیمی غم التهابی سرتاپا
..
او سوز که وار نظریمده گوگل ایدوب منظور
محالدور اولا بیر کیمسه شرحینه مقدور
..
اوزی اجازه ویرب شهریار خیبر گیر
مصیبتین أیدرم اختصاریله تقریر
..
او گونکه ترک جهان ایلدی رسول انام
جوار رحمت پروردگاره قیلدی خرام
..
قویوب جنازه سینی یرده بی وفا امّت
کمال صدقله زندیقه ایتدیلر بیعت
..
یتوردی بیر یره ظلمین او قوم کفر آئین
ایگرمی بش ایل ایدوب مرتضانی خانه نشین
..
اگر چه حقّین او شاهین رعایت ایتمدیلر
بو قدر ظلمه ولکن کفایت ایتمدیلر
..
آچوبلا باب جفا شاه لأفتى یوزینه
ایشقلی گوندوزی تار ایتدیلر علی گوزینه
..
نچه نفر گوتوروبدور او اهل بدعتدن
گلوب علینی طلب ایتدی باب رحمتدن
..
گلوب قاپی دالنا فاطمه او کنز ادب
بویوردی کی اونا بو ازدحامه وار نه سبب
..
نه ظلمدور بو نه وادار ایدوب بو ظلمه سنی
که قویمادون قوریا باری بابامون کفنی
..
دیدی عم اوغلووا دئ ترک کنج عزلت ایده
گله خلیفیه مجبوردور که بیعت ایده
..
دینمرم هارا منجر اولوب سؤال و جواب
بو قدر وار که گلوب غیظه زادۀ خطاب
..
همان قاپی که زیارت ایدردی روح الامین
قویاردی یوزلرینی ساکنان علّیّین
..
وورولدی ظلم اودی مشعل چکوب قاپی یاندی
آچلدی سوخته در فاطمه یارالاندى
..
یخلدی غش ایلدی گل تک عارضی سولدی
قولی قابورقاسی سندی جنینی سقط اولدی
..
یولا یولا باشنی فضّه داد و حسرتیله
یتوردی ماوقعی مرتضایه سرعتله
..
آماندی یا على اگلشمه سولدی دین چمنی
دایانما درک ایله ئولدوردیله فاطمه نی
..
گورون نقدر چتین دور او غیرت اللهه
آچا جفا الینی دشمن عصمت اللهه
..
گوزی باخا باخا ریحانۀ رسول خدا
دوشه او حاله على صبر ایده دوزه دایانا
..
اولور بو قصّۀ دلسوزدن بیله معلوم
جهاندا کیمسه على مثلی اولمیوب مظلوم
..
ایدوب رسول خدانون عمل وصیّتینه
پیمبر امّتنون دوزدی هر مشقّتینه
..
گوروب که چکسه قلج سو کیمی آخار قانلار
چکَلّلَه دیندن اَل ظاهری مسلمانلار
..
مقام صبرده دوردی اودور امام علیم
رضا قضایه ویروب اولدی محنته تسلیم
..
توکولدی اوستونه بیر نوع محنت و آلام
گونوزلره توکلیدی اولوردی لیل ظلام
..
همین بو مطلبه حاکیدی سر به سر اخبار
اوزی بویوردی او شاهنشه فلک دربار
نجه اولور او کسون حالی دار و دنیاده
تحمل ایلیه جور و جفا و بیداده
..
ایگرمی بش ایلی بیر لحظه اولمیا خرسند
گوزینده ریگ بوغازینده استخوان اولا بند
..
تصوّر ایله إمامون او حالتی دلدن
نه ظلملر یتشوب گور او قوم باطلدن
..
خدا بیلور نجه ویردی باشا او ایّامی
او روزگار جگرسوز و محنت انجامی
..
مقدّراتی اوگون که یتیشدی اتمامه
حیات تازه وریلدی او گونده اسلامه
..
که یعنی حقّینه مالک اولوب أو شاه أنام
امور دین مبینه دوباره ویردی نظام
..
گوروب مدینه لیلر حقّدن اولوبلا کنار
دیار کوفه نی دارالخلافه ویردی قرار
..
اولوب او شهرده بش ایل مروّج أحکام
یتوردی خلقه تماماً ندور حلال و حرام
..
ولیک قویمادیلار مقصدین ایده تعقیب
امام قتلنه اشراری ایتدیلر ترغیب
..
مخالفت علمین قوزادی منافقلر
کسوفه دوشدی گنه نیّر حقایقلر
..
بیاض دینه محیط اولدی ابر کفر و ظلام
با کمندینه باطنده دوشدی اون بیر امام
..
منازل غمی طیّ ایتدی گردش دوران
یتیشدی مقصدینه نوزدهم رمضان
..
قوناقیدی او گجه غم کشیده کلثومه
دیردی رمزیله اوز قتلینی او مغمومه
..
گهی تلاوت قرآن گهی قیلاردی نماز
گهی ایدردی خدائیله کشف راز و نیاز
..
چخاردی صحنه گه اولدوزلارا ایدردی نگاه
دیردی اشهد ان لا اله الا الله
..
منه او مخبر صادق خبر ویرن گجه دور
محاسنمی باشیم قانی سرخ ایدن گجه دور
..
گوروب او شاه یاخونلاشدی وعدۀ موعود
آچوبدی بنده لره باب فیضنی معبود
..
ایدوب وضوسنی تجدید امام کون و مکان
حضور حضرت پروردگاره اولدی روان
..
نچه قدم گوتوروب صحن خانه ده شه دین
ویروبله سس سسه مرغابیلر دوتوب اتگین
..
زبان حالیله عرض ایتدیلر شها گتمه
ئولوم ایاقینه یتماقدا چوخ شتاب ایتمه
..
بویوردی بیر پارا سسلردیلر بولار اوجالور
دالنجا عترتمون آهی عرشه لرزه سالور
..
قاپودان ایستدی چخسون او شاه حلقۀ در
معاینه کمریندن دوتوب آچلدی کمر
..
دیدی علی بیلوه محکم ایت ئولوم کمرین
هراس و وحشتی چوخدور بو راه پر خطرین
..
غرض روانۀ مسجد اولوب شه کونین
یتوردیلر او شهی بین راهده حَسنین
..
دیردیلر ای اولان ماسوایه شاهنشاه
اجازه ویر بابا بیزده اولاخ سنه همراه
..
بویوردی حقّیمه ویرّم قسم سیزی قییدون
گیدون یروزده اولون ساکن استراحت ایدون
..
بونی اوزوز بولوسوز انس جن اگر اولا یار
بلادن ایلیه بُلمزله مبتلاتی کنار
..
اگر مقدّر اولوب باشیمه دگه شمشیر
ویرنمز اهل سما و زمین اونا تغییر
..
حسینله حسنی قیتروب وصیّ رسول
یتیشدی مسجده اولدی عبادته مشغول
..
گجه نمازینی ایتدی ادا شَهِ دوران
آچلدی صبح چخوب مأذن اوسته ویردی اذان
..
قیتدی بیر بیر ایدردی یاتانلاری بیدار
یوز اوسته قاتلنی تاپدی واقف اسرار
..
بویوردی یاتما بو نوعیله ای جفا کانی
یاخندی دولدورا ظلمون تمام دنیانی
..
گچوبدی وارد محراب اولوب او شمس هدی
نماز صبحین ازل رکعتینی ایتدی ادا
..
همینکه سجدیه باش قویدی سیّد عالم
قلج الینده کمین ایتدی زادۀ ملجم
..
باش ایستدی گوتوره سجده دن امام مبین
تمام قوّتلن اندروب قلج او لعین
..
اصابت ایلدى شمشیر کین علی باشنا
بولوندی فرق شریفی انیب قلج باشنا
..
بویاندى قانینه محرابده ولی الله
دیدی فغانیله فزت بربّ بیت الله
..
تمام بیر بیره دگدی ثوابت و سیار
گلوب تزلزله یر عالم اولدی تیره و تار
..
یریله گوی آراسنده جناب روح الامین
خطاب ایلدی ای ساکنان عرش و زمین
..
اساس دین پوزلوب برهم اولدی رکن هدی
قلجلانوب باشی قطع اولدی عروة الوثقی
..
فضای عالمی دولدوردی بانگ شیون و شور
دیار کوفه ده برپا أولوندی شور نشور
..
دگوب بیری بیرینه اهل کوفه پیر و جوان
ایاق یالین باش آچوخ مسجده اولوبلا روان
..
یتوب نه گوردیله محرابده شه دوران
اولوبدی سجدۀ طاعتده قاننه غلطان
..
یتوردیلر حسنین اوزلرین او ساعتده
گوروبله شیر خدانی بیر اوزگه حالتده
..
عمامه پاره لنوب قانله دولوب محراب
محاسنین باشنین قانی ایلیوبدی خضاب
..
ایله پوزولدی او حالتده مجتبی حالی
دوباره پوزدی او مجموعی پوزقون احوالی
..
باشین آلوب دیزینه عارضه توکوب قان یاش
دیدی بو نوع گورونجه سنی ئولیدیم کاش
..
بو قان دولان گوزون آچ ای شهنشه حرمین
قالوب نه حالته گور باغرى قان اولان حَسَنین
..
اولوب غمونده ایله سینه چاک ابوالفضلون
یاخندی اوز اوزین ایتسون هلاک ابوالفضلون
..
آچوب أو وقتده قانلو گوزین ولیّ خدا
بویوردی صبر ایلیون ایتمیون فغان و نوا
..
دایانمیون داخی تعجیللن منی گوتورون
گوزی یولومدا قالان اهل بیتیمه یتورون
..
یری وار اولسا گوزیم یاشی قان بو شرح غمه
حرم امیرینی حمل ایتدیلر نجه حرمه
..
گلیمه ایتدیله پیچیده اول شهى اصحاب
اولوردی قان یاراسندان روانه چون میزاب
..
او نحویله گوتوروبله امامی ناله کنان
شکسته خاطر و پژمرده دیده لر گریان
..
نچه قدم ایوه قالمش بویوردی شاه عرب
قویون منی یره بو نوع گورمسون زینب
..
منى بو حالتیله گورسه زینب و کلثوم
وجودین هر ایکسی غصّه دن ایدر معدوم
..
..
..
..
///گریز به آوردن حضرت علی اکبر (ع) به خیمه ها///
..
..
بو یرده خاطریمه دولدی شور و شیون و شین
گتوردی خیمه لره بیر علیده اوغلی حسین
..
واریدی شیر خدانون باشندا بیر یاره
ولیک اکبرون اولموشدی جسمی صد پاره
..
أوزی سوسوز بدنینده یاراسی چوخ چوخیدی
بو قدر عرض ایده بولّم که صاف یری یوخیدی
..
نه حاله قالدی او حالتده بلمرم شه دین
که تاپدی جدّینه بنزر جوانینون بدنین
..
گوروب که گلشن جسمنده یاره لر گل آچوب
قلج یرینه دگوب اوخ گول اوسته سنبل آچوب
..
قلجلانوب باش آخوب قان گوزه اولوب پرده
قالوبدی گل کیمی صد چاک پیکری یرده
..
قاشی گوزی خط و خالی یوزی باتوب قانه
شبیه اولوب بدنی قطعه قطعه قرانه
..
ز بس دوشنده آت أوستن پره چالوب ال ایاق
یتوبدی صدمه یوزینه گوزینه گوزدن ایراق
..
ایکی الیله باشین قوزیوب اوپوب گوزینی
قویوب او توپراقا قانه باتان یوزه یوزینی
..
بویوردی یا وَلَدى بَعدک عَلَى الدُّنیا
أَفا وَلا ضَحَکَ سِنّه إِلَى العُقبی
..
باخوب نه گوردی بویاندا جوانی جان ویروری
اویاندا زاده لرین سعدین اوغلی سان ویروری
..
تصوّر ایله او حال شهنشه زمنی
نجه خیامه گتوردی او دوغرانان بدنی
..
بویوردی اوغلی ئولن شاه اؤز قبایلنه
بو نعشی حمل ایلیون خیمه لر مقابلنه
..
جنازه نون قباقنجه امام تشنه جگر
دیلینده واولدا وای اوغول علی اکبر
..
یتوب خیامه چکوب داغلی سینه دن بیر آه
ساقا صولا نظر ایتدی شهید عشق إله
..
بویوردی گل ای آنام فاطمه نشانی باجی
مشایعت ایله بو دوغرانان جوانی باجی
..
منیم دیلیمجه دی باشی بلالی لیلایه
گتوردوم اکبری گلسون اودا تماشایه
..
اؤزوم نه حالدیم یوخ بُلن خدا بلوری
بو حالی بیرده جوانی ئولن آتا بلوری
..
توکولدی خارجه یکسر مخدّرات خِیَم
گوروب حرم بَلَشوب قانینه غزال حرم
..
او نازنین بدن اوسته آچلدی چوخ باشلار
بولوندی ساچلار عذاره توکولدى قان یاشلار
..
جنازه اوسته یتن وقته لیلی مضطر
قیامت اولدی عیان آشکار اولوب محشر
..
اوجالدی شور و نوا اهل بیت طاهادن
دوشوب تحیّره گوگ اهلی صبر لیلادن
..
دوتوب امامه یوزین عرض قیلدی یابن رسول
منای عشقده حق ایلسون فداوی قبول
..
بوگون بو یرده ره حقده چوخ فدا ویردون
دوزوب بلایه قضای حقه رضا ویردون
..
دوداقلارون کیمی قلب شریفون اودلاندی
گوزون باخا باخا جدّون شبیهی دوغراندی
..
خدای عالمه چوخ ایتمسن خطا «صحاف»
صحیفۀ عملون دولدوروبدی جرم و خلاف
..
ریائیله أوزیوی خلقه ایلمه ظاهر
ویرنده جان باشون اوسته على اولار حاضر
..
علینی ایستین اولماز ذلیل حتم ایله
على مصیبتین اکبر غمیله ختم ایله
..
..
..
..
///بقیه احوال حضرت امیرالمؤمنین و کیفیت نعمان
جراح و شهادت آن بزرگوار و گریز قتلگاه ///
..
..
هوای بسزم عزا ایلدی منی ترغیب
ایدم بقیۀ عنوان اوّلی تعقیب
..
خیال ایدوب گتورنده علی غمین نظره
آخار گوزوم یاشی رخساره اود دوشر جگره
..
مجسم ایله گورونده او حال پر اسفی
باشی یارالی ایوه گتدیلر شه نجفی
..
خانمار آلدیلار اطرافنی پریشان حال
احاطه ایلدى آل رسولی درد و ملال
..
دگوب بیری بیرینه اهل بیت پیغمبر
عیال حیدره بی نفخ صور اولوب محشر
..
اوجالدی زجّه و ناله بنات زهرادن
دایاندی شیون و فریاد عرشه غبرادن
..
او شاهی سالدیلا بیر رختخواب محنتده
یاتوب ولیّ خدا بستر مصیبتده
..
ز بسکه تیغ جفا اختیارین آلمشدی
سولوب جمالی ساری گل کیمی سارالمشدی
..
گهی امام ایدوب غشوه گه گلوب حاله
باخاردی حسرتیله اهل بیت او احواله
..
گلوردی دسته به دسته عیادته اصحاب
تمام اللری قوینوندا دیده سی پر آب
..
باخان جمالینه گوزدن یوزه توکوب قان یاش
دیردیلر سنی بو نوع گورمییدوخ کاش
..
نه حالدیدی بُلن یوخدی زینبون حالی
بنات عصمتی پوزموشدی پوزقون أحوالی
..
گوگل دونوب قانا دولموشدی خون دل گوزینه
یتیملوق توزی قونموشدی دفعتاً یوزینه
..
دوتوب یوزین حسنینه أو کان فوز و فلاح
دیدی گیدون گتورون سرعتیله بیر جراح
..
گیدوب گتوردیله چوخ سرعتیله نعمانی
ایده معاینه زخم ولیِّ یزدانی
..
دیدی ضروردی بو امره بیر قویون جگری
اولا معاینه بهبودی یا ئولوم اثری
..
حرمسراده پس پرده ده بنات و زنان
هامی باخاردی او حاله مشوّش و نگران
..
توکوب او وقتده نعمان یوزینه گوز یاشین
گوروب علامت زهری جگرده آچدی باشین
..
دیدی بو بیر یارا قسمت اولونسا مین نفره
گمان یوخومدی سلامت قالا بیرى سحره
..
فدا اولوم باشوا باشیوه یغ عترتوی
دویونجا یوزلرینه باخ ایله وصیتوی
..
دیوب بو سوزلری نعمان با دل پرخون
یارالی شاهی وداع ایلیوب اولوب بیرون
..
جهاندا مدت عمرینده آغلیان زینب
غم آتشیله یانوب سینه داغلیان زینب
..
بویوردی وای منه آسان ایشیم چتین اولدی
اسیر اولوب بو یره گلماقیم یقین اولدی
..
نَلَر گلور باشیما روزگارده بُلَّم
خانملوق ایلدیگیم شهره باش آچوخ گلم
..
بو سوزده بیریبره دگدی مخدّرات حرم
حرمسراده قیامت ظهوره گلدی اودم
..
یانقلی دللریله ناله ایتدی آل الله
اوجالدی فرشدن عرشه صدای ناله و آه
..
آچوب گوزین باخوب احوال اهل بیته او شاه
دیدی سس ایلمیون خلقی ایتمیون آگاه
..
او ساعتیکه منیم حالیم اولدی دیگرگون
جنازه می ایلیون خلقدن نهان مدفون
..
بنی امّیه اگر قبریمی منیم تاپالار
جنازه می چخادوب اود وروب ایدللر خوار
..
وصیّتین حَسَنینه أیدوب أو شاه اُمم
یوزینی قبلیه دوندردی قبلۀ عالم
..
شهادتینی ادا ایلدی امام علیم
دوتوب حسن الین ایتدی امامتی تسلیم
..
اراده ایلدى روحی مقام محموده
قوتاردی رنج عدودن یتیشدی مقصوده
..
حنوط و غُسله مباشر اولوب امام حسن
گوتوردیلر گجه وقتی جنازه نی یردن
..
علی جنازه سینی ایتدیلر گجه مدفون
ایدوبدی شیعه لری بو قضیّه چوخ محزون
..
..
..
/// گریز به شهادت امام حسین (ع)///
..
..
بو یرده یادیمه دوشدی بو شاهون اوغلی حسین
سالوبلار آتلار ایاقینه نازنین بدنین
..
کسوب باشین یارالی پیکرین قویوب یرده
شعاع شعشعۀ شمس اولوب اونا پرده
..
او سینه ای که ئوپردی یوزین قویاردی بتول
مشبّک ایلدی توپراقلار اوسته سُمّ خیول
..
او حاله سالدیلا آتلار ایاقی پیکرینی
حسینون ایتدیله مسحوق جسم اطهرینی
..
او قدر وردیلا داش کوفیان بی ایمان
که اولدی سنگ جفا آتدا پیکری پنهان
..
سبب اودور او چولی قارداشی ئولن زینب
گوروب دیردی منیم قارداشم نولوب یارب
..
نه گوردی سس گلور ای تیر محنت آماجی
دولانما چوللری گل بوردایام بلالی باجی
..
همینکه زینب کبری حسین سسین آلدى
او حالتیله گوروب گور نه حالته قالدى
..
یتیشدی تضرعنه تا او زار و دلخسته
باخوب نه گوردی دوشوب بیر بدن پوزی اوسته
..
نجه بدن که نه باش وار نه ال سلامتدور
پوزوبلا نقشه سنی سر به سر جراحتدور
..
پره اوتوردی خانم داشلاری کنار ایلدی
او گول کیمی بدنی زینت کنار ایلدی
..
دیدی سن ای یارالی نور هر دو شینیم سن
سسیمه سس ویر اگر سن منیم حسینیم سن
..
او ساعتیکه باشون کسدی شمر ذی الجوشن
حیالی عترتیوی سویدی بی حیا دشمن
..
مخدّرات حرمده نه زیب و زیور وار
باشی بلالی باجون نه باشندا معجر وار
..
کسوبدی چاره می دشمن ایدوم نه چاره حسین
مجال یوخدی قویوم جسموی مزاره حسین
..
سحاب زلف قمر او سته سایبانیم وار
که یعنی بو آغاران ساچلارا گمانیم وار
..
خیالی وار یتوره شمر ظلمین اتمامه
باشون دالنجا بیزى باش آچوخ چکه شامه
..
شرار آتش ظلمیله کونی یاندورالار
سالوب قاباقلارینا باش آچوخ دولاندورالار
..
روادی قانه دونه گوز یاشم خداحافظ
بوسن بو دشت بلا قارداشیم خداحافظ
..
مُطوّل ایتمه سوزی ایله مختصر «صحاف»
نشان ویرر اوز اوزین گر جواهراولسون صاف
..
گتور بو عرصه ده جولانه معرفتله کُمیت
یقین ایله آلوسان روز حشر بیتیوه بیت
..
بو جزئی خدمتوی فاطمه قبول ایلر
قیامتین گونی نقداً اوزی وصول ایلر
..
..
..
#حیدریه #صحاف_تبریزی #حیدریه_شهادت #ترکی #زبدةالاشعار
نظر دهید