دفن حضرت زهرا (س)
.
.
مرحوم تائب تبریزی
.
.
علی مزاره قویاندا بتول عذرانی
دولوب بولود کیمی توکدی یوزه جگر قانی
.
دل آچدی درد دله ختم انبیائیله
مخاطب ایلدی گوز یاشلی شاه بطحانی
.
سلام اولا سنه مندن بلالی زهرادن
که غصّه یوردی ایدوب غم له ترک دنیانی
.
قزون بتولیدی گلدی جوار رحمتوه
تیز اولدی گلماقی وصلیله آتدی هجرانی
.
خلاص اولوب أؤزی اما علینی تک قویدی
فراق غصّه سی یالقیزلادی بو تنهانی
.
یتوب حضوریوه یورقون یارالی قلبی سنق
فراقی ایلدی بی صبر بو شکیبانی
.
منیم بتول بو دنیاده پشتوانه میدی
او گتماقیله شکست ایلدی بو نالانی
.
بتول بیر یانا دنیا گوزومده بیر یانه
او گئتدی سالدی گوزومدن داخی بودنیانی
.
دیردیم اؤز اؤزیمه گر گیدوب رسول خدا
ولی یرینده قویوبدور وفالی زهرانی
.
اولان زمان ده دیداریوه سنون مشتاق
گیدوب زیارت ایدردیم او ستر کبرانی
.
دولاندا داغلی اورک درد وغمله مالامال
منیم دلیمدن آلاردی غم فراوانی
.
دیردی صبر ایله مظلوم عم اوغلی صبر ایله
بولود کیمی دوتولوب توکمه اشگ بارانی
.
نقدر وار نفسیم دردیوه شریک اولّام
دئ دردیوی منه خانه نشین زندانی
.
مریض حالیدی لبخندیله باخاردی منه
آلاردی گوگلیمی لب خند لعل خندانی
.
همان بتول که سرمایۀ سروریمیدی
ایدردی زایل اؤرکدن ملال پنهانی
.
الیمله دفن ایلدیم من سنون جوارینده
الى یارالی بو پهلو شکسته بیر جانی
.
او گوهری که امانت قویوب اؤزون گتدون
اؤزیوه ردّ ایدورم ای نبیّ سبحانی
.
گذشت ایله بو گوهر اگر شکست اولسا
که سن اؤزون بولوسن بیر به بیر قضایانی
.
گوز اوسته ساخلامیشام من بو درّی حفظینده
قصور ایتمه میشم ذرّه جه علی جانی
.
دیر اؤزی سنه بیرییر باشی بلالی قزون
که امّتون بیزه گوستردیلر نه طغیانی
.
توکولدیلر نئجه بلوا یاراتدیلار قاپیدا
یهود و گبرده سالموبدیلار او بلوانی
.
بیراؤزکه سوزده دیدی هَضمها عبارتی وار
کتابت ایتماقا شرم ایلورم او عنوانی
.
قاپیمدا اولدی نَلَر من چخاتمارام یاددان
او یادیله توکرم اشگ چشم گریانی
.
شیرین یوخی گله هیهات بیرده گوزلریمه
ایدنده یاد او گونی ایله تلخ دورانی
.
قرارسیز یاشارام گوندوزی گجه بیدار
غمیم همیشه لیق اولدی ئولونجه هر آنی
.
اجل بو حالیله تا اینکه درک ایده منی ده
گلوب تاپام سیز اولان یرده جای سُکنانی
.
ایله صبور و توانائیدی قزون زهرا
که گیزلدردی او مندنده زخم اعدانی
.
نه ویردی سینه یاراسین نشان ئولونجه منه
نه گوستروب قارالان چشم مست شهلانی
.
بیلک لری ورم ایتمیشدی سوز سالوب دیمه دی
مباد صبریم اولا درد و غصه تالانی
.
یوزینده سیلی یرین نه منه نشان ویردی
نه گوستروبدی دوگولموش کبود اعضانی
.
نه گوستروبدی منه تازیانه یرلرینی
ایدوب نه شکوه ویروب نه گلایه اعلانی
.
شیرین یوخی گله هیهات بیرده گوزلریمه
ایدنده یاد او گونی ایله تلخ دورانی
.
دله گتوردی نه بیر سوز شکسته پهلودن
خمیده گر چه گورردیم او قد بالانی
.
ویرنده غسلینی یاندی یاخیلدی بو اورگیم
گورن زماندا همان نیلفام اعضانی
.
حکایت ایتدی منه تازیانه لر یاراسی
اونا نقدر ایدوب ظلم دشمن جانی
.
وجودین ایله اریتمیشدی بوتۀ محنت
اوشاق وجودینه اوخشاردی جسم بی جانی
.
اوشاق جنازه سی تک گتدیم اللرم اوسته
ودیعه وی سنه ردّ ایلیم همین آنی
.
محبّتیله قزوندان اؤزون خبرآلسان
دیر اوزی سنه اوز چکدیقی بلایانی
.
بالا گوزلدی که اوز دردینی آتایه دیه
آتا محبّتی دور جمله درد درمانی
.
قوتار بو مطلبی تائب یتشمز اتمامه
قیامته کیمی یازسان بو شرح عنوانی
.
.
#فاطمیه #تائب_تبریزی #ترکی #زبدةالاشعار #فاطمیه_شهادت
نظر دهید