غافل اولما یاده سال هردن ای انسان قبریوی #پندیات_سیدبشیرحسینی

به یاد قبر
و گریز به #اربعین امام حسین علیه السلام
..
..
..
..
سید بشیر حسینی میانجی
..
..
..
..
غافل اولما یاده سال هردن ای انسان! قبریوی
زندگیده گَل فراموش ائتمه بیر آن قبریوی
..
ائتدی فرمایش حسین: «اَلقَبرُ صُندُوقُ العَمَل»
خیر عمل ایلر سنه باغ و گلستان قبریوی
..
گئت جُمعه آخشامی قبرستانه باخ اِمعانیلن
قیل تجسُّم گؤزلرونده گاه پنهان قبریوی
..
عرض ائله یارب! اؤزون رحم ایله قبریمده منه
رحمتیله دولدورا خلّاق رحمان قبریوی
..
هاردا، آیا کیم قازار، کیم دفن ائدر، کیم داش یازار
کیم گلوب هردن زیارت ایلر ای جان! قبریوی
..
نه یازالّار قبروین داشینده هردن فکر ائله
یا تانولّار ائل لرون گلدوقجه هاردان؟ قبریوی
..
هانسی عکسون چاپ اولار اعلامیه اوستونده گؤر
ایلییر یا هانسی عنوانون نمایان قبریوی
..
چوخ زمان کئچمَز گؤررسن عالم برزخده سن
وارثون یاددان چیخاردار ای مسلمان! قبریوی
..
هئچ کیمه ظلم ایلمه، حقّین یئمه هئچ کیمسه نین
پیس عمل لر یوخسا ایلر عینِ زندان قبریوی
..
نوریدور باشدان باشا قرآن، اوخی ایله عمل
نوریلن دولدورسون آخر حیّ سبحان قبریوی
..
وقف ائله قرآنی اُول یئرده کی واردور احتیاج
حشره جک ترک ائتمه سین تا نور قرآن قبریوی
..
دوت الیندن السیزین، دوتسین الوندن مرتضی
بیر باخیشلا جنّت ایلر شاه مردان قبریوی
..
قبریوه تاپشور بیر آز قویسونلا أعلا تربتی
کربلا توپراقی ایلر نور باران قبریوی
..
یادیمه دوشدی دئدی زینب: حسین جان! گلمیشم
تا آلام جانیم کیمی آغوشه الآن قبریوی
..
آیریلیق دردی قوجاتدی باجیوی قارداش حسین!
آلموشام آغوشه فکر ائتمه چوخ آسان قبریوی
..
قبرون اوسته سالموشام قانه باتان پیراهنون
وار یئری توزدان یووا اشک فراوان قبریوی
..
قانیوه غلطانیسن حتّی مزارونده حسین!
یاره لردن چوخ آخوب لبریز ائدوب قان قبریوی
..
درده گلدی قلبیم آخر یاره دور قلبون کیمین
قلبیمین دردینه بیلّم یاخشی درمان قبریوی
..
قیزلارون، باجی لرون سالم دی منده سالمم
بیز زیارت ایلیروق ای جانِ جانان! قبریوی
..
بیر قیزون قالدی فقط ویرانسراده گلمه دی
آرزو ایلوردی چوخ چوخ دل پریشان قبریوی
..
اولمادی قسمت، رقیّه قبریوه قویسون یوزون
باشیوه دؤنسون طواف ائتسین او نالان؛ قبریوی
..
چوخ گلر کرب وبلایه کاروانیله «بشیر»
چون چوخ ایسترسن گؤره بو خسته مهمان قبریوی
..
..
..
#پندیات #سیدبشیرحسینی #اربعین_سیدبشیرحسینی #ترکی #زبدةالاشعار