غمیم اولمازدی آتامدان خبر اولسیدی بی بی #حضرت_رقیه_انور_اردبیلی

زبانحال حضرت رقیه علیها سلام
.
.
مرحوم انور اردبیلی
.
.
غمیم اولمازدی آتامدان خبر اولسیدی بی بی
بو قرانلوق گجم آیدین سحر اولسیدی بی بی
.
.
من فلکدن ایلیوم شکوه و یا بختیمدن
قاره گوندن دانشوم یا که قرا بختیمدن
یورقونام اینجیمشم زندگی سختیمدن
تاب ایدردیم گینه بر خوش خبر اولسیدی بی بی
.
.
بیر غریبه بالاجا دختر اوزوم اوچ ساله
دولاشوب قوش کیمی غم رشته سی پر و باله
دوزه بلمزدی گویرچینده ایدردی ناله
لانه سی من کیمی زیر و زبر اولسیدی بی بی
.
.
ایله فکر ایتمه رقیه ایتوروب أوز روشین
ناز و غمزه یرینه آغلاماق ایلوبدی ایشین
کنج ویرانه ده اولمازدی بله خاک نشین
بو قرا بخت اگر بختور اولسیدی بی بی
.
.
نی لره ایلر اثر منده اولان محزون سس
گون بگون محنتیم آرتور اولورام دل واپس
فلک آغلاتسا کیمی گولدوره بلمز هیچ کس
آغلامازدیم محنیم مختصر اولسیدی بی بی
.
.
ہو بلالی باشیما نیلوم آتام چکمور باش
ایراق اولسون ایله بل آیری دوشوب گوزدن قاش
یوزه کیپریک سانی توکمزدیم ایکی گوزدن یاش
نخل امیدیم اگر بارور اولسیدی بی بی
.
.
یثربی ترک ایلین وقته شب ظلمانی
قوشمادوز قافلیه سیز او گجه صغرانی
یاخشی ایش اولدی، گتورسیدوز او سرگردانی
دیری قالمازدی بیزه همسفر اولسیدی بی بی
.
.
گوز تیکوب یولارا گرچه غمی چوخدور دلده
یری راحتدی اقلاً باجیمون منزلده
بوندان آرتوق آلشاردیم شرر نسگلده
باجیلاریم تک اودا در بدر اولسیدی بی بی
.
.
سوزوم اکبرده دی عمه منی سالمور یادینا
خسته جانیم اولا قربان اوزینه هم آدینا
آجی آغزیم یتیشردی گینه شیرین دادینا
ناظر حالیم او زیبا نظر اولسیدی بی بی
.
.
گوز اویاقدور گیجه لر دلبریمون خاطرینه
گزور افلاکی او خوش منظریمون خاطرینه
آیا حسرت باخورام اکبریمون خاطرینه
باخمازیدوم گویه گر مین قمر اولسیدی بی بی
.
.
اکبریم عمّه بو جریانی بلور یا بلمور
باجسین شامده زندانی بلور یا بلمور
حال آشفتۀ لیلانی بلور یا بلمور
چاره ایلردی او فرخنده فر اولسیدی بی بی
.
.
واردی حقیم داریخام آتش سوزانه یانام
الى قوینوندا خرابه قاپوسندا دایانام
قاره معجر باشنا سالمازیدی لیلی آنام
ساق سلامت علی اکبر اگر اولسیدی بی بی
.
.
شام قزلارى منه بسکه ساتور غمزه و ناز
بعضی صحبت دانشولّار ایدورم سوز و گداز
یثربون شهرینه بوردان ایلیردوم پرواز
قوش کیمی منده آچیق بال و پر اولسیدی بی بی
.
.
یاتمیور قلبیمه اصلا بو اوچوق کهنه حصار
نه هواسینده صفا نه سویونون لذّتی وار
کولگه سی اوددی کانّه یوموشاق تپراقی خار
بوردا قالمازدی رقیّه مَفر اولسیدی بی بی
.
.
آنامون ناله سسی قلبیمی ایلوبدی کباب
حرمله کیمدی ایدور هی اونا نفرین و عتاب
مله مزدی ملر آهو کیمی بیچاره رباب
سینه سی اوسته گوزل صود امر اولسیدی بی بی
.
.
#حضرت_رقیه #انور_اردبیلی #حضرت_رقیه_شهادت #ترکی #زبدةالاشعار