فصل بهار حیف اولا بوى خزان گلور #اکبریه_شهاب_تبریزی

#بهاریه – راجع به ظهور امام زمان «عج»
شهادت حضرت علی اکبر (ع)
.
.
.
مرحوم شهاب تبریزی
.
.
فصل بهار حیف اولا بوى خزان گلور
هنگام عیش چار طرفدن فغان گلور
.
هچ بولمورم بو عرصه ده کیمدور نه وار نولوب
الدن آلوبدی توسَن خامه عنان گلور
.
یا بیر بهار مایۀ غم ایستوری یازا
پاره ایدوب عنانینی شیحه زنان گلور
.
اوّل بصیرتاً گُله باخسام یقین سولوب
نیلوم چو غنچه پرده ده سوز نهان گلور
.
قانه دونن اورکلره باخ ، باخما لالیه
لاله همان اورکلری وئرسون نشان گلور
.
چون طرۀ ستم زده گان شاخ یاسمن
باشین آچوب توکوب داغیدوب موکنان گلور
.
سروی منیم گمانیمه کیم تند باد اَگوب
آگاه اولان بولور قدین ایوب کمان گلور
.
فصل بهار و لذت سیر گل و چمن
قالدی او وقته حضرت صاحب زمان گلور
.
جدّی حسینون اوّل آلار انتقامینی
بو منتقم خدا گوره سن بس هاچان گلور
.
آل امیّه دن او قدر قان توکر او شه
بعضی قلوبه بعضی چنین و چنان گلور
.
یعنی دیه لَّه رحم اولی قلب امام ده
توکمز بو قدر قان یره آخر امان گلور
.
علم امامتیله او سلطان تاجدار
مطلق بولر که قلبلره بد گمان گلور
.
فوراً وورار جداسینه نعلین اکبری
معناده داد و شیونه کَرّ و بیان گلور
.
ایلر خطاب او میر هدا خلق عالمه
شمشیره چکسَم عالمی آیا گران گلور
.
اولماز اونون بو پاره اولان بندینه عوض
اکبر نظیری بیرده مگر بیر جوان گلور
.
ألحق ایا امام زمان بیر ایله جوان
مشکل گلر وجوده ولو مین جهان گلور
.
بیر نحویله شبیه رسول خدائیدی
اوصافینه نه نُطق گلور نه بیان گلور
.
میدان کربلاده جمالین گوروب عدو
سویلر دیلر که خاتم پیغمبران گلور
.
صد حیف اولا که بیر ایله رعنا جوانیلن
جنگ و جداله الده قلج شامیان گلور
.
بیر داش اورکلی منقذه باخ الده تیغ کین
شهزاده نین دالینجا دوان بَر دوان گلور
.
بیر ضربتیله ایلدی گلگون جمالینی
گویا که مرکب اوسته گل ارغوان گلور
.
یعقوب عَثقلانی ایدن ظلمی یازماقا
نه خامه مقتدردی ، نه شرح و بیان گلور
.
یاز مختصر بودور یره زین عقابدن
جانان یولوندا ایلیه تسلیم جان گلور
.
اوّل دوشن کیمی یره سسلندی گل بابا
آخر تقسدی جان گیدوری جانستان گلور
.
آلدی اوغول سسین آتا فورا دوشوب یولا
نه حالیله خدا او شه بی کسان گلور
.
سوز دوشمه سه غلط دیرم که نه گوز گورور
نه نُطقی وار على چاغیرا نه زبان گلور
.
جدی شبیهینی نجه گوردی بولنمورم
محبوبدن حبیبه بو سخت امتحان گلور
.
اولدی پیاده آلدی دیز اوسته اوغول باشین
گوردى على کیمی یاریلوب فرقی قان گلور
.
بی اختیار نالۀ وا اکبرا چکوب
وار دور یری دئسم که او سس هر زمان گلور
.
قویدی بوزون اوغول یوزونه مهربان آتا
نه مهربانی وار نه الیندن دوتان گلور
.
جان وئردی شاهزاده آتاسی باخا باخا
بو صبردن تعجبه هفت آسمان گلور
.
نعشین ئوزی آپاردی و یا کیم آپاردیلار
من بولمورم بولنلره مطلب عیان گلور
.
گلدی امام اولدى ئوزی داخل خیام
بیر ایله وقت رسمیدی بیر مهربان گلور
.
گلدی خانم سکینه قاباقجا حضورینه
هر دم گوروب فغانه شهِ إنس و جان گلور
.
گوزلر دوشوب ایله دَوَرانه معاینه
بیر شخص مُحتَضَردی نفس آن به آن گلور
.
عرض ایلدی بابا نیه بو حاله دوشموسن
رنگون سولوبدی گل کیمی بوی خزان گلور
.
تک گلموسن ندن بس على قارداشیم هانی
آیا هاچان خیامه او روح و روان گلور
.
وئردی جواب علینی قزیم ائتدیلر شهید
ائتمه گمان که بیرده او آرام جان گلور
.
سالدی بو سوز سکینه نون آتش نهادینه
یانسان سزادی سوز ایله آتش فشان گلور
.
گیتدی قرار و طاقتی سسلندی وا أخا
دنیایه بیله ده اورَگی قان اولان گلور
.
بی اختیار ایستدی چخسون خیامدن
اما نه دیزده طاقتی وار نه توان گلور
.
مانع اولوب امام بویوردی دایان قزیم
صبر ائت گیلن بو غم سنه گرچه گران گلور
.
پرهیز قیل بو حالیله چخما خیام دن
نُقصانی واردی عصمته نسبت زیان گلور
.
عرض ایلدی سکینه نجه بیر باجی دؤزر
قارداشینون ئولوم خبری ناگهان گلور
.
بیر نکته وار دلیمده سوزی قورتارانمو رام
شاید همان او نکته نی بیر آختاران گلور
.
قتلایه کیم گتوردیله اکبر جنازه سین
بیر وقت اولار که گورماقینا بانوان گلور
.
اما نجه گلر اونی اوغلى ئولن بولر
نعش اوستونه نه طرزیله آیا زنان گلور
.
بیرده خصوصاً عمه باجی مهربان آنا
دلده تصوّر ایله ئوزون گور نه سان گلور
.
بیر ایله نوجوانی ئولن بانوان یقین
سر پا برهنه ، مویه کنان ، سر زنان گلور
.
اکبر آناسی گلدی ئوزی یا گتوردیلر
غش عالمینده مطلق او بی خانمان گلور
.
اکبر ئولوب بدن سووموشدی چه فایده
سس وئرمه دى نقدر دیدی دور آنان گلور
.
وئر خاتمه « شهاب » بو سوز قورتولان دگول
سوز ختم اولار او گون که او قانی آلان گلور
.
.
#بهاریه #مهدیه #اکبریه_شهادت
#فصل_بهار_حیف_اولا_بوى_خزان_گلور
#ترکی
#زبدةالاشعار #مهدیه_شهاب_تبریزی #بهاریه_شهاب_تبریزی