در شهادت حضرت معصومه (س)
.
.
.
مرحوم صبا تبریزی
.
.
فلک معصومیه اول گون که قم شهرین نشان ویردی
آیردی خانمانیندن مکان جاویدان ویردی
.
.
ز بس قارداش فراقینده دلی اندوهیله دولدی
سارالدی گول کیمی رنگ جمالی گون به گون سولدی
یتن گوندن همان شهره مریض بستری اولدی
بهار عمرینه بار غم اعلان خزان ویردی
.
.
گوروب غربت ولایتده اوزین غم رختخوابینده
چکوب شعله غم غربت دل بی صبر و تابینده
گلوبدور گوز یاشی موجه او دم چشم پر آبینده
عذاره اشکینی توکدی دئمه بیر آن امان ویردی
.
.
گلوب افغانه بلبل تک او بی کس دیده ده قانیاش
یوزین دوتدی خراسانه طرف عرض ایلدی قارداش
جمالون گورماقا قالدیم عجب حسرت منِ کولباش
فلک بولَّم منه آخر بو قم شهرین مکان ویردی
.
.
گوزوم یولدا قالوب قارداش رضا بو دار غربتده
یوخومدور بیر کسیم گلسون قالوب معصومه حیرتده
غریبلر ضامنی سن سن منی قویما بو حسرتده
گل ای قارداش فراقونده گوزوم رخساره قان ویردی
.
.
بو غربت اؤلکده ئولسم یوخومدور بیر کسیم قارداش
گوزیمی باغلیان نه وار منیم دادرسیم قارداش
یقیناً یتموری بولَّم سنه آخر سسیم قارداش
و یا مأمونیده آخر سنه ظلمین عیان ویردی
.
.
توکردی اشکین آغلاردی گلوب افغانه بیر مدّت
سارالدی گون به گون دردی وجودینده ائدوب شدّت
اورکده آتش هجران گوگلده محنت غربت
یوزینده اشک حسرت حالینه شرح و بیان ویردی
.
.
یاخونلاشدی او ساعت جان ویره معصومه جانانه
باسوب آغوشه قارداش نامه سینی گلدی افغانه
ایدوب قربان او دم جانین شهنشاهِ خراسانه
اورک باشیندا قارداش نامه سی جانانه جان ویردی
.
.
#گریز #زینبیه_شهادت
.
گتوردی گوگلومی درده منیم بو یرده بیر مطلب
مجسّم ایلدی گوزده بیر آیری محنتی یارب
حسینی ایستین کسلر دیسون وای بینوا زینب
بلالی زینبی بو غم کش دوران نشان ویردی
.
.
او دم آغوشینه باسدی حسینون کوینگین نالان
عذاره توکدی گوز یاشین بسان بارش نیسان
همان پیراهنه ائتدی او وقته جانینی قربان
اوز عشقین شاه مظلومه نشان اول مهربان ویردی
.
.
دئدیم کیمدور #صبا استادون عرض ائتدی شه دوران
ولی #کاتب خیابانی غلام شاه دور الان
حسین شوری اولان باشدا نه لازمدور اونا انسان
فقط عشق حسین آخر منه نطق و بیان ویردی
.
.
.
#حضرت_معصومه_شهادت
#فلک_معصومیه_اول_گون_که_قم_شهرین_نشان_ویردی
#صبا_تبریزی
#ترکی
#زبدةالاشعار
نظر دهید