عنقای قاف وحدت
زبانحال حضرت ابوالفضل علیه السلام
.
✍️ #زبدةالاشعار ✍️
.
🆔: @nohe_torki
.
مرحوم هادی تبریزی
.
قاف وحدتده پرآچموش سیر ایدن عنقای عشقم
قانیله دولموش سو مسکس تشنه لب سقّای عشقم
.
من کلیمم کربلانی دوندرن شورای طوره
نخله تک سینمده اوخلار غرق اولوب دریای نوره
گَل حسینیم گَل بغیشله فیض حق شور حضوره
سن انا الله سویلین من طالبم موسای عشقم
.
.
کاش اوجا داغلاردان آشمیش چشمه چشمه قانیم اولسون
چشمه لر تک گوزگوز اولموش چشم خون افشانیم اولسون
پا نثار مقدمونده مین باشیم مین جانیم اولسون
من فدای راه حقّم باش ویرن یحیای عشقم
.
.
مست صهبای الستم سر خوش جام ولایم
سر خوش جام ولایم من بلایه مبتلایم
یادگار شاه مردان مرتضی شیر خدایم
شیرزادم شرزه شیر بیشۀ دنیای عشقم
.
.
آتماسا باش باش خیالین باش اولانماز باش آتمانماز
آچماسا پر سینه اوخدان مقصد عشقه چاتانماز
گوز گوز اولموش گوزجمالون گورمه سه گوزده یاتانماز
گوز گوز آچسون گوزگوز اولسون من گوزی بینای عشقم
.
.
راضیم سینمدن آخسون قان سیلی سطح زمینه
سیل سولار آخسون سو ویرسین کِشتۀ قرآن و دینه
کربلا تاریخی یاز سون مرحبا امّ البینه
من او تفسیره گتورموش شرح ایدن طغرای عشقم
.
.
شهریار راه حقّه من سپه سالار حقّم
کفر ایچینده قانه باتموش قان توکن سردار حقّم
پرچمی دوتموش کسیلموش الده پرچمدار حقّم
رزم ساز بی مثال عرصۀ هیجای عشقم
.
.
اَل کسیلسه قول کسیلسه ضرب شمشیریم کسیلمز
باش کسیلسه سینه لردن نقش تصویری کسیلمز
قرنلرده کربلاده بانک تکبیریم کسیلمز
مین یول اُولسم اُولمرم من زندۀ عیسای عشقم
.
.
قان توکن اوخلاردان آلدیم قانیله قان دستمازین
توپراقا بیر جوت الیله آچموشام قان جاتمازین
مقتدا سنسن سنیله تا قیلام عشقین نمازین
تا بقا ایتسون فنادن منده رهپیمای عشقم
.
.
عاشق صادق چوورمز یوز تمام کایناته
خضر تک ظلمتده قاچماز چشمۀ آب حیاته
سو” ندور تا تشنه لیقدان گوز تیکم آب فراته
یر سو اولسا ایچرم من تشنۀ سیمای عشقم
.
.
جان ندور جاندا سنوندور من یولوندا جانفشانم
بیر غلامخانه زادم خاکسار آستانم
زینبه سینمیش باشیله ناقه لرده پاسبانم
پاسبان کاروان زار و جانفرسای عشقم
.
.
من آغیر داغ تک دایانموش هیبت اللهم حسینیم
موج ایدن دریایه بنزر غیرت اللهم حسینیم
قدرتی گیتمز قوتولماز قدرت اللهم حسینیم
دوشمیوب دوشمز یخیلماز حصن پا بر جای عشقم
.
.
آز قالور شورِ وِلادن جام جسمیمدن داشام من
بو بلالی چولده قانلی قوملار اوستوندن آشام من
سن دیمه قارداش دینمور دل سنیله قارداشام من
حلقه بر گوشم غلام سرور و مولای عشقم
.
.
اود دوتوب یانقیندا یاندیم یاندی مغز استخوانیم
انتظارون چکماق اولمور قاندی چشم ناگرانیم
من خلیلم هجر اودوندا گُل” جمالون گلستانیم
گُل دالیندا دالدالانموش بلبل گویای عشقم
.
.
دللره دوشموش دیولموش دلده کی ذکر جلی سن
ظلمت ایچره مرد حقّه شمع نورِ منجلی سن
«هادیه» لطفا نظر قیل سن حسین ابن علی سن
چنگ ویرموش دامنیمدن من سنه همپای عشقم
.
.
.
#عباسیه_هادی_تبریزی
#عباسیه_شهادت
#قاف_وحدتده_پر_آچموش_سیر_ایدن_عنقای_عشقم
#ترکی
.
✍️ #زبدةالاشعار ✍️
.
🆔: @nohe_torki
نظر دهید