قان اولوب ویرانه ده باغریم مصیبتدن بابا #حضرت_رقیه_عاصی_تبریزی

زبانحال حضرت رقیه خطاب به سر مقدس پدر
.
.
.
مرحوم عاصی تبریزی
.
.
قان اولوب ویرانه ده باغریم مصیبتدن بابا
یاخشی گلدون گل منی قورتار بو ذلّتدن بابا
.
.
کیم بولور بو مدتی من نه مصیبت چکموشم
خاطریم درده گلوبدی بس که ذلّت چکموشم
درموشم هر بیر غمه رنج و ریاضت چکموشم
مقصدیم گلموش اله کامل ریاضتدن بابا
.
.
کثرت غمدن دولوبدور گوندوزوم آخر گجه
صبح و شامی شامده عمروم گچوب بولمم نجه
سن گرکدور تئز گلیدون قالموسان گر چه گجه
ائتمرم اما شکایت درد فرقتدن بابا
.
.
غفلتی اولدی نچون بو گلماقون ای شهریار
پیشوازوندن سنون دنیاجه اولدوم شرمسار
من گرک بو گلماقا بیر نقد جان ایلوم نثار
قورتولام تا اینکه من بیر بیله خجلتدن بابا
.
.
درد هجرانون منی بیر عمر سالدی مشکله
شوق وصلون عاقبت چکدی خرابه منزله
یاخشی گلدون نصف شبده گویلومی گتدون آله
اشگیمی پاک ایلدون لطفونله صورتدن بابا
.
.
شرح وئرسم چکموشم گر بو سفرده من نلر
قورخورام آخر یتیشسون قلبوه مندن کدر
سیلی زجر و سناندان وار عذاریمده اثر
هی ووروبلار آغلیاندا من ، عداوتدن بابا
.
.
پا پیاده گلماقیمدان ائتمرم هرگز گله
سهلدور اولموش نچه یردن ایاقیم آبله
تازیانه ضرب سیلی یا فشار سلسله
بیر اسیره چوخ دگول اهل شقاوتدن بابا
.
.
کنج ویرانه اسیرون شأنینه مرسوم اولوب
آج سوسوز قالماق یتیمه لازم و ملزوم اولوب
شام تک یولدا دوگولماقیم گنه معلوم اولوب
آیریلا ممکن دگول معلول علتدن بابا
.
.
منجنیق غم پریشان گوگلومی از بس سخوب
سرّی وار بو نوعیله نالم بابا عرشه چخوب
ناقه اوستن ساربانیم بسکه یوللاردا یخوب
ایمدیده قورتولمیوب جانیم او زحمتدن بابا
.
.
من بابا آسوده لیق فکرین باشمدان آتموشام
روز و شب خون جگر بو گوز یاشیما قاتموشام
آج سوسوز ویرانه ده توپراق لار اوسته یاتموشام
گل یوزوم گور بیر نچه دوشموش طراوتدن بابا
.
.
ایستمردوم چکدیقیم جور و جفانی سان وئرم
یا پریشان گوگلومون حالین سنه اعلان وئرم
لیک خوشلاردیم یوزوم باری یوزونده جان وئرم
حمد لله ایمدی قورتولدوم او حسرتدن بابا
.
.
قید ظلمیله بابا بال و پریمدن بسته ام
طاقتیم قالموب داخی رنجور راهم خسته ام
عمریمون ساعتلری باشه یتوب جان اوسته ام
قال منی باری گوتور خاک مذلّتدن بابا
.
.
نه دیوم سن سیز بابا شامه دونوب دور گوندوزوم
مین بئله ظلمه گئنه صبر ایلرم یوخدور سوزوم
نیلیوم امّا شماتت چکماقا قالموب دؤزوم
گلموشم تنگه داخی طعن و شماتتدن بابا
.
.
یوخ الون باری دیم لطفیله بیر چک باشیمه
آچ او قانلو گوزلرون ایله نظر گوز یاشیمه
اذن وئر عمّم خبر وئرسون على قارداشیمه
فیض آلوم آخر نفس اول ماه طلعتدن بابا
.
.
ایندی که بو نصف شبده ائتموسن رنجه قدم
باشیم اوسته گلمسین ای شهریار محتشم
گل بیزی آخر دولاندور باشیوه قیل دفع غم
هم منی هم عاصینی قورتار اسارتدن بابا
.
#حضرت_رقیه #عاصی_تبریزی
#حضرت_رقیه_شهادت
#قان_اولوب_ویرانه_ده_باغریم_مصیبتدن_بابا
#ترکی
#زبدةالاشعار