قرار و صبریمی آلمیش باشیمدا کی شور #عید_قربان #صافی_تبریزی

عید قربان
#گریز #اکبریه_شهادت
.
#زبدةالاشعار
.
: @nohe_torki
.
مرحوم صافی تبریزی
.
قرار و صبریمی آلمیش باشیمدا کی شور
او شوریدن اورگیمده واریمدی بیر منظور
.
بودور خیالیم ایدم شرح عید اضحانی
ندور بو قصّه بولونسون ندور بو قربانی
.
یتیشدی عالم رؤیاده امر ربّ جلیل
اوز اوغلینی کسه قربان ره وفاده خلیل
.
گلوب خیالینه تردید گوردی رؤیانی
اودور همان گجه نون ترویه قالوب آدی
.
ایکیمجی گیجه گورنده اوزی دئدی صدّق
آدی قالوب عرفه شکّیدن چیخوب مطلق
.
اوچومجی گیجه دئدی هاجره او پیر نبیل
صباح منله قوناقیدور مناده اسماعیل
.
ایشیتدی هاجر اوغول صبح اولوب قوناخ گیده جاخ
او فکریله که اونی نچّه لحظه ترک ایده جاخ
.
بونیله بیله دییه بولمرم آنا یاتدی
یوخودادا دیمه بو فکری باشدن آتدی
.
#گریز
.
گلور خیاله بو حالیمده لیل عاشورا
او گجه نی نجه صبح ایتدی بینوا لیلی
.
بولوردی اکبری صبح اولسا قانینه بویانور
آنا اولان مگر عالمده بو غمه دایانور
.
همین که بیکس امامین مرامینی سچدی
اوتوردی صبحه کیمی اوغلونا کفن بیچدی
.
خیالیده باشا اکبر قراسینی سالدی
علی علی دئدی بیر ایل گجه اویاق قالدی
.
نه بیر آنا گورونوب بو جهاندا لیلا تک
نه بیر اوغول او شبیه امیر بطحا تک
.
او واقعه که بو باجا گریزه اولدی سبب
گرک تعاقب اولا ناقص اولماسین مطلب
.
ادامه #عید_قربان
او دم که یتدی باشا شام وصل اسمعیل
او صبح فرقت اولوب تیره بیر شبه تبدیل
.
بیاض گردنینی تا نشان ویروب خورشید
دوزوب او گردنه هاجر بیر عقد مروارید
.
توکردی دانۀ اشگین یوزینه گوهر تک
یاناردی اوز اودونا اودلانان سمندر تک
.
ادبلی اوغلونا زیبنده زینت ایلردی
اورگی تک الی گر چه اسردی تیترردی
.
ویراری زلفینه شانه او تیترین الینن
او طول قصّه نی ختم ایلرم بو مجملینن
.
آنا گوروب آتا کاردیله ریسمان ایستر
وجودی رعشه دوتوب بیله بولدی جان ایستر
.
سؤال ایلدی بو باره ده او سروردن
اساس مطلبی مستور قیلدی هاجردن
.
جواب ویردی اورکدن شکاره میلیم وار
پیچاقیله ایپی لازم بیلّوله اهل شکار
.
شکار ال ایاقین باغلاماقا اولسا رسن
بو کاردیله کسرم باشینی شکارین من
.
بونیله بیله گینه دوزمیوب آنا اورگی
باخاردی اوغلونا تترردی استخوان و رگی
.
#گریز
.
ولیک لیلی اوغول گوندرنده میدانه
اورک ویروردی اوزی اول جوان عطشانه
.
دییردی گیت اوغول الله یولوندا قربان اول
بو شاه تشنه لبانه مطیع فرمان اول
.
نقدر گل جسدون یاره سی چوخ اولسا خوشام
اوخیله زخم دم خنجریله دولسا خوشام
.
مرارت غم هجرون دیمه خیال ایدرم
گورنده جسمیوی باشسیز سنی حلال ایدرم
.
گلوب او دم که باخوب نعشیوه کباب اولدوم
او وقت بولّم اوغول منده کامیاب اولدوم
.
ادامه #عید_قربان
.
خلاصه گتدی منایه خلیل دلبندین
خدا بیلردی مرامین او آرزرمندین
.
ازل او گوردوقی رؤیانی ایلدی اظهار
عجبدی اولمادی راضی که ایلسون تکرار
.
ادبله عرض ایلدی اول مطیع حکم الله
اولان قضیّۀ انّی ارایه خاطرخواه
.
بابا اونا که سنه امر اولوب ایله اجرا
بو تزلیقیله تاپارسان منی قضایه رضا
.
ایاقمی الیمی باغلا ای بابا محکم
باشیمی کسگیله تا یتمسون وجودیوه غم
.
کسنده باشیمی شاید گتورمیم طاقت
ایاقیمه الیمه ای بابا ویرم حرکت
.
همی ایدم بابا من ترک احترام و ادب
همی سنون اولا قلبونده اضطرابه سبب
.
مباد قانم آخاندا دگه بو دامنیوه
او قان سبب اولا گوردوقجه داد و شیونیوه
.
یوزیمی قوی قوری توپراقه ای بابا بیرده
که خوشدی گر اولا قربان حق یوزی یرده
.
اوغول ایاقین الین باغلادی طنابیله
پیچاقینی گوتوروب بی حد اضطرابیله
.
قوری یر اوسته گورنده یوزینی غملندی
ذبیح حالی خلیل خداده گورسندی
.
آتا اوغول وارکن وار حیاتیدن دویدی
اوغول بوغازینه بولمم نجه پیچاق قویدی
.
بوغاز کسیلمدی چکدی پیچاقینی کرّات
او گوردوقی ایشه قالدی اوزی اورکدن مات
.
الینده کی پیچاقی غیظه گلدی ووردی داشا
بسان رشتۀ دل داش کسیلدی یتدی باشا
.
اوغول باشینی گینه کسماقا هوسلندی
فصیح لحنیله الده پیچاقی سسلندی
.
خلیل امر ایلیری کس جلیل نهی ایدیری
دیمه که اوز باشینا سن پیچاق خطا گیدیری
.
گلوب طلاطمه دریای لطف ربّانی
قبول اولوندی خدا درگهنده قربانی
.
آچلدی باب کرم نازل اولدی جبرائیل
گتوردی بیر قوچ او بی مثل و بی عدیله بدیل
.
یتوردی دوست پیامین او پیک فرخنده
بدل اگر چه دگلدی ذبیحه زیبنده
.
ولی اولوبدی او ذبح عظیمدن مقصود
عزیز فاطمه زیبنده فدیۀ معبود
.
#گریز
.
اوغول فداسینی لایق بولوب حسین ایتسون
که تا هر ایکی جهاندا مرامینه یتسون
.
اوغول رضاسیله قان ایچره ال ایاق چالسون
او حالی گورسون اوغولدان آتاسی کام آلسون
.
فدا اولوم سنه ای کوی عشق سلطانی
جهاندا سن کیمی کیم ویردی دوست قربانی
.
حرم سراسینه تا اکبرین سسی گلدی
قیزاردی رنگی بیله بیلدیلر که دینجلدی
.
کمال وجدیله گلدی اوغول باشی اوسته
گوووب نشانۀ شقّ القمر قاشی اوسته
.
رکابیدن چیخادوب اوز ایاقلارین بیردن
گوتوردی بیر یارالی پیکری قوری یردن
.
باسوبدی سینیه بیر نقد جانی جان اوسته
سالوبدی سرو چمن سایه ارغوان اوسته
.
سپاهیدن او جنابه باخان بیله بولدی
گر اکبر ئولمسده وار یقین حسین ئولدی
.
قالوب یوزینده یوزی جان ویریردی ظاهرده
او حالی ذکر اولونور ایمدیده منابرده
.
پیمبر عطرین آلوردی اوز اوغلی اکبردن
گوتوردی توشۀ دل مظهر پیمبردن
.
او شاهزاده یوزیندن کنار ایدنده یوزین
غریبه منظره قیلمشدی شهریار اوزین
.
باخان گوروردی نه حسرتیله اکبرینه باخور
سرشگ چشمی کیمی قان محاسنندن آخور
.
دئدی جوانلارینه اکبری گلون گوتورون
آناسینا بو یارالی جنازه نی یتورون
.
نجه گوتوردوله بولمم گل ورق ورقی
خیمه قباقینه گتدیله تازه گل طبقی
.
ادامه #عید_قربان
.
گینه رجوع ایدرم باشداکی یازدیقیم سوزیمه
او قصّه ختمینی چون فرض بولمیشم اوزیمه
.
خلیل گتدی ذبیحی سلامت و خوشحال
آناسینی یتیشوب گوردی مضطرب احوال
.
آنا بالایه باخوب گلدی تازه دن هوسه
بالا آنا ایکیسی ویردیلر نفس نفسه
.
آنا اوغول بوغازیندا پیچاق یرین گوردی
محبّتین اثرین اهل عشقه بیلدیردی
.
دایانا بولمدی بی اختیار غشّ ایتدی
گلنده حاله باخوب بیرده هوشدن گیتدی
.
آنا اورگی اولورموش اگر بیله بی تاب
ندور بو باره ده منظور اولان سؤال و جواب
.
که بیر پیچاق یری گورماقیله بو حاله قالور
گیدور اوزیندن او حالینده مین خیاله قالور
.
#گریز
.
اولیدی کول باشینا کاش فانی دنیانون
یتنده قتلگهه نولدی حالی لیلانون؟
.
گوروب که اکبری میداندا قانه غلطاندور
خیال ایلدی بیر باصفا گلستاندور
.
که هر یارا باش آچوب سینه سینده بیر گل تک
اوزین ایتوردی شور اوسته گلدی بلبل تک
.
دیمه که محو گل سرو بوستان اولدی
بسان بلبل شوریده نغمه خوان اولدی
.
دوشندی شاخۀ گل اوسته باشلادی فریاد
چکردی داد دییردی اوغول ایوین آباد
.
گیچنکی عمریدن عالمده بهره مند اولدوم
بابان یانیندا علی منده سربلند اولدوم
.
تمام زحمتمون اجرینی بو گون آلدیم
یوزوم آق اولدی سن ئولدون باشا قرا سالدیم
.
بو قیلدیقون خدماته ئولونجه ممنونم
نه لیلیم که سنون عشقویله مجنونم
.
بهار گلشن رویون خزانه دوندی اوغول
سنیله من خوش اولان بیر زمانه دوندی اوغول
.
اولام بو نشئه ده پرده نشین دگل جایز
گرک بیر عمریده صحرانورد اولام سنسیز
.
باشی قرالی قولی باغلی گوزلریم گریان
گیدم گرک دولانام شهر شامی سرگردان
.
دایاندی خامه دایان «صافیا» تمامه یتور
بو نامۀ غمی ختم ایله خاصّ و عامه یتور
.
بو نوع شرح دل اولماز بو قسم نطق و بیان
یازیلمیوب بیله شیرین وقایع قربان
.
.
#اکبریه_شهادت
#قرار_و_صبریمی_آلمیش_باشیمدا_کی_شور
#ترکی
.
#زبدةالاشعار
.
: @nohe_torki