شهادت امام رضا (ع)
..
..
علیرضا حضرتی (ناعمی)
..
..
قلبیم آلیشوبدور یئتیش امداده جوادیم
غربتده بو بی یاوری سال یاده جوادیم
گل داده جوادیم
..
..
ای گوزلریمون نوری گوزوم یولدا قالوبدی
آهیم شرری فرشیدن عرشه اوجالوبدی
زهرین اثری پیکریمه رعشه سالوبدی
وار شور و شراریم هامی اعضاده جوادیم
..
..
قلبیم بالا غربتده غم هجره یانوبدی
گوز یاشیم آخور کاسۀ صبریم جالانوبدی
تئز گل یارالی قلبیمه چون اود قالانوبدی
آغلور منیم احوالیمه زهراده جوادیم
..
..
سندن صورا یوخ هئچ کسیم ای نور نویدیم
بو عالم پر غمده فقط سن سن امیدیم
دنیاده بئله رسمیدور ای سرو رشیدیم
سسلر آتا اوز اوغلونی فریاده جوادیم
..
..
ترک ایله وطن ملکونی ایرانه گل اوغلوم
یثربده دایانما بو خراسانه گل اوغلوم
باش چکماقا بو قلبی پریشانه گل اوغلوم
حسرتدی گوزوم قامت شمشاده جوادیم
..
..
گل اول بو چتین وقتیده اوغلوم منه یاور
کی زهر ائلیوب قلبیمی باشدان باشا اخگر
جان اوسته غریبانه بو گوزلر سنی گوزلر
حسرت گوزوم اول دیدۀ شهلاده جوادیم
..
..
غملی ئورگین سن سن اوغول غملی طبیبی
غملی آتانون غملی گونی غملی حبیبی
گل غملی چاغیم درک ائله بو غملی غریبی
غم موج ویرور سینۀ سیناده جوادیم
..
..
تالان اولونوب قلبیمون آرام و قراری
گل آل دیزون اوسته باشیمی مهریله باری
جان اوسته دی دوندر آتاوی قبلیه ساری
وئر ذوق و صفا بو دل ناشاده جوادیم
..
..
عمر آینه سی دگدی جفا داشینه اوغلوم
غربتده ئوزوم غرقیدی گوز یاشینه اوغلوم
گل قوی الیوی بیرجه ئورک باشینه اوغلوم
وار درده دوا اول ید بیضاده جوادیم
..
..
گل باشیمون اوسته ئوزون ای حافظ قرآن
قرآن اوخی خوش لحنیله ،خوش لحنوه قربان
بلکه اولا آیات خدا دردیمه درمان
آرامش اولا بو دل شیداده جوادیم
..
..
گل باشیمون اوسته ئورگون داغلا عزیزیم
غربتده پریشان آتاوا آغلا عزیزیم
معصومه باجیم یوخ گوزومی باغلا عزیزیم
سال آه و نوا عالم ایجاده جوادیم
..
..
بو غملی چاغیم یادیمه دوشدی شه عطشان
سو اوسته منیم جدّیم ،حسین وئردی سوسوز جان
صحرای بلاده اولوب اوز قانینه غلطان
قالدی آتاسیز قیزلاری صحراده جوادیم
..
..
قانلی باشی شامه کیمین الدن اله دوشدی
زینب باجیسی ظلمیله چولدن چوله دوشدی
آوازۀ عشقی ولی دیلدن دیله دوشدی
بر پا ائلدی هلهله معناده جوادیم
..
..
حشره کیمین عاشقلر اونون حالینه آغلار
نوحه ائلیر «ناعمی» احوالینه آغلار
اول کوفه و شامی گزن اطفالینه آغلار
گل نوحه اوخی بو غم عظماده جوادیم
..
..
#رضویه #حضرتی_ناعمی #رضویه_شهادت #ترکی #زبدةالاشعار
نظر دهید