شهادت امام حسین (ع)
..
..
غفاری زنجانی
..
..
حسینون دوره سین اعدا آلاندا
دیوب هل مین معین یالقوز قالاندا
..
اوجالدی بو صدا هر یاندا لبّیک
دوشوب سس عالم امکاندا لبّیک
..
..
چخوبدور ناله قلب آشنادن
دولوب دشت بلا آه و نوادن
گلوب گویا صدا عرش خدادن
خداوند قدیم و رهنمادن
بویوردی خالق رحماندا لبّیک
..
..
رسول الله ختم الانبیادن
ولی الله آتاسی مرتضادن
ئولن زهریله ظلماً مجتبادن
آناسی حضرت خیر النسادن
دیوبلر روضۀ رضواندا لبّیک
..
..
حسینه جان جوابی ویردی عیسی
جبال طوریده سس ویردی موسی
قزل طشته کسولموش رأس یحیى
نبیّان معظّم شیخ و برنا
دیدی یعقوب اونا کنعاندا لبّیک
..
..
دوشنده نوح طوفان بلایه
اونی طوفان گتوردی نینوایه
دچار اولدی او یرده ابتلایه
حسینی یاد ایدوب گلدی نوایه
دیوبدی نوح اونا طوفاندا لبّیک
..
..
همان یردن کیچوردی بیر گون آدم
دیللر توکدی گوزدن اشک ماتم
ایدوب شیون اولوب احوالی برهم
حسینون حالینی ایتدى مجسم
دیوب آدم حسینه اوندا لبّیک
..
..
سماده سسلنوب گویا ملکلر
گلوبدور نالیه یکسر فلکلر
روادور قان اولا غمدن اورکلر
قاچوبدی مقتله قاره لچکلر
دیردی زینب نالاندا لبّیک
..
..
حسینه جان دیوبدی قاره واشلار
هاموسی داغدیده گوزده یاشلار
هوا اوستونده هی چغرشدی قوشلار
تزلزل ایلیوبدی داغ و داشلار
دوشوب سس دشت کوهستاندا لبّیک
..
..
گلوب لبّیک صداسی نهرلردن
سو قوزاندی هوایه بحرلردن
بیاباندان قُرادن شهرلردن
صدا گلدی خفادن جحرلردن
دیوبلر ظاهر پنهاندا لبّیک
..
..
ئوزون آتدی بشیگدن شیرخواره
دیدی اولسون بوغازیم پاره پاره
گله لعنت بو قوم نابکاره
کسوبلر سویولون دوشدوم فشاره
ایچیم سو قوی دم پیکاندا لبّیک
..
..
گرک منده ایچم جام شهادت
کسه بو حلقیمی تیر شقاوت
گلنده محشره روز قیامت
ایدر الله ئوزى اوندا قضاوت
منم شاکی همان دیواندا لبّیک
..
..
پروندن قوزانوب بیمار خسته
امام چارم اول ماه خجسته
توانا اولمادی اول دل شکسته
دوباره نقش اولوب تپراقلار اوسته
دیوب اول حافظ قرآندا لبّیک
..
..
ندور چارم دیدی عمه نئدوم من
گتور وئر بیر عصا تکیه ائدوم من
بابام یالقوز قالوب یاور گیدوم من
چنین حالدا اونا امداد ایدوم من
قالوب تک عرصۀ میداندا لبّیک
..
..
که بیرده قانه غرق اولموش بدنلر
حسینه جاننی قربان ویرنلر
دوشن میدان جنگه بی کفنلر
دوروب بیردن هاموسی سلنللر
مطیع اَمرویک هر آندا لبّیک
..
..
او علقمده دوشن غیرتلی سردار
ابوالفضل علمدار و سپه دار
حسینه غم گونی یار فداکار
سارالموش گللره سقّای غمخوار
دیدی اول معدن عرفاندا لبّیک
..
..
وروب باشه نوایه گلدی زعفر
بلا دشتین گوروب صحرای محشر
دوروب ناگه برابرده او سرور
سلام ایتدی حسینه حال مضطر
دیدی اول مرد با ایماندا لبّیک
..
..
اولان ای تشنه لب قرآنه قربان
دیدون هل ناصر ینصر حسین جان
طنین اندازیدور هر یرده هر آن
او صوتی درک ایدوبدی اهل ایران
دیر خورد کبار ایراندا لبّیک
..
..
#حسینیه #غفاری_زنجانی #حسینیه_شهادت #ترکی #زبدةالاشعار
نظر دهید