قلم الیمده ئوزوم فکریله ملالیله #اربعین_ذاکر_اردبیلی

اربعین
.
#زبدةالاشعار
.
: @nohe_torki
.
مرحوم ذاکر اردبیلی
.
قلم الیمده ئوزوم فکریله ملالیله
اورکده سیر ائدورم اربعین خیالیله
.
او اربعین که تمام خلایق آغلادیلار
او آلتی گوشه لى قبر اوسته سینه داغلادیلار
.
نه اربعین و نه محشر نه شورش و نه نوا
قیامت اولدی عیان، ظاهر اولدی عاشورا
.
خبر وئریلدی گلون شام کاروانی گلور
حسین حرملرینون ناله و فغانی گلور
.
ملائک اندی یره آسماندان آهسته
توکولدیلر باش آچوق مرقد حسین اوسته
.
زیارت ایله دیلر چیخدیلار به راز و نیاز
ائدورله یوللارا شهپرلرینی پای انداز
.
حسین آناسی گلوب حوریان جنتیله
گوزتلیورله خانم زینبی نه وقته گله
.
خانم خدیجه خانم مریم و خانم سارا
آچوب یاخالارینی باشلاریندا شال عزا
.
ملالیله اوتورولار حسین مزارینده
قالوبلا ناله کنان زینب انتظارینده
.
اوجالدی ناگه أو وقته صدای شور و نوا
گوروندی قافله ی کاروان آل عبا
.
قاباقدا سید سجادون آه و واسی گلور
دیور حزین، حزین ای وای بابا صداسی گلور
.
توپوقلارون یاراسی قان وئرور ایاقینده
چکورله ناقه سینی قافله قباقینده
.
اوشاقلارون سسی بیر شور کاروانه سالوب
کجاوه لردن حسین وای صدالری اوجالوب
.
یتیشدی حضرت زهرا اورگونون بندی
الهی گوردیله زینب کجاوه دن اندی
.
اننده گوردیله اوّل یخیلدی بیر دوردی
ز بس بیر حالته قالموشدی هیچ تانینموردی
.
باشنا بیر باجی بیر گونده یدّی قاره سالا
ایکی بالاسی ئوله حقّی وار او حاله قالا
.
یتیملرون غمی الدن قرارین آلموشدی
او قدری غصّه چکوب یوزلری سارالموشدی
.
توکوب سرشگ گوزوندن او گل عذارینه
سوروندی سالدى ئوزون قارداشین مزارینه
.
دئدی برادر اجل یتمه دی منه گلدیم
دییردیم ئوللم حسین ئولمدیم گینه گلدیم
.
وصال جامی فراقونده دولمیوب قارداش
یارالارون بیلورم یاخشى اولمیوب قارداش
.
رقیه دردی بلورسن قراریمی آلدى
اوتانورام دئمه گه شامیده غریب قالدى
.
اورکده بیر نچه کلمه دئمه لی دردیم وار
دئسم دیلیم یاناجاق قالسا قلبیمی داغلار
.
دئدی دئدی اورک آرام اولمیور گوردی
قولونی چمرادی قمچی یرین نشان وئردی
.
نشان وئرنده خدایا او خرداجا بالالار
او قدر آغلیوب آز قالدیلار هلاک اولالار
.
دئدی دئدی او قدر آغلادی اولوب خسته
بلالی باشینی قویدی او غملى قبر اوسته
.
او وقته خرداجا بیر قز گوزین دولاندیردی
او گوز یاشین بله توکدی هامونی یاندیردی
.
دایاندی باخدی هراسان صولونا ساقیه
ئوزینی سالدی او دم زینبون قوجاقینه
.
دئدی بی بی بو همان یردی شمر دون دنی
قوواردی قمچی الینده اویان بویانه منی
.
بو یر او یردی بی بی خاطریمده دور بیلم
آماندی بیرده اگر شمر گلسه من ئوللم
.
بو کلمه زینبون الدن قرارینی آلدی
یوزوندن ئوپدی اونون بوینونا قولین سالدى
.
بویوردی قورخما قزیم شمردون وورا بیلمز
بالا او شامیده قالدی داخی گله بیلمز
.
حسین أو قورخولی اطفالوه فدا «ذاکر»
اورکده دردی وار ایلر سنی صدا «ذاکر»
.
#اربعین_ذاکر_اردبیلی
#قلم_الیمده_ئوزوم_فکریله_ملالیله
#ترکی
.
#زبدةالاشعار
.
: @nohe_torki