خطاب حضرت قمر بنی هاشم ابوالفضل (ع) به آب فرات
..
..
مرحوم نخستین اردبیلی
..
..
آخ ای نهرون سوئی دشت بلایه ایچمرم سندن
من ایچسم تشنه لر ایلر گلایه ایچمرم سندن
..
..
وفالی یاره من چوخ تشنه ام ، نه آب دریایه
ئوزوم بیر شربه سندن ایچمرم آخ گئت بو صحرایه
نه سن تنها هزاران نهرون اوسته سالمشام سایه
سن آب سلسبیل و کوثر اولسون ایچمرم سندن
اگر من جان وئرم جان پرور اولسون ایچمرم سندن
..
..
گئجه گوندوز آخوب سیراب ایله بو کوه و صحرانی
ایچوب ئوز قانیمی من ایچمرم بو آب دریانی
گلوب موجه قباقیمده، هَوَسلندیرمه سقّانی
رقیّم تشنه دور اصغر لب عطشان ایچمرم سندن
ئولوب یوسف سوسوزدور پیر کنعان ایچمرم سندن
..
..
سن ای آب گل آلوده بئله فکر إئتمه سوزانم
آدیم سقّادی بو صحراده سقّای لب عطشانم
بابام چون ساقی کوثردی منده صاحب احسانم
قالوب لب تشنه اطفال پیمبر ایچمرم سندن
نقدری ایچمیوب شهزاده اصغر ایچمرم سندن
..
..
سنی بو جام دستیمده ائلیکی إئتدوم آماده
عجایب منظره گوردوم بو جام عالم آراده
على اصغری گؤردوم إئدوبدور غش او اثناده
رباب هردم دیور عطشاندی اصغر ایچمرم سندن
دوتوب گهواره ده اود یاندی اصغر ایچمرم سندن
..
..
سنون نقش وجودون تشنه دلده نقشه لر چکمیش
سوسوز قال گور بو صحراده سوسوز قیزلار نه لرچکمیش
چتین عالمدی واللهی سوسوزلوق هر بشر چکمیش
ولی من اود دوتوب یانسامدا یانّام ایچمرم سندن
ئولوم چوخ چوخ چتیندور سهل سانّام ایچمرم سندن
..
..
بیر آز آهسته سسلن قیزلارین سلب إئتمه آرامین
سسون آلسا دیر یاندوم آتار الدن سویون جامین
منى زینب دعا ایلر سوسوز قیزلار دیر آمین
یولومی گؤزلیور جام ألده قیزلار ایچمرم سندن
قباقیمه گلر تلّه سوسوزلار ایچمرم سندن
..
..
شجاعت گؤستروب دشمن الیندن من سنى آلدیم
سوسوزلار ایندی آگهدی قوری مشگی سووا سالدیم
ئوزون شاهد سن ای نهرون سویی من ایچمدوم قالدیم
سوسوز دور گلشن و باغ رسالت ایچمرم سندن
نسیمون چک کناره چک خجالت ایچمرم سندن
..
..
منى اغفال إئدوب چکمه کناره راه عشقیمدن
کناره چیخمارام هرگز بو ایمن گاه عشقیمدن
هوسلنّم عقاب اوسته جلال و جاه عشقیمدن
آپارّام مشگ پر آبی خیامه ایچمرم سندن
منه ویرمه سوئی ویر اهل شامه ایچمرم سندن
..
..
سنى قانه دونیدون من سنه گوز یاشیمی قاتدوم
آقامدان بی اجازه اللریمی سنده ایسلاتدوم
حیاتیمدن کچوب آب حیات اولسون یره آتدوم
منیم نفسیم چوخ عالیدور ایچوب قان ایچمرم سندن
سو اوستونده سوسوزلوقدان ویروب جان ایچمرم سندن
..
..
نچه گوندور تیمّم ایلورم نه دستماز آلّام
نماز شب قیلوب شب زنده قالّام امتیاز آلّام
إئدوب معبوده من سو ایسته سم راز و نیاز آلّام
ولى من تشنۀ آب بقایم ایچمرم سندن
سو قولی وئرمیشم صاحب لوایم ایچمرم سندن
..
..
هله من ایچمورم تشنه عقابیم ایچمیور سندن
نچه گوندور یانور بو دل کبابیم ایچمیور سندن
نه اصغر نه رقیّه م نه ربابیم ایچمیور سندن
اگر اولسون هزاران درده درمان ایچمرم سندن
سوسوزلوقدان سو اوستونده ویروب جان ایچمرم سندن
..
..
سنون موجون گورنده موج ائدوب دردیم گلور جوشه
گلنده اصغری گوردوم رقیّم آلموش آغوشه
آچور گاهی گوزون گاهی یومور گاهی گئدور هوشه
آلوب اول منظره تاب و توانیم ایچمرم سندن
قوری پستان أمور شیرین زبانیم ایچمرم سندن
..
..
منى منع إئتمه اى نهرون سویی دیوانۀ عشقم
رقیّم شمع سوزاندور اونا پروانۀ عشقم
قرا زلفین اگر آشفته گؤرسم شانۀ عشقم
سوسوزلوقدان یانوب خاکستر اولسام ایچمرم سندن
مجاهد صحنه سینده رهبر اولسام ایچمرم سندن
..
..
بونهضت نهضت قرآندی استقلال حرّیّت
بو پرچم پرچم آزادیدی آمال حرّیّت
گرک رونق تاپا قرآن اولا اجلال حرّیّت
دانوب قرآن و دینی اهل قرآن ایچمرم سندن
مسلمانه سو ویرمور نامسلمان ایچمرم سندن
..
..
نولیدی بو نسیمی اصغر شهزاده گؤرسیدی
سویون رنگین سوسوز ماهی لب دریاده گؤرسیدی
ئوزون لب تشنه بو نهرون سویون آماده گؤرسیدی
ایچردی او ، دوشردوم من عطشدن ایچمرم سندن
چکردی نفسیم ال بو کشمکشدن ایچمرم سندن
..
..
بورا بازار کالادور خریدارون سوسوز قیزلار
زیارتگاهیدور گویا که زوّارون سوسوز قیزلار
یانان دلده دوتوب اوچ گوندی آمارون سوسوز قیزلار
کسیلسه هر طرفدن گر علاجیم ایچمرم سندن
سنه بیر ذرّه یوخدور احتیاجیم ایچمرم سندن
..
..
علی اکبر ئولنده آتمیشام سو فکرینی باشدان
او قان ایچدی ایچم من سو سن آخ گئت داغیدن داشدان
عبانی ردّ ائدوب گؤردوم سو ایستور باجی قارداشدان
بو قان رنگین ائدن صحرانی دوتسون ایچمرم سندن
آخوب ئوز باشووه هر یانی دوتسون ایچمرم سندن
..
..
سوسوزلار ناله سى من تک سنون آرامووی ئولسون
سو جامیندن چیخان ناله سنی ده ناله دن سالسون
نچه گون خوردا قیزلار گون قباقینده سوسوز قالسون
قسم اولسون شهیدان قانینه من ایچمرم سندن
قسم اولسون حسینون جانینه من ایچمرم سندن
..
..
قسم اولسون علىّ اصغرون مهر و وفاسینه
قسم اولسون وفالی قاسمون قانلو حناسینه
قسم اولسون حسینون قلبنون اکبر یاراسینه
عطشدن چکسه شعله یانسا قلبیم ایچمرم سندن
حسینیم ایچمیوبدور ایچسه هر کیم ایچمرم سندن
..
..
«نخستین» اولمیوب اولماز بئله بیر باوفا قارداش
حسینه باش و جانیندن گئچوب اولدی فدا قارداش
سوسوز جان وئردى نهر اوسته ائله صاحب لوا قارداش
ئولونجه سؤیله دی آب فراته ایچمرم سندن
گئجه گوندوز سو ویرسون کائناته ایچمرم سندن
..
..
#عباسیه #نخستین #فرات_نخستین #عباسیه_شهادت #ترکی #زبدةالاشعار
نظر دهید