قیتدی خیمه سینه اول امام فوز و فلاح #وداع_قمری

وداع حضرت ابی عبدالله الحسین (ع)
..
..
..
مرحوم قمری
..
..
..
قیتدی خیمه سینه اول امام فوز و فلاح
قویوب برابره صندوق آچدی رخت و سلاح
..
سلاحه وورمادی ال تاجدار ملک عرب
خطاب قیلدی که ای معدن حیا زینب
..
مُصَمَّمِ سفرم امریمی تمامه یتور
قباقه گیماقا بیر دست لباس کهنه گتور
..
گلوبدی ناله و فریاده زینب آغلادی قان
دیدی بلالریوه زینبون اولا قربان
..
سپهر عزّته تابنده ماه سن قارداش
جهان و آخرته پادشاه سن قارداش
..
بوگون سوارا اولوسان زین ذولجناح اوسته
باخار جلالوه بوقوم دسته به دسته
..
وجودی ذى شرفون منظر خلایقدور
لباس کهنه حسینیم سنه نه لا یقدور
..
بویوردی زینبه فرزند ارجمند رسول
بیر اوزگه امردور ای نایب جناب بتول
..
دوشنده من یره آتدان بو قوم کینه شعار
سویار لباسیمی قویماز نه جامه نه دستار
..
گیوم لباسیمین آلتندا کهنه نی باجی جان
که بلکه سویمویالار جسمیم اولمیه عریان
..
غرض او سرور والامقام و عرش اساس
ازل مبارک اولان جسمه گیدی کهنه، لباس
..
اوزاتدی پنجۀ مردانه سین شه دو سرا
گوتوردی دستینه عمّامۀ رسول خدا
..
نجه عمامه که هر تاری رشگ گیسوی حور
نجه عمامه تجلّی سی مثل قبّۀ نور
..
نجه عمامه که هر پیچ تابی رشتۀ جان
نجه عمامه چو خورشید طالع و تابان
..
نجه عمامه سپهر جلالته زیور
نجه عمامه صفا بخش خسرو خاور
..
نجه عمامه چو استبرق قصور جنان
باخاندا هر تلی تفسیر آیه قرآن
..
نجه عمامه سراج منیرشاهانه
جنود خیل ملک دوره سینده پروانه
..
همان عمامه ئیدی آلدی نه فلکدن باج
قویولدى عرش خدا اوسته لیلة المعراج
..
همان عمامه ئیدی ایلیردی عالمه ناز
قویاردی باشه حبیب خدا قیلاندا نماز
..
همان عمامه نی چون قویدی باشه اول سالار
که گونیا قمر اوستونده شمس دوتدی قرار
..
قمیص یوسفی گیدی ولیّ حیّ ودود
مرتب ایلدی اوستونده جوشن داوود
..
عطا و بذل ایچون اول جودیله سخا کانی
گچوتدی بارماقینا خاتم سلیمانی
..
گیندی جوشنین اوستن خَز ملوکانه
غنیمت آرتوق اولا تا که قوم عدوانه
..
چو کتفینه سپر حمزه اولدی پیرایه
گورن دیردی قمر چخدی طاق مینایه
..
آپاردی ارث شجاعت گتوردی ارث وفا
او سیّدالشّهدادن بو سیّدالشّهدا
..
حمایل ایلدی قرآن او ناطق قرآن
باخوب جلالینه قرآن صاحبی دیدی جان
..
بلینه باغلادی تا ذوالفقاری حیدروار
سما و ارض و سَمَکدَن کسیلدی صبر و قرار
..
سلاح رزمیله اعضاسینی ز سر تا پا
مُزَیّن ایتدی جلالیله شاه دین آرا
..
دولاندیروب گوزونی اهل بیته قیلدی نگاه
درون سینۀ سوزان دن چکوب بیر آه
..
..
..
#وداع #قمری #حسینیه_قمری #حسینیه_وداع #حسینیه #ترکی #زبدةالاشعار