زبانحال حضرت زهرا(س)
.
.
محیر اردبیلی
.
.
لطف ایدوب بو دلفکاری ایله سر فراز عم اوغلی
دفن و کفنیمه کفیل اول قیل اوزون نماز عم اوغلی
.
.
آیریلوق غمی اگر چه روحیمی ایدوبدی خسته
عازمم حضور حقّه سینه یاره دل شکسته
درگهیمی یاندیرانلار گلمه سون جنازم اوسته
یوخ بوایشده سندن ئوزگه بیر کسه نیاز عم اوغلی
.
.
مجلس نشاط و عیشه هرگز عادت ایتمدیم من
گورمدیم جهاندا خوش گون استراحت ایتمدیم من
هر غم و بلایه دوزدوم هیچ شکایت ایتمدیم من
صبر مکتبینده آلدیم عالی امتیاز عم اوغلی
.
.
دمبدم غبار محنت اوستومه منیم الندی
گون به گون ملالیم آرتدی هر دقیقه تازه لندی
قاره زلفلریم آغاردی قامتیم خمیده لندی
غم لریم زیاده اما عمریم اولدی آز عم اوغلی
.
.
هر زمان که ایسته سیدیم ایلیم ادا نمازیم
کشف اولا حضور حق لایزاله دلده رازیم
تز حسین دوروب ایاقه پهن ایدردی جا نمازیم
زینبیم ایدردی حاضر آب دستماز عم اوغلی
.
.
یوخ سوزوم حسین سپهر معرفتده اولدوزوندی
سفرۀ محبتونده هم دادوندی هم دوزوندی
سنّیده اگر آز اولسا زینبیم بیوک قزوندی
سنده منتک اول خریدار ایلینده نازعم اوغلی
.
.
چکمه سایۀ علاقون سن کناره زینبیمدن
لطفوی کم ایتمه هرگز بختی قاره زینبیمدن
گلمیوبدی بیرده گلمز روزگاره زینبیمدن
هیچ کیمون اونون تک اولماز محنتی دراز عم اوغلی
.
.
جام چشمی قیل محبت اشک حسرتیله دولسا
ئوپ یوزین نوازش ایله گل کیمی جمالی سولسا
سن ئوزون یتش همیشه بیل اونون نه دردی اولسا
قز غم ایلمز آناسی اولسا دلنواز عم اوغلی
.
.
بلبلان پرشکستیم قویما سینه داغلاسونلار
باب محنتی همیشه یوزلرینه باغلاسونلار
آغلیان زماندا یوللا قبریم اوسته آغلاسونلار
روحیمیلن ایلیوم تا منده پیشواز عم اوغلی
.
.
فرقتونده حشر اولونجا گرچه سینه داغلارام من
صفحۀ عذاره اشک حسرتیمی باغلارام من
آغلاسا اگر حسینیم قبر ایچنده آغلارام من
شیونه گتورّم عرشی دلده سوز و ساز عم اوغلی
.
.
وار یری شراره سالسون عالمینه شور و شینیم
قورخورام چکه اذیت فرقتیمده نور عینیم
آغلیا او قدری آخر غصّه مرگ اولا حسینیم
ظلمیله دونه خزانه گلشن حجاز عم اوغلی
.
.
بو «محیّری» یوروبدی ناملایمات دنیا
یوخدی صحّتی بدنده روحی چوخ چکوبدی ایذا
ایلیوب منه توسّل سندن ایلیور تمنّا
ایسته تا ویره شفاسین حیّ چاره ساز عم اوغلی
.
.
#فاطمیه #محیر_اردبیلی #ترکی #فاطمیه_شهادت #زبدةالاشعار
نظر دهید