#خطبه حضرت زهرا (س) در مسجدالنبی(ص) در مورد #فدک
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
مرتضادن فاطمه کسب اجازت ایلدی
حقین اثبات ایتماقا مردانه همت ایلدی
.
.
چادر عصمت باشندا عصمت پروردگار
چیخدی ایودن مسجده گوز یاشلی اولدی رهسپار
گوستروب هر بیر قدم گوتدوقجا بیر دنیا وقار
خاکراهِ مقدمین مرهون منّت ایلدی
.
.
طی راه ایتدیقجا طاهایه یگانه یادگار
ایتدی گوزلرده مجسّم مصطفانی آشکار
گوردی هر کیمسه خرام نازینی بی اختیار
یاد ختم الانبیا مَشیین او ساعت ایلدی
.
.
گرچه گوردی هر گورَن انسیّۀ حورا گلور
چادر عصمت باشندا عصمت کبرا گلور
مصطفا عطرین آلوب امّا دیدی طاها گلور
جلوه گر گوزلرده طاهانی او نکهت ایلدی
.
.
گلدی یتدی مسجده قلبینده آه پر شرر
وارد اولدی مسجده ریحانۀ خیرالبشر
منبر پیغمبره حسرتله بیر سالدی نظر
صبرینی بیرمنظره تاراج و غارت ایلدی
.
.
گوردی پیغمبر یرینده اگلشوب اوّل دنی
یادینه دوشدی آتاسی مهر و رأفت معدنی
اودلانان قلبی یانوب دلدن اوجالدی شیونی
گل یوزه گوزدن نثار اشک حسرت ایلدی
.
.
آغلادی بیر حالیله دخت رسول تاجدار
حال حُضّاری پوزوب سلب ایتدی دللردن قرار
اهل مسجد نالیه گلدی هامی بی اختیار
یاندی هر بیر دل سزیلتی ایله شدّت ایلدی
.
.
ئوزگه بیر عالم او دم مسجدده اولدی آشکار
گوئیا ایلوب اوگون رحلت رسول تاجدار
نالۀ وا مصطفائیله دولوب هر بیر کنار
سینه لردن ناله لر تاراج طاقت ایلدی
.
.
جلب ائدوب وقریله، خلقی دختر خیرالبشر
سس یاتوب اولدی جماعت اؤز یرینده مستقر
انتظار صحبت زهرا اولوبلار سر به سر
خطبه سین آغاز اول خاتون عصمت ایلدی
.
.
ایتدی حمد حق ازل ناموس حقّ کبریا
سایدی سست عنصرلره توحید حیّ لایُرا
سویلدی مطلق بد اندیشه، وئرر حق بَد جزا
خوش آلار پاداش هر کس حقَّه طاعت ایلدی
.
.
ایلیون مدِّ نظر اعمالوزی چوخ یاتمیون
بیر اولون بیدار حقّی باطلیله قاتمیون
حکم حقّی دانمیون دنیایه دینی ساتمیون
سِلم اولون هر بیر أوامر ذات قدرت ایلدی
.
.
من یگانه یادگار حضرت پیغمبرم
طاهره اسم شریفَمدور بتول أطهرم
درّ دریای حیا بحر ادبده گوهرم
خالق عالم منی کانون عفّت ایلدی
.
.
من او بانوی عفافم عفّتیم یوزده نقاب
عصمت اللّهم منه عصمتدی بیر ستر حجاب
یرده مرضیَّه اولان منصوره گویده انتخاب
حق منه لطفاً بو القابی کرامت ایلدی
.
.
فاطمه مشهور آدیم، زهرای زهرا شهرتیم
باطناً حورا اولان انسیّه ظاهر صورتیم
عنصر خاکی گورورسوز نوردور ماهیّتیم
خلق نور حقّدن خلّاق خلقت ایلدی
.
.
بَضعةٌ منّی دیوب حقّیمده باب تاجدار
حُرَّه و معصومه ام صدّیقه ام والاتبار
صدق محضم من، منه مطلق صداقتدور شعار
کیم دیر زهرا صداقتدن برائت ایلدی
.
.
ایّها الأنصار آتامدور نیّر چرخ هدا
عالمه نور نُبوّتله سالان ضوء و ضیا
ایلین ظلمات کفری گون کیمی نوری فنا
دهری روشن سالدوقی نور نبوّت ایلدی
.
.
سیز دگولدوز باغلادوز پیمان رسول اللهیله
راه دینده ایتماقا خدمت دل آگاهیله
بس ندن دینه باخور سوز دیدۀ اکراهیله
سیزلری کیم بیله کور و بی بصیرت ایلدی
.
.
گرچه گئتدی خلق ایچیندن اول رسول تاجدار
یر یوزونده لیک اونون قرآنی قالدی یادگار
جهلدن مطلق او قرآندور ائدن خلقی کنار
باخدی هر کس حکمینه درک سعادت ایلدی
.
.
بیر کلام الله دور بو مصحف پروردگار
ایلسه هر کس قرائت دردینه درمان اولار
رهنما و قاضی مخلوقدور کامل عیار
نقصی یوخ هر امر کیم قرآن کتابت ایلدی
.
.
اوندا که دویدی آتام دنیای بد بنیاندن
ایلدی دعوت قبولی حضرت جانان دن
اهل بیتیم سویلدی اولماز جدا قرآن دن
اؤز کتاب و عترتین باهم وصیت ایلدی
.
.
ای جماعت مصطفا باب کُباریمدور منیم
گل آدی سرمایۀ عز و وقاریمدور منیم
هر ایکی دنیا مباهات اعتباریمدور منیم
انبیایه حق اونی ختم رسالت ایلدی
.
.
وار یادوزدا جهل ایلردی حکومت سیزلره
خلقه سیز آزار ائدردوز خلق اذیّت سیزلره
هتک حرمت ایلماق اولموشدی عادت سیزلره
سیزلری گلدی آتام آخر هدایت ایلدی
.
.
درس اخلاق اورگدوب تعلیم قیلدی دلپسند
قویمادی وَحشیَّتَه اولسون جماعت پای بند
عالم انسانیّتدن خلقی ایتدی بهره مند
سیزلری آزاده اَز قید جهالت ایلدی
.
.
تا جهاندان ایلدی رحلت رسول ممتحن
نعشینی یرده قویوب تشکیل وئردوز انجمن
سندیروب اؤز عهدوزی اولدوز نه تئز پیمان شکن
روحوزی نه تئز مسخّر جاهلیت ایلدی
.
.
وار یادوزدا باشوزا سالدی آتام حق سایه سین
خم غدیرینده بیان ایتدی ولایت آیه سین
سیز ندن یخدوز سکوتیله ولایت پایه سین
آیه أَکمَلتُ تحکیم ولایت ایلدی
.
.
بو مگر رسم وفادور ای گروه نابکار
ایلدوز بیرده جهاندا جاهلیت اختیار
نولدی بیله حقّی داندوز حقّدن اولدوز کنار
جهل و کُفره سیزلری کیم بیرده دعوت ایلدی
.
.
بو کتابی که گتورموش مصطفای ممتحن
کیمدی آیاتین هوای نفسیله تفسیر ائدن
کیم دیور محروم دور زهرای اطهر اِرثدَن
هانسی آیه بو سوزه آیا دلالت ایلدی
.
.
وئرمز اصلا بیر کسه رخصت او قرآن مبین
جعل ائدوب بیر سوز آتام قولونجا آچسون اؤز دیلین
حکم قرآنی دانوب امّا او مَردود و لعین
بیله بیر جعل حدیثه بوردا سبقت ایلدی
.
.
اَیُّها الانصار ایلور فاطمه سیزدن سؤال
بوقحافه ارثی اولسون بو ستمکاره حلال
لیک زهرایه حرام ارث رسول ذوالجلال
سیر ائدون کیم دینه بیر بیله خیانت ایلدی
.
.
آیه به آیه قرائت ایلیوم قرآنی من
بیر گورون نه حکم ائدور قرآن حیّ ذوالمِنَن
منکر قرآن اولوب بو مُلحِد دور زمن
دوندی ارث آیاتینی بیربیر قرائت ایلدی
.
.
سوزلرین خلقه یتوردی چوخ گوزل عنوانیله
صورته معنانی سالدی آیۀ قرآنیله
حقّین اثبات ایلدی قانع ائدن برهانیله
خلقی قانع بانوی مَهدِ بَلاغت ایلدی
.
.
غیظیله باخدی او بی شرمه بویوردی دلفکار
روز محشرده گریبانون دوتوب ای کین شعار
حقّیمی آلّام همین موقفده سندن آشکار
اوندا آنلارسان که نه قدرت حکومت ایلدی
.
.
یوز شباب یثربه دوتدی دیدی هشیار اولون
ای جوانان مدینه یاتمیون بیدار اولون
چوخ خموش اگلشمیون عالمده مرد کار اولون
حقّى باطل گورموسوز اهل ضلالت ایلدی
.
.
وار جوانلوق جانلاروزدا قوللاروزدا اقتدار
بئللروزده تیغ تیز و جانشکار و آبدار
ایلیون دامان همت لر کمرده استوار
فاطمه سیزدن قیامه استعانت ایلدی
.
.
ایلدوز أوّلده نه یاخشی قیامی اختیار
عاقبت تاپدوز نه وضع پستیله سیز إِنفِطار
سیزلرون آینده زی گورَّم زبون و خوار و زار
اوندا آنلارسوز سیزه نه خواب غفلت ایلدی
.
.
دلنشین نطقیله زهرا آلدى دللردن قرار
یوزلرینده اولدی احساسات دینی آشکار
حلقه ووردی اشک گوزلر دولدی چون ابر بهار
مسجدین اهلین گلوگیر ایله حالت ایلدی
.
.
بیر تشنُّج یوز وئروب تحریک اولوندی شیخ و شاب
آز قالوب مسجدده سالسون اهل مسجد انقلاب
مُلحِدِ اوّل گوروب اوضاعی دوتدی اضطراب
تیتردی برگ خزان تک خوف و وحشت ایلدی
.
.
ایستدی پرده چکه حقّ اوسته اُول خانه خراب
ایتدی صدّیقه بیانِ صدقیله فوراً مجاب
تاپمادی حق سوز قبالینده او بد فطرت جواب
ایستدی شاهد او دم زهرا اجابت ایلدی
.
.
حاضر ایتدی دورت نفر شاهد او بانوی جنان
بیر على بیرده ایکی نورس گل گلزار جان
شاهد اولدی هم ایکی نورسته گل هم باغبان
بیرده امّ ایمن اول امره شهادت ایلدی
.
.
چاره سیز قالدی بو صورتده او غدّار دنی
یازدی ردّ اولسون فدک زهرایه دینین دشمنی
مهر ائدوب ردّ ایتدی زهرای بتوله نامه نی
چخدی مسجددن ایوه زهرا عزیمت ایلدی
.
.
شاد و خرّم یول گئدردی دختر خیرالورا
جانی یَه توش ایتدی یول اوسته اونی امر قضا
عرض ائدوب یا فاطمه کشف ایله نولدی ماجرا
نه اولوب صدّیقه صدقیله حکایت ایلدی
.
.
بولدى تا واضح ندور مطلب او شوم کین شعار
سویلدی یا فاطمه وئر نامه نی ایلوم نظار
نامه نی ردّ ایتمدی اما رسوله یادگار
بی حیا دشمن او دم ئوزگه جسارت ایلدی
.
.
من دیمم نولدی که اولدی زار و خسته فاطمه
من دیمم قالدی نه حاله دلشکسته فاطمه
واردی بوقدرى یخلدی توپراق اوسته فاطمه
توپراق اوسته ضعف او خاتون قیامت ایلدی
.
.
ضعف ائدنده دخت فخر خاندان هاشمی
آلدیلار اطرافینی فوراً زنان هاشمی
دوتدولار قولتوقلاریندان بانوان هاشمی
تک تکی مظلومه زهرایه اعانت ایلدی
.
.
#گریز به وقایع #کربلا
.
.
دورین آلموش وئردیلر صورت حیا معناسینه
دوشمه سون بیر گوز بتولین قامت طوباسینه
بو خانم لار بیر گلیدی کربلا صحراسینه
شمر او دم که زینب کبرایه جرأت ایلدی
.
.
گوردی بیر عالم سکینه قاتدى قان گوز یاشینه
سسلدی وا عَمَّتا اشکی آخوب اؤز باشینه
دور رقیّه سال گلَن بیر معجر عمّم باشینه
خسته حالت عمّه می ظلم عداوت ایلدی
.
.
«تائبا» قرآن یولوندا واردی چوخ جدّیتون
متّقی اول تا هم آرتسون عزّتون هم قیمتون
اولماسا تقوی اگر یتمز قبوله خدمتون
بو سوزى الله قرآندا کتابت ایلدی (1)
.
(1) إِنَّمٰا يَتَقَبَّلُ اللّٰهُ مِنَ الْمُتَّقِينَ – سوره مائده آیه 27
.
.
#فاطمیه_تائب_تبریزی
#فاطمیه_شهادت
#مرتضادن_فاطمه_کسب_اجازت_ایلدی
#ترکی
.
✍️ #زبدةالاشعار ✍️
.
🆔: @nohe_torki
نظر دهید