قارداش سنون غمین بیچاره زینبی #خرابه_شام #صراف_تبریزی

زبانحال حضرت زینب كبرا (س) در خرابه شام
.
✍️ #زبدةالاشعار ✍️
.
🆔: @nohe_torki
.
مرحوم حاج رضا صراف تبریزی
.
قارداش سنون غمین بیچاره زینبی
مجنون کیمی ائدوب آواره زینبی
.
.
قالدیم بو ورطۀ عشق ایچره کالعدم
نه دیلده نطق وار، نه اختیار هم
گویا خرابه ده نقاش درد و غم
صورت کیمی چکوب دیواره زینبی
.
.
بیچاره زینبون یوخ استراحتی
سنلن بئله گئدوب تالانه طاقتی
بیگانه طعنه سی، دشمن شماتتی
گتدی زمانه ده زنهاره زینبی
.
.
کسدی سنون باشون شمر دغا، حسین
قالدیم باشی کسوک من بینوا، حسین
ویرانه لر هارا، زینب هارا حسین
سن ائتمیسن بئله آواره زینبی
.
.
ائتدون منی عجب عالمده دربدر
قالدیم بو نوعیلن لب خشک، دیده تر
گلدوم بو شامه تک، قارداش برهنه سر
آخرده چکدیلر بازاره زینبی
.
.
ویرانه گوشه سی اولموش منه قفس
بیر کیمسه یوخ ویره سنسیز سسیمه سس
اولسان خرابه ده زینبله هم نفس
گئتمز آپارسالار گلزاره زینبی
.
.
هجرونده دیده سی خونبارم آغلارام
چشم سکینه تک بیمارم آغلارام
موندان صورا حسین تا وارم آغلارام
حسرت قویوب فلک دیداره زینبی
.
.
بیر گوشه ده یاتوب بیمار کربلا
اولموش طبیبی غم، گؤز یاشی دور دوا
گول تک بوغازینی زنجیر ائدوب یارا
باخدوخجا یاندورور بو یاره زینبی
.
.
بیر یاندا اكبره سوز و گدازیله
لیلا ائدر نوا لحن حجازیله
یوخ آشنالیقی اهل مجازیله
سالمیش حقیقتاً اودلاره زینبی
.
.
صراف بیکسون یوخ کیمسه همدمی
گؤز یاشیدور اونون دینار و درهمی
هول جهیمدن بیر ذرّه یوخ غمی
اؤز دردینه تاپوب بیر چاره زینبی
.
.
#خرابه_شام #صراف_تبریزی
#قارداش_سنون_غمین_بیچاره_زینبی
#ترکی
.
✍️ #زبدةالاشعار ✍️
.
🆔: @nohe_torki