بازگشت اهلبیت (ع) به مدینه
.
✍️ #زبدةالاشعار ✍️
.
🆔: @nohe_torki
.
مرحوم منصور تبریزی
.
مسافران دیار بلا و محنت و غم
مجاوران مقام جفا و درد و الم
.
اولوبلا وارد شهر مدینه دلده فغان
گیدوبله قبر رسول خدایه ناله کنان
.
ز بسکه چکمیشیدی غصّه زینب نالان
دؤشندی قبر رسول خدایه اورک دولی قان
.
ادبله عرض ایلدی باخ بو زاره یاجدّا
گلوب نه نوعیله گور آه و زاره یاجدّا
.
گتورموشم سنه قارداشیمین ئولوم خبرین
کفایت ایلر ایدم بیر اشاره یاجدّا
.
نه حاله گور سالوب آخر حسینیوی امّت
بو قانلی کوینگه ایله نظاره یاجدّا
.
سنین گوزیندن ایراق تشنه لب قوری یرده
وجودین ایلدیلر پاره پاره یاجدّا
.
اون ایکی ضربتیله کسدیلر باشین دالیدان
آپاردیلار باشینی هر دیاره یاجدّا
.
ووروبلا باشیمیزه تازیانه لر سانسیز
چکنده مجلس شرب و قماره یاجدّا
.
گوزوم باخا باخا الدی الینه چوب یزید
دوباره ووردی دل زاره یاره یاجدّا
.
او قدری ووردی حسینین سوسوز دوداقلارینا
که آخدی قرمزی قان گل عذاره یاجدّا
.
بو سهلیدور که اسیر اولموشام قولی باغلی
چکوبله شامیده هر رهگذاره یاجدّا
.
آلیشدیران جگر زینبی شماتتدور
نقدری صبر ایده بو گونی قاره یاجدّا
.
گورن دیردی بیزه خارجی اسیری گلور
هزار لعن اولا بو روزگاره یاجدّا
.
چوخ آرزو ایدرم محضرین اولا خلوت
ایدم لباسیمی آخر کناره یاجدّا
.
نشان ویرم بابا من تازیانه لر یرینی
نئدوبله تا گوره سن بیر بو زاره یاجدّا
.
بو قدری بل داخی بوندان صورا یوزوم گلمز
تاپانمارام بو غم و درده چاره یاجدّا
.
.
.
کنار قبر رسول خداده آل الله
ایدوبله غصّه لریندن او حضرتی آگاه
.
.
.
دوروب ایاقه هامی ناله و فغانیله
بتول قبرینه گلدیله مین نواییله
.
یتیشدی زینب کبری آنا مزارینه
دؤشندی سایه کیمی قبر مشکبارینه
.
آلوب الینه حسینین او قانلی کوینگینی
آنایه اوغلونون ائتدی اشاره ئولمگینی
.
دیدی آنا بو گوگل غملر آشیانه سیدور
بو قانلی کوینگ حسین اوغلوین نشانه سیدور
.
او قدری شکوه و درد و غم و بلا ایلدی
بتول قبرینی بیر مجلس عزا ایلدی
.
باش آچدی اهل حرم چکدی ناله و فریاد
اوجاتدی اهل مدینه فغان و شیون و داد
.
دویونجا آغلادیلارفاطمه مزارینده
خانم یخیلدی آنا قبرینین کنارینده
.
همین بو غملره «منصور» اولدی چون آگاه
اودور که ختم کلام غم ایلدی ناگاه
.
.
#ورود_مدینه_منصور_تبریزی
#مسافران_دیار_بلا_و_محنت_و_غم
#ترکی
.
✍️ #زبدةالاشعار ✍️
.
🆔: @nohe_torki
نظر دهید