زبانحال حضرت ثامن الائمه امام رضا (ع)
.
✍️ #زبدةالاشعار ✍️
.
🆔: @nohe_torki
.
مرحوم کهنمویی و مرحوم ساعی تبریزی
.
معصومیه ای باد صبا گیت خبر ایله
قارداشون ئولور طوسه باجی بیر گذر ایله
.
.
.
بو گوشۀ غربتده منیم یوخدی پناهیم
هر لحظه اؤرکدن اوجالور شعلۀ آهیم
اودلی دلیمه گوزده کی گوزیاشی گواهیم
باخ حالیمه جاری یوزه اشگ بصر ایله
.
.
بو زهر جفا چوخ منیم آرامیمی آلدى
گوز یولدا یوزوم یرده الیم سینه ده قالدى
نه گلدی جوادیم نه باجیم صبریم آزالدی
تعجیل ایله گل آز منی خونین جگر ایله
.
.
چوخ سعی ایدرم بلکه بو قلبیم تاپا آرام
آخر نفسیمده سنیله قول بویون اولسام
غربت غمی تخفیف تاپار کام دل آلّام
گل بو دل پردرد ده دفع کدر ایله
.
.
هجران اودی هر لحظه یانار سینه نی داغلار
گل قویما قالا قارداشوین گوزلری آغلار
بو رسمدی قارداش گوزین آغلار باجی باغلار
گل باغلا منیم گوزلریمی دیده تر ایله
.
.
نه خوشدی یتم وصلوه هنگام شهادت
عمریمده اولان آخر ساعتدی بو ساعت
دوندر یوزیمی قبلیه جانیم چخا راحت
تأخیر ایلمه جانب طوسه سفر ایله
.
.
هرگز دیمورم گل منی گور سینه وی چاک ایت
هرگز دیمورم من اوزیوی آغلا هلاک ایت
گوز یاشیمی گور بو گوزومون یاشینی پاک ایت
بیرده منی گورماقلقا صرف نظر ایله
.
.
ایتدیقجا بدنده اثر زهره نظاره
من بیللم أؤزوم یوخدی داخی دردیمه چاره
فرشی یغورام یوز قویورام گرد و غباره
گل جان ویرورم بستریمی نرم تر ایله
.
.
بی شکّ بولوردوم باشیمین درد و بلاسین
بی شکّ بولوردوم باجیمین مهر و وفاسین
یازدیم اودی نامه باشوین آچما قراسین
محنت اوخونا سنده وجودین سپر ایله
.
.
دوشدون بولورم مندن أؤتور چوللره باجی
قمدا سنی سالدیردی مرض بستره باجی
دیداریمیزی قویدی اجل محشره باجی
قارداشون ئولور روحیوه سنده خبر ایله
.
.
قم اهلی وفا میوه سین عالمده دروبلر
چوخ عزّتیله اوردا سنه غسل ویروبلر
من یولّادیقیم نامه نی سینونده گوروبلر
بو نسگل اودی هر اوره گی پر شرر ایله
.
.
غربتده بو دنیانی باجی گوزدن آتوبسان
بیر ماه درخشان کیمی سن قمدا باتوبسان
مدفن منه بو طوس اولی سن اوردا یاتوبسان
دفن اولماقون اوردا سنی چوخ مشتهر ایلر
.
.
قلبینده باجی قارداشوین واردی بو نیّت
هر وقفه ده که قبریم اولار شیعیه قسمت
اوّل باجیمون قبرینی ایتسونله زیارت
سن خیر دعادن اولاری بهره ور ایله
.
.
خالق سنه لطف ایلر اوزی فضل کرامت
سن دفن اولان یر تاپار آفاقده شهرت
قم شهری تاپار قبریویله زیور و زینت
یات اوردا گلن زایری مدّ نظر ایله
.
.
آز فاصله واردور گوزیله قاش آراسندا
بو فاصله یوخ یولداشا یولداش آراسندا
نه علقه دی یارب باجی قارداش آراسندا
بیر روحی ایکی جسمده باخ گور گذر ایله
.
.
سالدی بو سوزوم بیر باجی قارداشی ده یاده
اولماز اولارین مثلی بو دنیای فناده
شرکت ایلیوبلر ایکیسی کرب و بلاده
درس آل ایکیسیندن اوخی کسب هنر ایله
.
.
شرکت ایلیوب آچدیلا بیر مکتب دینی
نشر ایتدی حسین قانیله هر مطلب دینی
زینب آپاروب شامه طرف موکب دینی
باخ شامده ویرانیه اخذ عبر ایله
.
.
گتدی دولانوب شام دیارین گنه گلدی
تا امن گوروبدور او یری مأمنه گلدی
آیریلمادی قارداشی یاتان مدفنه گلدی
سویلردی حسین ویر منه سس مفتخر ایله
.
.
کشف ایله «ریاضی» ندور عالمده حقیقت
بونوحه نی یازماق سنه تک اولمادی قسمت
«ساعی» سنیله ایلدى بعضی سینه شرکت
توفیق اونادا ایسته سوزون مختصر ایله
.
.
.
#رضویه_کهنمویی #ساعی_تبریزی
#رضویه_شهادت
#معصومیه_ای_باد_صبا_گیت_خبر_ایله
#ترکی
.
✍️ #زبدةالاشعار ✍️
.
🆔: @nohe_torki
نظر دهید