وداع حضرت علی اکبر علیه السلام
.
✍️ زبدة الاشعار ✍️
?: @nohe_torki
.
مرحوم حسینی سعدی زمان
.
منای عشقه گیدیرسن چوخ ایتمه سرعت اوغول
فدای حق قوی ایدوم اول جماله زینت اوغول
.
گوزیوه سرمه چکوم، زلفیوه ووروم شانه
ترحّم ایلیه شاید بو بد جماعت اوغول
.
منیم جهاندا گوزیم نوری، عزّتیم سنیدون
عزیزلیقیم دولانوب ایمدی اولدی ذلّت اوغول
.
آلوب قراریوی شوق وصال مجلس یار
ایدر شهادتوی حالتون حکایت اوغول
.
باشوا گَل دولانوم گیت آنان فدا بویووا
باشوی سینمه قوی ایله بیر محبّت اوغول
.
سولوبدی گُل کیمی رنگون، باخاندا گُل یوزیوه
یتور بو قلبیمه آثار درد و محنت اوغول
.
ایده لّه جسموی صد پاره گُل کیمی کیتسَن
نجه قویوم گیده سن ای گُل امامت اوغول
.
سن اولماسان منی شمر لعین اسیر ایدر
دیار شامه چَکر فرقه ی ضلالت اوغول
.
نجه دوزوم، نه قبیله، نه ایل، نه واردی پناه
وطن دگل آناوا بو دیار غربت اوغول
.
آتان ویروبدور اجازه دیَنمرم گیتمه
که تک قالوبدور او شاه فلکِ جلالت اوغول
.
طوی ایتمَدیم سنه، ناکام اوغول آنان ئولسون
بو قان اولان اوره گیمده قالوب چوخ حسرت اوغول
.
سنی گر ئولدوره لر بیل یقین ایویم یخولار
اولار خمیده آنان قدی سرو قامت اوغول
.
جدایه وورسالا گون تک بو نازنین باشوی
قیام ایدر منه بو دشتیده قیامت اوغول
.
گیدورسن عمّه وه تاپشور من فلک زدنی
گیدنده شامه ایده حالیمی رعایت اوغول
.
ووراندا باشیمه قمچی سپاه کوفه و شام
منه پناه اولا اول معدن خدارت اوغول
.
کفن گرک اولا بو چولده طوی لباسی سنه
یازوبدی لوحه ی تقدیره کلک قدرت اوغول
.
اولار بو دشتیده طوی حجله گاهی قبر سنه
گلوب «حسینی» ایدر قبروی زیارت اوغول
.
#اکبریه_شهادت
#سعدی_زمان
#منای_عشقه_گیدیرسن_چوخ_ایتمه_سرعت_اوغول
#لمعات_حسینی ص 126
#ترکی
.
✍️ #زبدةالاشعار ✍️
?: @nohe_torki
نظر دهید