امان نامه
زبانحال حضرت ابوالفضل علیه السلام
..
..
مرحوم نخستین اردبیلی
..
..
منه مین نامه گلسه من سنى ترک ائتمرم قارداش
قسم اللهه قووسوندا قاپوندان گئتمرم قارداش
..
..
یا کس ئوزدامن پاکون یا کس اى شه الیم قوما
دوشوب السیز دالونجان هر یره گئتسون گلیم قوما
گوزون گؤرسون بوصحراده قباقونده ئولوم قوما
الیمى کسمه سون ال دامنوندن چکمرم قارداش
..
..
منى قوسون نجف سمتین نظرده دوتموشام بیرباش
گئدوب شیر خدایه دردیمى بیربیر إئدوم من فاش
دئسم قوؤدی قاپوسیندان بابا قارداشینی قارداش
آنام زهرایه ده سندن شکایت ایلرم قارداش
..
..
امان نامه گلنده آغلادوم قارداش خجالتدن
باجیم زینب دئدوم بیلسه کوسر ماه امامتدن
دیر عبّاسه اُفّ اولسون اوزون قول سرو قامتدن
گرک عبّاس ئوله زینب دیسه بی معجرم قارداش
..
دندوم ای شمر لا مذهب حسینه نوکرم چخ گئت
حسیندن ئوزگه بیر مولا ئوزیمه بیلمرم چخ گئت
نیه گتدون امان نامه بیله اهل حرم چخ گئت
او گئتدی من خجل اولدوم نیه بس ئولمرم قارداش
..
..
آنام پاکیزه صود ویردی منه پاکیزه پستاندان
گرک عنقا کیمین شهپر آچام من تیر و پیکاندان
سراغیم نهرون اوستن یا که آلسون قانلو میداندان
گلنده باشیم اوسته من باخوب فخر ایلرم قارداش
..
..
گئجه گئجسه صباح اولسا سنه بیر امتحان وئرّم
وفالی عاشقم بیر نکته عشقیمدن نشان وئرّم
قباقونده گؤررسن من نجه مردانه جان وئرّم
بیلرسن من سنه یا قارداشام یا نوکرم قارداش
..
..
اوشاقلیقدان منه تعلیم وئردون عالى جاه إئتدون
آچوب دین مکتبین کرب و بلانی پایگاه إئتدون
توجه ایلدون سربازی گتدون سرسپاه إئتدون
گؤررسن نهرون اوستونده دوشوب خونین پرم قارداش
..
..
باخوب سن قامت عبّاسه چکمه آهی آه اوسته
مگر عبّاس ئولوب رعیت آچا ال پادشاه اوسته
کیمون وار جرأتی حمله گتورسون خیمه گاه اوسته
علمدارم سپاه عشقه من سرلشگرم قارداش
..
..
لباس عشقی اگنیندن ئولونجه سویماز عبّاسون
باجیم زینب باخوب آغلار سنى تک قویماز عبّاسون
اگر مین یاره دگه یاره اوستن دویماز عبّاسون
قولوم دوشسه باشیم سینسا غلام اکبرم قارداش
..
..
إئله سرمست إئدوب عبّاسی عشقون تشنه لیک بیلمز
دوتوبدور دامن پاکوندن اصلا گؤز یاشین سیلمز
دولانّام باشووه پروانه آسا شأنیم اسگیلمز
گؤررسن شمع عشقونده یانوب خاکسترم قاراش
..
..
اوتوز دورت ایلدی قارداش مهروه قلبیمده جا ویرّم
عوض أول خدمت شایانیمی ایلوب ادا ویرّم
بئله فکر ایلیور سعد اوغلى من عشقون فنا ویرّم
ویره عبّاسه مین تخت سلیمان نیلورم قارداش
..
..
حسین فکر ایلمه یوزمین بو صحراده سپاه اولسا
اباالفضل ئولمیوب میدان عشقون رزمگاه اولسا
چتین عالمدى واللهى کمک سیز پادشاه اولسا
سینمدن پرچمی شمشیری ألدن ویرمرم قارداش
..
..
حسین گفتاره گلدى إئتدى فرمایش علمداره
منیم ای غم گونومده غمگساریم یاراولان یاره
سنی چوخ گؤرمسین الله ، حسینه خوردا قیزلاره
بیلورسن من سنی اکبردن آرتوق ایسترم قارداش
..
..
«نخستین» هر زمان یازسون غم صاحب لوادن یاز
وزیر و منشی و مستوفی کرب و بلادن یاز
حسینین قارداشی عبّاسیدن مشگل گشادن یاز
دئدی قووماز قاپوسیندان بیرین صاحب کرم قارداش
..
..
#عباسیه #نخستین #امان_نامه_نخستین #امان_نامه #ترکی #زبدةالاشعار
نظر دهید