زبانحال حضرت رباب (س) در فراق فرزند
..
..
رضا غلامپور (دلپاک)
..
..
ای محنتیمه نسگیلی مد نظر اصغر
سنسیز اولوب آیینۀ قلبیم کدر اصغر
..
..
چون نالم اولوب آه جگر سوزه حواله
واقفدی بو علت اورگیم داغینه لاله
گورسن که دوتوب معرکۀ محنتی ناله
بول آهیم ائدور کرببلادن گذر اصغر
..
..
یثربده زبس که منه مأنوسیدی محنت
تاپموش بو سببدن محنیم خلق آرا شهرت
بو شهریده قلبیم دئیور آغلار منه حسرت
هربیر آنا که سود امر اوغلون بلر اصغر
..
..
گون که ائدر آثارینی هنگام سحر فاش
قلبیم داریخار گوزدن آخار عارضه قانیاش
گلّم دیله غملی دیلیله سویلرم ای کاش
بیرده گله سن سینمه وقت سحر اصغر
..
..
تا حرمله اوچ شعبه اوخون قویدی کمانه
اسدی اورگیم گلدی دلیم داد و فغانه
اوخ محنتی خونآب دله اولدی بهانه
چون دگدی سنه ائتدی منی خون جگر اصغر
..
..
هرچند سنه یاخشی آنا اولمادیم اما
سندن ائدیرم اوج ملالیمده تمنا
بیر یول یوخوما گل سنی صدیقۀ کبری
وئر اوخ یاراسیندان آناوا بیر خبر اصغر
..
..
دورام یوخودان هر گجه نین نصفی هراسان
تا سود وئرم آج یاتمیاسان سن، سنه قربان
گورجاق یئروی بوش ائدرم ناله و افغان
نیلوم گجه آخر سودامر، سودامر اصغر
..
..
بو غصّه گرک جانیمی طغیان ائدوب آلسین
گول سولمامیش انصاف دگول غنچه سارالسین
آخر نه روادور بالا ئولسون آنا قالسین
توکسون بالاسیندان صورا اشک بصر اصغر
..
..
دلدن منی تا ناله سالار غملی وطنده
بیر کیمسه منه سو گتورور اوج محنده
بیرده گلرم نالیه غمدن سو گورنده
ایوای دئیرم محنتیوه دیده تر اصغر
..
..
وادی مصیبتده سبب اولدی نیازون
تا اوج ائلسون نُه فَلکه سوز و گدازون
اوچ پر اوخا اولدم کی نشان اولدی بوغازون
آغ قنداقیوی قان بورودی سربه سر اصغر
..
..
گوردوم کی عطش آز قالوری جانیوی آلسین
سالدیم دلیمی آغزوا تا دردین آزالسین
قوی فاش دئیوم پرده ده بو سوز نجه قالسین
دوشدو دلیمه اودلی دلیندن شرر اصغر
..
..
بیر خاطره چوخ برهم ائدوب روح و روانی
نسگیلدی منه سختدی هرچند بیانی
گل بیرده خراش ائت سینمی تا آخا قانی
دیرناقیوه خوشدور اولا سینم سپر اصغر
..
..
من بیر آنیام قلبی سینیق باشی بلالی
سن تک بالامی ائتدی فلک مندن آرالی
آتدون منی یاتدون نجه قبرونده یارالی
سن یاتدون آنان اولدی ولی دربه در اصغر
..
..
گون تک فلک غمده دعا ائیله باتیم من
قول باغلاماقین فکرینی تا باشدان آتیم من
گوز یاشلی بو غم دلده مزار ایچره یاتیم من
چون ائتدی بو نسگیل منه بی حد اثر اصغر
..
..
هجرانه بیزی قوم لعین ائیلدی مجبور
حقّونده بو جبر ائتدی منی خدمته معذور
بیرده بو تمنّایه علندی منه منظور
عفو ائت اورگون اینجیسه مندن اگر اصغر
..
..
سندن صورا حسرتدی گوره عالم ایجاد
بیر لحظه ملالونده آنان ائتمیه فریاد
چون دگدی اوگوندن کی سنه ناوک صیاد
آهو تک آنان هر گجه گوندوز ملر اصغر
..
..
آخر گجه مین حسرتیله دشت بلاده
آلدی سنی آغوشه آنان خیمه سراده
بیر یول یوزونه باخمادین اثنای بکاده
ای وای منه کوسموشدون آناندان مگر اصغر
..
..
«دلپاک» ائلین وقته بو اشعارینی انشا
امّید کراماتیله نیت ائله دی تا
بیر غصّه لی مرحومه ائده اجرینی اهدا
بو حاجتینه سنده ائله بیر نظر اصغر
..
..
#اصغریه #دلپاک #اصغریه_شهادت #حضرت_رباب #ترکی #زبدةالاشعار
نظر دهید