یا مهدی
.
.
.
سید بشیر حسینی میانجی
.
نقّاشه من دئدیم: منه بیر عکسِ یار چک
دل صفحه سینده نقش و نگارِ نگار چک
.
سعی ایله، ایله چک کی اونون اولماسین تایی
اُول کِلک زرنگاریله بیر شاهکار چک
.
کونلوم ائوینده اُول شکیلی تابلو ایلیوم
باخدوقجا یاری یاد ائلیوم یادگار چک
.
فرمایش ائتدی: سویله کی یارون نه شکلیدی؟
تئز سویله دیم کی سَرو قدین استوار چک
.
قاشلاینی کامان ائله کیپریکلرینده اوخ
صیاد چک اونی منیده بیر شکار چک
.
لوءلوء گورنده لعل لبین، دیشله سین لبین
یارین او غونچا لبلرینی لاله وار چک
.
واردیر قیزیل گولون اونا بیر آز شباهتی
گول چک اونی، گول اوزلولری مثل خار چک
.
آدین سوروشدی، عرض ائلدیم: نرگسین گولی
گولدن گلوب وجوده اونو گولعُذار چک
.
بیر خالِ هاشمی صاق اوزونده قرار وئر
اُول خالین عشقینه هامینی بیقرار چک
.
رخسارینی گونوز کیمی آیدین، ایشیق، دُورو
زُلفون قره، تِلین شوه چون شام تار چک
.
هامّی دئسون گئجیله گونوز ال اله وئروب
وار اولسون اللرون ائله لیل و نهار چک
.
چک درگهینده شاهلاری یولچی، غلام، عبد
تخت عدالت اوسته اونی تاجدار چک
.
بیر جمعه ذوالجناحه مینوب ایلیر قیام
چکسون پیاده خلقی، اونی شهسوار چک
.
شمشیرِ شیرِ حقّیله کفّاری ئولدورر
پور علیدی صاق الینه ذوالفقار چک
.
نقّاش سؤیلدی: اونی چوخداندی چکموشم
عشقیم دئدی چکنده بونی مستعار چک
.
گیزلینده دور هله اونا چون یوخدی مشتری
گر چه دیور بیر عدّه گهی، آشکار چک
.
هر کس دورور ایاقه دیور منده عاشقم
یوخ بیر نفر دوروب دییه بسدور کی عار چک
.
مهدی اوز عاشقیندن عمل ایستییر فقط
میدانه صدقیله عملون هر نه وار چک
.
گوشِ دلِ «بشیر»ه بو سس گلدی غیبدن
دوز عاشق اُول گلینجه او یار انتظار چک
.
#مهدیه
#نقاشه_من_دئدیم_منه_بیر_عکس_یار_چک
#سیدبشیرحسینی
#ترکی
.
.
نظر دهید