احوالات ضربت خوردن امیرالمومنین علی (ع)
#گریز به #کوچ_کربلا
..
..
ستار رزاقی تبریزی
..
..
نه غمدور بار الهی دولدوروبدور کون و امکانی
دوشوبدور سجده گهده مرتضا باشدان آخور قانی
..
نه ظلم ایلوبله شیر کردگاره بولمورم یارب
کی باشدان یاره لنمیش سجده حالینده چخور جانی
..
ووروبدور ملجمین اوغلی ایله بیر یاره مولایه
یقین آغلاتدی بو غملی خبرجنتده زهرانی
..
اوظالم گرچه ظاهرده علینی یخدی تپراقه
حقیقتده ولی یخدی بنای دین و ایمانی
..
دوشوب سس کوفه ده محراب طاعتده علی الدی
سالوبدور ولوله کونه بو سوز تترتدی دنیانی
..
اودم یر گوی آراسیندا ایدوب روح اللمین فریاد
بولون اولدوردولر ای اهل عالم شاه مردانی
..
بوسوز تا نشر اولوندی کوفه شهرین دولدوروب شیون
اسفلی بوخبر آغلاتدی هر یرده احبانی
..
قویوب یوز مسجده اهل ولایت دلده واویلا
کی گورسونلر عدو سالمیش نه حاله شیر یزدانی
..
گوروبلر مرتضا قانه بلشمیش سجده گاهینده
توان یوخدور قیامه ضعف ایدوب مهرو وفا کانی
..
آلوب اوغلی حسن باشین دیز اوسته آه و زاریله
فغان و دادیله اطرافین آلمیش یارو اعوانی
..
صدای وا علیا عالم امکانی دولدورموش
نه محنتدور خدایا بیله پوزموش سطح غبرانی
..
اودم شاه ولایت زحمتیله گوزلرین آچدی
بویوردی ای حسن تاخیره سالما امر رحمانی
..
نماز صبحی دور ایله اقامه بو جماعتله
رضا ایله اوزوندن بو عملده حی سبحانی
..
نماز اولدی ادا امر امام کایناتیله
صورا قصد ایلیوبلر حمل ایتسونلر او سلطانی
..
او دمده جسم مولانی قویوبلار بیر کلیم ایچره
کی تا حمل ایلسونلر منزله اول قانه غلطانی
..
قالاندا منزله بیر قدر مولا گوزلرین آچدی
خطاب ایلوب اشاریلن اودمده غملی یارانی
..
کمک ایلون گیدوم تا منزله من اوز ایاقیمله
منی بو حالیده گر زینبیم گورسه چخار جانی
..
واریدی بیر یارا ن باشدا علی جان اولمادون راضی
کی عرشه زینبون اوج ایتمسون فریاد و افغانی
..
گلیدون کاش بیر کربوبلایه اول چتین ساعت
گوریدون بس نجه زینب گزوردی قانلی میدانی
..
حسینیم وای دیلینده آختاروب قارداشینی تاپدی
نه گوردی بولمورم سسلندی قارداش بس باشون هانی
..
گوروبدور کوفیان از بس توکوبدور حرب آلاتین
قالوب اوخ نیزه داش آلتدا او شاهین جسم بی جانی
..
خانم قصد ایلیوب گلدن خس و خاری کنار ایتسون
کی بلکه خارج ایتسون پیکر شاه شهیدانی
..
کنار قتلگهده ایلشوب چوخ آه و زاریله
چکوب بیربیر کناره داشلاری اوخ نیزه پیکانی
..
نه گوردی ای خدا باشسیز بدن دوشموش اوزی اوسته
قولون سالدی چووردی جسم سلطان لب عطشانی
..
اگیلدی قارداشین اپدی کسلمیش حنجرین سویلوب
خدا بیز آل طاهادن قبول ایله بو قربانی
..
صورا حسرتله عرض ایتدی اویان ای دینینه قربان
بو چولده قویما یالقیز بو غریب و دیده گریانی
..
سنون بو جسم پاکون گل کیمی کیم ایلیوب خندان
پوزوبدور نقشه سین هر بندبندیندن آخور قانی
..
بو قدری بیر وجوده کیم گوروبدور یاره وورسونلا
سنه یاره ووران شخصین یوخیمیش ذره وجدانی
..
اگر وجدانی اولسیدی حیا ایلردی زهرادن
ایدوب حقدن ابا تشنه شهید ایتمزدی مهمانی
..
اوقدری جسمیوه یاره وروبدور لشگر کوفه
تاپولماز دردوین بو دهریده دارو ودرمانی
..
اویان ای زینبین آرام جانی یاتما قان ایچره
گوروم تا چاتماسون کامه جهاندا آل سفیانی
..
چکور قول باغلی دشمن بیزلری جبریله شاماته
اوزون دور سال یولا بوعترت بی یارو نالانی
..
علاجیم گر اولیدی کربلادن شامه گیتمزدیم
اولونجن مسکن ایلردیم بودشت عشق و عرفانی
..
اسیر اولماق چتیندور دشمنه ای گوزلریم نوری
گرفتار ایتمسین آلله بیزیم تک هیچ مسلمانی
..
دعایه ال گوتور رزاقی سنده ایسته آلله دان
مسلط ایتمه سین تا بیزلره عالمده عدوانی
..
#حیدریه
#حیدریه_شهادت
#نه_غمدور_بار_الهی_دولدوروبدور_کون_و_امکانی
#ستار_رزاقی
#ترکی
#زبدةالاشعار
..
..
نظر دهید