زبانحال حضرت زینب (س) در موقع کوچ از قتلگاه به برادرش
..
..
ستار رزاقی تبریزی
..
..
نه یاتموسان قوری یرده گوز آچ اویان یارالی
اماندی ایله منه حالیوی بیان یارالی
..
مُسافرَم گیدیریم دور مَنی اؤزون یولا سال
وفالی زینبوی قویما باغریقان یارالی
..
اَسوبدی باد مُخالف بو دشتیده افسوس
صفالی گلشنیوی ایلیوب خزان یارالی
..
سَنی شهید اِئلییَنلَر بیزی اسیر اِئلییوب
ائدوبله قلبیمی تیر غَمه نشان یارالی
..
هَمیشه قیزلاریوین گوگلونی آلاردین اؤزون
بولاردان ایمدی داخی یوخ گوگل آلان یارالی
..
بو اوچ یاشیندا رقیّون هَلاک ایدور اُؤزونی
بابا دییَنده بونا بیرده سویله جان یارالی
..
چکور قَطاریمیزی کوفیه گروه شَریر
بو غَم گلور بیزه بیر دَرد جانستان یارالی
..
نه ساغدی قارداشیم عَباس و نه عَلی اکبر
که بیزلره اولالار یولدا پاسبان یارالی
..
اَذیّت اولماسا نیم خیز اولوب اُؤزون سویله
بو غَملی قافله نون آردیجا اَذان یارالی
..
گرک باجون سَنه بوردا قوریدی بَزم عَزا
نه فُرصت اولدی نه ده وئردیلر اَمان یارالی
..
گلنده گلمیشیدوق کربلایه یاوریله
بیزیله ایمدی گیدور شمریله سَنان یارالی
..
اولیدی چارم اگر سَندن آیری دوشمزدیم
قالوب سَنیله وئرَردیم بو چولده جان یارالی
..
آییردی دَست قضا ظلمیله سَنی مَندن
فراقون ایتدی رَسا قدّیمی کَمان یارالی
..
سَنیله عُمر بویی هَم قَدم اولان باجیوا
بو آیریلیق گلوری ایمدی چوخ گران یارالی
..
بو چولده دَست ستمله دَریلدی گولّلریمیز
نه گلستان قالور ایمدی نه باغبان یارالی
..
او قَدر اهل جَفا بوردا ظلم ائدوبدی بیزه
نَقدری وار نَفسیم ایلرَم فَغان یارالی
..
اَلین بَدنده دَگول تا قویام اورَک باشینا
بو قلب زاریمه بَلکه ویره تَوان یارالی
..
سالوبلا پیکریوی تُپراق اوسته قوم عَنید
ووروبدی هر یتیشن داش، قلج، سِنان یارالی
..
خَدنگ ظلمه ایدوبلر وجودوی آماج
یارالاریندان آخور چشمه چشمه قان یارالی
..
سَنیله روحیمی گودال قتلگهده قویوب
شکسته دل اولورام کوفیه روان یارالی
..
یتیشدی وقتِ خداحافظی ، خداحافظ
قوتارمادی ولی بو غملی داستان یارالی
..
گر ئولمَسَم یولومی بیرده بو دیاره سالوب
قالان اورَک سوزمی ایلَرَم بیان یارالی
..
یازاندا بوسوزی رزّاقی نوکروز یکسر
ایدوردی اشگینی رُخسارینه رَوان یارالی
..
بونیّتیله یازیردی، کی دَرگهوزده سیزون
اونوندا آدینی یازسونلا نوحه خوان یارالی
..
..
#کوچ_کربلا #ستار_رزاقی #ترکی #زبدةالاشعار
نظر دهید