نولوردی بیرده الهی الیمده فرصت اولیدی #حضرت_رقیه_شبیری

حالات حضرت رقیه (س) در خرابه شام
..
..
..
..
مرحوم شبیری
..
..
..
..
نولوردی بیرده الهی الیمده فرصت اولیدی
فنا جهاندا اجلدن اوقدر مهلت اولیدی
..
گچن گچوبدی گلن گونلره تدارک ایدیدیم
بقیه عمریمی توفیقه منده همت اولیدی
..
بو شور گوز یاشمیله غبار دل سیلینیدی
صفا تاپیدی گوگل دلده بیر فراغت اولیدی
..
تمام مشغلۀ دنیوینی باشدان آتیدیم
چاتوب مرامه نصیبیم ایکی سعادت اولیدی
..
بیری بودورکه نه اعمال باش اگر ویره مندن
ازل سنون طرفیندن اونا رضایت اولیدی
..
ایکیمجی سی بودی ای هرشکسته قلبدن آگاه
گونوم اولیدی اوگون ساعتیم او ساعت اولیدی
..
رقیه نین باشنا بیرده ئولمه میش دولانیدیم
بو شرطیله حرم باصفاسی خلوت اولیدی
..
شکسته قلبیله وضع خرابه دن سوز آچیدیم
اویرده چکدیقی غم دوره سینده صحبت اولیدی
..
جفای دشمن خونخواره اوردا شرح ویریدیم
که هر ستمگره تا روز حشر عبرت اولدی
..
او نازنین بالانین سرگذشتی نقطه به نقطه
یوزیمده گوزدن آخان اشگیله کتابت اولیدی
..
اوغملو روضه ده بیر وقتینه توسل ایدیدیم
گنه رقیه ئولن گون کیمی قیامت اولیدی
..
اودم که شه باشی ویرانسرانی ایلدی روشن
او دم حرم لره بیلمم گرک نه حالت اولیدی
..
دیسم قیامتیدی گرچه اعتراض ایدن اولماز
ولی بله بولورم حشردن علامت اولیدی
..
دیمه که شه نیه گلدی خرابیه دل شبده
اگر گلیدی او ناخوش بالا عیادت اولیدی
..
باخوب او باشه دیدی گوزلرون فداسی اولوم من
گورونمه میشدی باباسنده نفی الفت اولیدی
..
خیاله گلمزیدی ای جهان خلقته علت
صغیره سنّمیله قسمتیم اسارت اولیدی
..
سنون وجودیویله گور روادی آل علینین
جلال و شوکتی کرب و بلاده غارت اولیدی
..
بو شام قزلاری بیلمولّه گلموسن بابا ایکاش
بولیدیلر منه سرمایۀ شرافت اولیدی
..
اولار که طعنیله سویلردیلر منه آتاسیز قز
گوریدیلر بابامی ئوزلری خجالت اولیدی
..
نلر بو یرده منه یوز ویروبدی نقطه به نقطه
سنه دیردیم اگر وقتیمیزده فرصت اولیدی
..
نه یاخشی وقتده گلدون بابا اینانمازیدیم من
بو آخر عمرده منده بیله سعادت اولیدی
..
سن ایمدی که بابا لطف ایلیوب خرابیه گلدون
نولوردی منده ده پیشوازه استطاعت اولیدی
..
بو صون نفسده سنون باشیوه دوروب دولاندیم
ایاقه دورماقا گر دیزلریمده طاقت اولیدی
..
ندن بابا علی اکبر منی سالوبدی نظردن
نولوردی ایمدی یانیمدا اوماه طلعت اولیدی
..
منی عموم بابا قویمازدی بیله دشمن الینده
اگر بدنده اونون اللری سلامت اولیدی
..
نولوردی بیرده دییدیم علی اصغره لایلای
صفائیله قوجاقیمدا یاتیدی راحت اولیدی
..
منیم بو شامده قالماقلقیم دگل بابا بیجا
گرگ منیله بو ویرانسرا عمارت اولیدی
..
علاوه پرچم نهضت که اسدی کرب وبلاده
اونا بو شامده لازمدی بیر سفارت اولیدی
..
بو شهرده سنه لایق سفیر بیرکس اولانماز
گرک منیم کیمی بیر شخص با کفایت اولیدی
..
شبیری بیر بیله اشعاری هیچ یازانمازیدون سن
مگر حسینون اوزیندن بیر استعانت اولیدی
..
..