زبانحال حضرت رباب علیها سلام
.
✍️ زبدة الاشعار ✍️
?: @nohe_torki
.
مرحوم غلامعلی باقری الهام (هوشی تبریزی)
.
نیه آتدون بیله گوزدن من نالانی اوغول
گیدوب امدون ندن اوچ شعبه لی پیکانی اوغول
.
داغدیده آنا وا مهریوی گل آزایلمه
بویانان قلبیمی چوخ نالیه دمساز ایلمه
گوزون آچ بیر یوزمه باخ بوقدر نازایلمه
اوگوزل گوزلره قربان آناوین جانی اوغول
.
آلتی آی عمرومون آخر سنیدون بیرثمری
آناوین وار یری القانه دونه اشگتری
اوخلانوب سنکیمی هانسی آنانون سودامری
ای وفا گلشنینون عنچۀ خندانی اوغول
.
شرر آهیمیله عالمی یاندورام علی
قانلی قونداقون الیم اوسته دولاندورام علی
آغاران زلفومی القانه بویاندورّام علی
زلفووه خوشدی آنان یاخسا همین قانی اوغول
.
گر چه گتدون غمیله داده بوصحراده منی
هم صدا ایتدون اوغولسوزلارا دنیاده منی
شرمسار ایلمدون محضر زهراده منی
کسب قیلدیم شرف هرایکی دنیانی اوغول
.
آتاوین آگهیدون باشدا کی پیمانینه سن
اودی شرکت ایلدون نهضت شایانینه سن
قانیوی شوقیله قاتدون آتاوین قانینه سن
پایدار ایلدوز اول قانیله قرآنی اوغول
.
آناوی گرچه علی دیده سی خونبارایلدون
لیک جانانون اوغول میلی جا رفتارایلدون
اوخلانوب یاتدون اوزون عالمی بیدارایلدون
آنلادی اهل جهان معنی ایمانی اوغول
.
ای هلال فلک احمدی وی بدرمنیر
همتّون عالیدی هرچند که سنّوندی صغیر
خدمتون عالم اسلامه اودور اولدی کبیر
یاخشی ویردون باشاجانانیله پیمانی اوغول
.
آختاروردون نچه مدتّدی که ممتازی دین
شامل اولدی سنه بو سنّله سربازی دین
عرصۀ عشقیوه ایتدون ایله جانبازی دین
اولدی عشّاق جهان عشقیوین حیرانی اوغول
.
ای گوزل آدی اولان زینت سر لوح وفا
سود امر سنّیله اوز دینینه لب تشنه فدا
باتدی نا حقّ سنون قانیوه بو قوم جفا
ایتدی رسوابو قانون ملت سفیانی اوغول
.
سینمی ناوک درد و محنیله دلرم
دامن حسرته گوز یاشیمی دائم الرم
بالا هجرینده چو آهو ایله دیلدن ملرم
دولدورار ناله ودادیم بو بیابانی اوغول
.
دگی بی علت علی بیله یانوب آغلاماقیم
نار نسگلریوه بیله اورگ داغلاماقیم
دوشوری یاده اوغول اللریوی باغلاماقیم
آناوین عرشه چخور ناله وافغانی اوغول
.
منه نازایتماقیوی سانماکه ناخوش گورورم
قرمزی قانیله آغ اُنّوگوی خوش گورورم
بشیگونده باخوب امّا یریوی بوش گورورم
ویرورم باده اودورصبرو توانانی اوغول
.
آلتی آی عمرومون آخرسنیدون بیر ثمری
آناوین وار یری القانه دونه اشگ تری
اوخلانوب سنکیمی هانسی آنانون سودامری
ای وفا گلشنونون غنچۀ خندانی اوغول
.
گورورم قانه بویانموش بو قرا تللریوی
آچمادون دل گورم امّا او شیرین دللریوی
سالارام یاده اولونجه علی نسگیلّریوی
یاد ایدر داغ دلیم لالۀ نعمانی اوغول
.
من دیردیم یوزه اشگ ترون آز باغلابالا
آه جانسوزیویله سینمی آز داغلا بالا
دیورم ایمدی ولی آغلا علی آغلا بالا
آغلا آغلاتما بو بیر جمع پریشانی اوغول
.
(هوشینون)آفت غم سولدوروب عشرت گونونی
چاره سیزدورسنه عرض ایلوری درد دلونی
اوزون آسان ایله لطفیله اونون مشگلونی
سنله دوردهریده هرمشگلون آسانی اوغول
.
#سبک_یارالی_جان_یارالی (بیش از 4 سبک)
.
#اصغریه_شهادت
#حضرت_رباب
#نیه_آتدون_بیله_گوزدن_من_نالانی_اوغول
#هوشی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید