سنه یاحسین یوزیمدن آچیلان نقابیم آغلار #کوچ_کربلا_یحیوی_اردبیلی

زبانحال زینب به امام حسین در کوچ از کربلا
..
..
مرحوم یحیوی اردبیلی
..
..
سنه یاحسین یوزیمدن آچیلان نقابیم آغلار
باشیم اوسته ذرّه ذرّه دوشن آفتابیم آغلار
..
..
اورگیمده مه جمالون ایشیقین گورن گوزوم وار
منه بیر چراغ شب دور بو چراغه نه سؤزوم وار
گئجه لر یوخی یوخومدور که قباقدا گوندوزوم وار
او بلالی گوندوزیمه شب ماهتابیم آغلار
..
..
یارالی باشون جداده ائلین زمان تجلّا
من بینوایه تاریک اولی روشنای دنیا
ائله یاندیران دیلیله دییرم حسین حسین وا(ی)
اوجالان سسیمه ملحق اولور اؤز خطابیم آغلار
..
..
نه قدر ساغام بلادن غم و درد دور حوالم
ائله که گوزوم یومولدی قوتاروب کسیلدی نالم
منی قویدیلار مزاره دولانور مدار عالم
لحد آلتدا توتیا تک توکولن ترابیم آغلار
..
..
گوزومون یاشی غمونده قره مشک نابه بنزر
توکولنده سینون اوسته دولانور گلابه بنزر
دولاشوبدو گردنیمه هوروگیم طنابه بنزر
او طنابه قولاریمدان وورولان طنابیم آغلار
..
..
توکر اول قلم لری که ورقه قرا مرکّب
او قرا مرکّبیله أُولی شرح حال زینب
قلمون گزارشیندن اوخوناندا غملو مطلب
خبر مصیبتیمده یازیلان کتابیم آغلار
..
..
داغیداندا اشگ طوفان یئره چشم غم نگاهیم
اونی خشگ ائدر اورکدن چیخان آتش سیاهیم
ایکی ضدّیلن موافق اولور ابر دود آهیم
اوتیلان سو اوسته شبنم ائلیور سحابیم آغلار
..
..
حرم اهلینون صفیندن گلور هر بیری نوایه
وئری کاروان ماتم اونیلان صدا صدایه
هامودان چوخ آغلارام من او نوای دلربائیه
که گناه سیز بالاسى وورولان رباییم آغلار
..
..
سنی سسلرمبرادر منیله دانیش جداده
سسیوی ائشیتمرم چون گلورم فغان و داده
او محاسن شریفون نئجه تیتریور هواده
ائدر اضطراب اونون تک دل پیچ و تابیم آغلار
..
..
..
#کوچ_کربلا #یحیوی_اردبیلی #ترکی #زبدةالاشعار