وار قانلو لبلرینده قرآن بیانی قارداش #کوفه_تائب_تبریزی

زبانحال حضرت زینب کبرا (ع) در کوفه
.
.
مرحوم تائب تبریزی
.
.
وار قانلو لبلرینده قرآن بیانی قارداش
اسلامه دعوت ایلر اهل جهانی قارداش
.
.
نوک جداده لعل لبلر اولوب گهربار
بازاری گرم ایدوبدور عالمجه وار خریدار
یاتمیشلاری آیلدار هوشه گلولّه افکار
آگاه ایدور تمام پیر و جوانی قارداش
.
.
ذبح ایتدی سویانیندا دشمن سنی لب عطشان
تا قالماسون بیر اوزره قرآن و حکم قر آن
قرآنی سن دیریتدون و یردون دوباره بیرجان
الله کتابی تاپدی جان جاودانی قارداش
.
.
خوش لحنیله اوخورسان نوک جداده قر آن
لحن حجازون ایلر اهل جهانی حیران
زینب اولا حجازی دلکش صداوه قربان
داوود گورمیوب بو صوت و صدانی قارداش
.
.
قرآن اوخی خجالت چکسونله داش آتانلار
شرم ایلسونله دینی دنیالره ساتانلار
گلسونله هوشه بلکه غافل دوشوب یاتانلار
غفلت یوخوسی دوتماز بیدار اولانی قارداش
.
.
افسوس غفلتیله بو شهره چوخ گلن وار
اسلام ماتمین بیر بایرام گونی بولن وار
بیر یان آت اوینادان وار بیریان دیوب گولن وار
بولمور بو قوم غافل سود و زیانی قارداش
.
.
بولمولَّه بیزلره گه توهین لر ایلیوللر
گه خائن آد قویوللار گه خارجی دیوللر
گاهی توکولَّه گوزدن گوزیاشی آغلیوللر
قاره گونه سالوبلار قرانیانی قارداش
.
.
ای عزت وجلالون اهل جهانه منظور
وی مصحف جمالون تفسیر آیۀ نور
نور جمالون ایلر مین لر کلیمی پر شور
بیر نخل طور ایدوبدی نوک جدانی قارداش
.
.
تکبیر دلده چاتدی اوج جلاله باشون
تشبیهیدی گچن گون بدر کماله باشون
نه یوز ویروبدی ایمدی بنزر هلاله باشون
کول هاله تک دوتوبدور وجه خدانی قاردش
.
.
یوخسا که میزبانون دوتموب ادب سیاقی
کول اوسته ساخلیوبدور سن تک گوزل قوناقی
بیله کوله بلشمیش بو وجه وجه باقی
ساخلالّا بیله سن تک بیر میهمانی قارداش
.
.
قرآن اوخی حسینیم دین دردینه دوا ویر
یورقون شکسته پوزقون خاطرلره صفا ویر
ناخوش اورک لره سن انگیزه ویر شفا ویر
بولسونله ئلدوروبلر روح شفانی قارداش
.
.
بولمزله اهل کوفه تحلیلِ بو نکاتی
بیر وجه وجه باقی که وار شفا حیاتی
جاوید زنده دور یوخ هرگز اونون مماتی
قر آندا وار بو امره الله بیانی قارداش
.
.
کهف آیه سین اوخی اوز اعجازیوی نشان ویر
اعجابوی نشان ای خوش لحن وخوش بیان ویر
دیللن کسیک باشیله عالم لره تکان ویر
بو ملّته تانیتدیر کهف الورانی قارداش
.
.
نوک جداده ایله قرآنی سن تلاوت
من ناقه اوسته ایلوم قول باغلى خلقه صحبت
قارداش باجی سالاخ بو شهره بو گون قیامت
ایتسون هامی مجسّم یوم جزانی قارداش
.
.
درد و بلاسی چوخدور گرچه مسیر عشقون
عشّاقه چوخ بلالر یازموش دبیر عشقون
نیلوم منِ بلاکش اولدوم اسیر عشقون
ایتدیم قبول هر بیر درد و بلانی قارداش
.
.
اهل محبتّم من معنای عشقی بوللم
عشّاق دفتریندن حاشا آدیمی سیللم
هر یانه گیتسه باشون منده دالینجا گللم
همراه دور منیله غم کاروانی قارداش
.
.
سن باش گوتور یارالی دوش قاتلون دالینجا
اولما خموش دلدن ظالم لری سالینجا
منده گلوم دالینجا شام و دمشق آئینجا
وارون ائداخ او یرده دار جفانی قارداش
.
.
سن باشیوه یغوبسان یتمیش نجوم و ماهی
منده کناره آلّام اطفال بی پناهی
باهم ایداخ مسخّر شامات رو سیاهی
گورسونله اتّحاد آل عبانی قارداش
.
.
صدقیله پایدارم اوز استقاقیمده
یوخ ذرّه جه قصوریم اسلامه خدمتیمده
وئرّم نشان اراده حال اسارتیمده
هر یرده خوار قیلّام سفیانیانی قارداش
.
.
سن یادگار طاها من یادگار زهرا
سنده شئون حیدر منده وقار زهرا
یوزده حیای زهرا باشدا خمار زهرا
حفظ ایلیاق شئون خیر النّسانی قارداش
.
.
.
هر عهدیمیز که سنله واردور باشا آپارّام
ایفای عهدیم اوسته اؤز عمریمی قوتارّام
گوّرم باشون یارالی منده بو باشی یارّام
قیلّام جهانه اعلان شرط وفانی قارداش
.
.
شام اهلی منبر اوسته گورموب آتام علینی
اولسونلا تا شناسا مولای متقینی
من منبره آپارّام سجّاد عابدینی
ذکر ایتسون اوردا مدح شیر خدانی قارداش
.
.
اوردوی دین باشمدا ای شهریار اعظم
قیلّام بساط کفر سفیانیانی برهم
شام جفاده وورّام ویرانسرایه پرچم
آباد ایدر او پرچم ویرانسرانی قارداش
.
.
تائب ایدوبدی عمرین مصروف خدمتونده
دائم قلم وورودی ذکر مصیبتونده
چشم امیدی واردی لطف و کرامتونده
تاپ سنده حشرده بو نوحه یازانی قارداش
.
.
#کوفه #تائب_تبریزی #ترکی #زبدةالاشعار