اربعین
.
✍️ #زبدةالاشعار ✍️
.
🆔: @nohe_torki
.
مرحوم میرمحمود آقا شوری تبریزی
.
گلدی باجون دوباره دشت بلایه قارداش
دوربیر نوازش ایله بو بینوایه قارداش
.
ششگوشه قبری زینب هر آن سالوب خیاله
دوشدوقجا یاده قبرون باعث اولوب ملاله
شکر ایلرم یتشدی قارداش باجون وصاله
سنده دانش منیلن گل بیر صدایه قارداش
.
.
نطقه گلوب سوروشسان گر حالیمی برادر
چوخ ظلملر گوروبدور قارداش بو زار و مضطر
تقریر ایدم بو گون من بیر بیر دگول میسر
دوشدوم خلاصه سنسیز چوخ چوخ بلایه قارداش
.
.
چوخ مختصر دیوم من اوز باشیمون قضاسین
سندنصورا پوزوبلار بو زینبون اساسین
شمر لعین یتوردی اتمامه اوز جفاسین
وردی دو شاخه زنجیر آل عبایه قارداش
.
.
ابن زیاد بزمین گوردی بو بخت قاره
قارداش او بزمه زینب بیر ایلیوب نظاره
گوردی نلر بو کولباش گلدی چوخ آه و زاره
ناله او دم اوجالدى عرش خدایه قارداش
.
.
بو زینبی خلاصه دشمن آپاردی شامه
بیر بیر یتوردی ظلمین اهل جفا تمامه
رحم ایتمیوبله قارداش اوغلون علیل امامه
چوخ ظلملر ایدوبلر زین العبایه قارداش
.
.
باشون دولاندی منلن هر رهگذاری قارداش
گورجاخ جداده باشون بیر پیره زن ویروب داش
گوردوم یارادی باشون تو کدوم عذاره قانیاش
بی اختیار او وقته گلدیم نوایه قارداش
.
.
باشون دالنجا شامی آخشامه دین دولاندیم
آخر گیدوب یزیدون بزمنده من دایاندیم
اول بزمده حسین جان تازه غمه بویاندیم
یاندیم گلنده باشون مجلس آرایه قارداش
.
.
گورجک یارالی باشون قارداش او بیمروت
گه باشوه گولردی گاهی ایدوب شمادت
بیر ظلم ایدوب او ظالم برپا اولوب قیامت
باشون نشانه اولدی چوب جفایه قارداش
.
.
تنگ اولدی یر حسین جان اولاد بو ترابه
آخر بیز اهلبیته مسکن اولوب خرابه
عورت اوشاق تماماً دوشموشدی اضطرابه
ناله سسی چخاردی هر دم سمایه قارداشی
.
.
بیر مدتی عیالون قالدی خرابه یرده
غم غصّه دن رقیّه قارداش گلوبدی درده
آخر خرابه یرده جانین ایدوب سپرده
بو زینبی باتوردی تازه عزایه قارداش
.
.
قالدى جنازه یرده هیچ بیر گلوب گیدن یوخ
شب تیره یر قرانلوخ فریادیمه گلن یوخ
قالدیم سفیل و حیران بیر حالیمی بولن یوخ
چوخ یوز ویروب او دم غم بو مبتلایه قارداش
.
.
ایتدی بیزی مرخص آخرده اهل کینه
اولاد مصطفانی گتدیم بو سرزمینه
دور سنده بیر ایاقه ای سرور مدینه
بیرده قیلوم نظاره دورت مین یارایه قارداش
.
.
ناز ایتمه چوخ حسین جان یاتما دو بیر ایاقه
مدتدی یانمشام من درد و غم فراقه
یاد ایلیوب سنی بو زینب گلوب عراقه
باری دی خوش گلوبسن بو بینوایه قارداش
.
.
توک اشگوی دمادم شورى ئولونجه آغلا
بو زینبه همیشه محکم بلیوی باغلا
دی زینبون دلینجه ور باشه سینه داغلا
گلدی باجون دوباره دشت بلایه قارداش
.
.
.
#اربعین_شوری_تبریزی
#گلدی_باجون_دوباره_دشت_بلایه_قارداش
#ترکی
.
✍️ #زبدةالاشعار ✍️
.
🆔: @nohe_torki
نظر دهید