مدح و میلادیه حضرت امام رضا علیه السلام
.
.
.
محمد علی مصیبی تبریزی
.
.
مرحبا خالقه ، آفاقی نه باجا یارادوب
قدرت ناظمه احسنت اولا غوغا یارادوب
طاق دنیایه خدا عرش معلا یارادوب
اسم اعظم دن آیرمیش گوزل اسما یارادوب
حسنین و علی و احمد و زهرا یارادوب
صُلب حیدردن عجب حیدره همتا یارادوب
ملک مشهدده اونا صحن مطلا یارادوب
هم ئوزون هم حرمون حق نه دل آرا یارادوب
.
.
کنز عشق و شرفین گوهر زیباسی رضا
فاطمه گلشنینون غنچۀ طوباسی رضا
ملکوت اهلی نین آیینۀ تقواسی رضا
کشتی معرفته صیحۀ دریاسی رضا
طلعتی مه ، واریدی قامت رعناسی رضا
اوجاقامت لیقی یاده سالار عبّاسی رضا
کربلاقسمت اولار گر اولا امضاسی رضا
مشهدی ، کرببلا دشتینه همتا یارادوب
.
.
نفس پاک رضا وئردی صفا ایرانه
دینی احیا ائلیوب جلوه وئروب قرآنه
عیسوی دم لری عالمده دوشوب جولانه
ماهه بنزر یوزی حیرت یارادوب کیهانه
وصف ِ زیبالیقی تا چاتدی اونون کنعانه
یوسف اولدی متحیر باش اگوب مردانه
سسلنوب عشق اولا دنیاده بئله سلطانه
یارادان ، شاه خراسانی نه زیبا یارادوب
.
.
طوسیده نوگل باغ ارمه عشق اولسون
شاه اقلیم وفا و کرمه عشق اولسون
اومقام ودر و صحن وحرمه عشق اولسون
او جلال و جبروت و حشمه عشق اولسون
گنبد ِ زردیده یاشیل علمه عشق اولسون
ثبت ائدن شأنینی لوحه ،قلمه عشق اولسون
بارگاهینده ندیم و خدمه عشق اولسون
قادر الله او یری شیعیه مأوا یارادوب
.
.
لقب شاه شهان شأنینه باجا یاراشار
بیله شاهه بئله بیر صحن مطلا یاراشار
جدِّ اعظم اونا پیغمبر بطحا یاراشار
آنالیق حقین ادا ائتماقا زهرا یاراشار
بو شهین شأنینه لایق عمو سقا یاراشار
عمّه لیق شأنی خانم زینبه تنها یاراشار
مکتب عشقینی مهدی ائده ابقا یاراشار
بو گوزل عشقیله حق عالمه معنا یارادوب
.
.
پیرو خط ِ ولا دهریده منصوراولسون
آستان ِ حرمین جلوه سی پرنوراولسون
آقامین مجلس مدحینده گرک شوراولسون
دشمنین گوندوزی همچون شب دیجوراولسون
صحن مولادن هامی کبر و ریا دوراولسون
کیم قدم وورسا ره ِ عشقیده مأجوراولسون
کیم یاشیل پرچمه چپ باخساگوزی کوراولسون
شیعه نی حق بو یاشیل پرچمه شیدا یارادوب
.
.
ای«مُصَیِّب» ؛ آقامیزحق سۆزین انشاد ائله دی
فتنۀ مهلک اهریمنی برباد ائله دی
رشتۀ عصمتی تزویریدن آزاد ائله دی
کاخ بیدادی ییخوب فاطمه نی شاد ائله دی
ظلم مأمون زمان دان آقامیز داد ائله دی
جان وئرن وقتیده معصومه سی نی یاد ائله دی
گل باجی باغریمی قان،دوغرانان اکباد ائله دی
ئوزگه بیر عالمی قارداشیوه اعدا یارادوب
.
#رضویه_مدح
#رضویه_میلادیه #رضویه #مصیبی_تبریزی
#مرحبا_خالقه_آفاقی_نه_باجا_یارادوب
#ترکی
#زبدةالاشعار
نظر دهید