زبانحال حضرت رقیه (س) در خرابه شام
.
.
#سبک_آچیلدی_پرچم ( 10 سبک )
.
.
مرحوم قدرت اله نادری میانجی
.
.
پوزولدی گلشن دریلدی گوللر
کسیلدی تاب و توانیم عمه
اجل گلیدی قزون ئولیدی
خلاص اولیدی بو جانیم عمه
.
.
یانان فراقه سوار ناقه
غریب دوران اسیر اعدا
یوخومدی رختیم قرادی بختیم
آدیم اولوبدی غزال صحرا
ئورک بو یرده گلوبدی درده
سنه وار عرضیم عزیز زهرا
بابامه غمخوار منه پرستار
اوتور باشیوا دولانیم عمه
.
.
یتیمه بیر قز زواللی اولدوز
سپهر غمده باتانمارام من
گوتور حصیری ستم اسیری
آغیردی دردیم آتانمارام من
قوری یر اوسته علیل و خسته
آجام بی بی جان یاتامارام من
دینمرم چوخ واریمدی آرتوخ
ئورکده درد نهانیم عمه
.
.
ندن بی بی جان اسیر عدوان
اولوبدی منزل منه خرابه
نه اولدی اصغر او زار و مضطر
خزان یتوبدی گل ربابه
سولوب بوداقدا گولی قوجاقدا
باخاندا قلبیم دونور کبابه
گولوم چمنده گوزوم وطنده
قییتمگه یوخ گمانیم عمه
.
.
بابامدا گلمز بو حالی بیلمز
ندن گتوردی بیزی عراقه
نه اولدی بیردن دؤنوبدی مندن
دچار ائدوبدی منی فراقه
نه قدری آتسا منی اونوتسا
منیم واریمدور اونا علاقه
گورم یوخومدا بابام یانیمدا
نجه یوخودان اویانیم عمه
.
.
نه قوم و قارداش نه یار و یولداش
فقط سن اولدون منیم پناهیم
نه شمع و شامیم نه وار طعامیم
قابار ایاقیم خدا گواهیم
الیم اوزولدی گولوم پؤزولدی
نه اولدی بیلمم منیم گناهیم
او شاه خوبان چخارتدی یاددان
چخار سمایه فغانیم عمه
.
.
گل ایله چاره گُلِ بهاره
خزاندا قویما بی بی سولام من
گلوب گئدنلر شماتت ایلر
بهارین ابری کیمی دولام من
سنِیدی باری فلک مداری
نه وقتیمیدی اسیر اولام من
کسیلدی چاره باشیمدا قاره
خرابه اولدی مکانیم عمه
.
.
دئ «نادری» سن یاز ایله شیون
اسیر دشمن رقیه لایلای
سوسوز دوداقی سولان یاناقی
غریبه مسکن رقیه لایلای
قریلدی ائللر دریلدی گوللر
پوزولدی گلشن رقیه لایلای
گلنده اکبر دئ زار و مضطر
کسیلدی یردن نشانیم عمه
.
.
.
#حضرت_رقیه_شهادت
#پوزولدی_گلشن_دریلدی_گوللر
#نادری
#ترکی
#زبدةالاشعار
نظر دهید